Read efik MME ŊKE 18 Bible Online

MME ŊKE 18 - efik bible

MME ŊKE 18

¹OWO, ido esie ebine se enye oyomde; eyedada aka iso, ikereke item.

²Ndisime owo ikopke inem ke mbufiɔk, ibɔhɔke ke eriyarare esit esie.

³Ke ini idiɔk edide, but onyuŋ edi, esuene onyuŋ etiene oburobut ido.

⁴Ikɔ inua owo edi udem: idim mbufiɔk onyuŋ edi akpa eke otopde ɔwɔrɔ.

⁵Nditeŋe idiɔk owo enyin ifɔnke: ifɔnke ndifik eti owo ke ikpe.

⁶Mkpɔk-inua ndisime owo eduk ke enwan: inua esie onyuŋ okot ufen edi.

⁷Inua ndisime owo edi nsobo esie: mkpɔk-inua esie enyuŋ edi afia ukpɔŋ esie.

⁸Ikɔ mbia etie nte unan: ndien mmɔ esuhɔre eduk ke esit idibi.

⁹Owo ŋko eke ɔnuɔnde ubɔk ke utom esie edi eyen-eka owo eke ɔduɔŋɔde ŋkpɔ.

¹⁰Enyiŋ Jehovah edi ɔkpɔsɔŋ tower: eti owo efehe oduk ke esit, ndien odu ke ifure.

¹¹Inyene ɔbɔŋ edi ɔkpɔsɔŋ obio esie, enye onyuŋ ese ete ke etie nte edikoŋ ibibene.

¹²Esit owo okpon, ndien nsobo edi: edi nsukesit ebem ubɔŋ iso.

¹³Owo ndibɔrɔ ikɔ, ke mikaikopke kaŋa, edi ndisime ye but ye enye.

¹⁴Spirit owo ekeme ndibiom udɔŋɔ esie: edi ama edi spirit eke ɔbuŋɔde, anie ekeme ndiyɔ enye?

¹⁵Esit asian enyene ifiɔk: ndien utɔŋ owo eti ibuot oyom ifiɔk.

¹⁶Enɔ owo ɔnɔ owo ufaŋ, onyuŋ ada owo edi ke iso ikpɔ owo.

¹⁷Owo eke ebemde iso etiŋ ikɔ esie enen: ndien mbɔhɔiduŋ esie edi edidomo enye.

¹⁸Afia etre utɔk, onyuŋ adianare mkpɔsɔŋ owo.

¹⁹Utɔk eyen-eka akan ɔkpɔsɔŋ obio: ndien eŋwan mmɔ ebiet mkpaha tower.

²⁰Owo eyeda mfri inua esie ɔyuhɔ idibi esie: mbuŋwum mkpɔk-inua eyeyuhɔ enye.

²¹Mkpa ye uwem edu edeme ke ubɔk: ndien mmɔ eke emade enye eyedia mfri esie.

²²Okut aŋwan okut eti ŋkpɔ, onyuŋ ɔbɔ Jehovah mfɔn.

²³Eyen ubuene ɔdɔhɔ, “Mbɔk, mbɔk;” ndien enyene-ŋkpɔ ɔbɔrɔ uyat-uyat.

²⁴Owo (ediwak) ufan eyebiat idem esie: edi andima odu emi eyirede owo akan eyen-eka.