Read efik MME ŊKE 19 Bible Online

MME ŊKE 19 - efik bible

MME ŊKE 19

¹UBUENE eke asaŋade ke mfɔn-mma esie, ɔfɔn akan owo ŋkwaŋa inua eke edide ndisime.

²Ifɔnke ŋko ukpɔŋ ndinana ifiɔk: ndien ɔsɔp-ukot edue.

³Ndisime ido owo abiat usuŋ esie: ndien enye ayat esit ye Jehovah.

⁴Inyene adian ediwak mme ufan: edi ubuene adianare ye mbɔhiduŋ esie.

⁵Ikpe iditebeke ntiense nsu, ndien etiŋ nsu idibɔhɔke.

⁶Ediwak owo enem inua ye ɔbɔŋ: ndien kpukpru owo edi ufan owo enɔ.

⁷Kpu-kpru nditɔ-ete eyen ubuene esua enye: ŋwaŋwa ediso mme ufan esie edikpɔŋ enye anyan usuŋ: enye ebine ikɔ, mmɔ iduhe.

⁸Enyene-ibuot owo ama ukpɔŋ esiemɔ: onim-asian okut mfɔn.

⁹Ikpe iditebeke ntiense nsu: ndien eyesobo etiŋ ikɔ nsu.

¹⁰Edinem udia idotke ndisime owo; ŋwaŋwa ediso ofin ndikara mbɔŋ.

¹¹Mbufiɔk owo iyakke enye ɔsɔp iyaresit: onyuŋ eye enye ndifen ndudue.

¹²Ikpahesit ɔbɔŋ ebiet ŋkuni lion: edi ufɔn esie ebiet mbara ke mbiet.

¹³Ndisime eyen edi ata afanikɔŋ ete esie: ndien utɔk aŋwan ɔtɔtɔi kpukpru ini.

¹⁴Ufɔk ye inyene edi akpa mme ete: edi enyene-ibuot aŋwan oto Jehovah.

¹⁵Ifu anam ɔkpɔsɔŋ idap ɔduɔ owo ke idem: ndien owo nuɔn eyetie biɔŋ.

¹⁶Ekpeme-mbet ekpeme uwem esiemɔ; edi owo eke mikereke usuŋ esiemɔ eyekpa.

¹⁷Atua ubuene mbɔm ɔbuɔt Jehovah ŋkpɔ: ndien Enye eyenɔ enye usiene utom esie.

¹⁸Tunɔ eyen fo ke ini idorienyin odude; kunyuŋ uyak esit fo oyom enye ndiwot.

¹⁹Owo akwa ikpahesit eyesio isop: koro afo ama anyaŋa enye, eyenyene nditɔŋɔ ntak nnam.

²⁰Kop item, nyuŋ bɔ ntunɔ, man enyene ibuot ke ini iso fo.

²¹Ediwak ekikere edu owo ke esit: edi edi uduak Jehovah edisu.

²²Edi mfɔn-ido owo esin eyom owo: ndien ubuene ɔfɔn akan osu-nsu.

²³Uteŋe Jehovah asaŋa ke uwem: eyemana ɔyuhɔ; idiɔk-ŋkpɔ idisimke enye.

²⁴Ifu obuk ubɔk esie ke iko: enye idinamke ubɔk afiak ke idem inua esiemɔ.

²⁵Mia asak-nsahi, ndien ɔkɔi eyekabare ɔniɔŋ: nyuŋ sua nɔ asian, ndien enye eyetim ɔfiɔk ifiɔk.

²⁶Eyen eke esinde but ye esuene, otuk ete, ebin eka efep.

²⁷Eyen mi, tre ndikop item, ete ɔkpɔŋ ikɔ ifiɔk ediyo.

²⁸Oburobut ntiense asak ikpe: ndien inua mme idiɔk owo emen idiɔk ido esin ke idibi.

²⁹Ikpe ana ɔnɔ mbon nsahi: ufen onyuŋ ana ɔnɔ edem mbon ndisime.