Read efik MME ŊKE 2 Bible Online

MME ŊKE 2 - efik bible

MME ŊKE 2

¹EYEN mi, afo ama ɔbɔ ikɔ mi, onyuŋ onim mbet mi ke idem fo;

²Onyuŋ akpaŋ utɔŋ fo ke eti ibuot, onyuŋ esin esit fo ke mbufiɔk;

³Ama ofiori okot asian, emenere uyo fo ɔnɔ mbufiɔk;

⁴Ama oyom enye nte silver, onyuŋ ɔduŋɔre enye nte ŋkpɔ-uto eke edibede;

⁵Ndien afo eyetim ɔfiɔk uteŋe Jehovah, onyuŋ osime ifiɔk Abasi.

⁶Koro Jehovah enyene eti ibuot; ifiɔk ye mbufiɔk eto enye ke inua.

⁷Enye onim ifure ɔnɔ mbon edinen ido, onim otu-ekɔŋ ɔnɔ mmɔ eke esaŋade nte ɔfɔnde ama.

⁸Enye ekpeme usuŋ ikpe, onyuŋ etiŋ enyin ese usuŋ mbon-ima esie.

⁹Ndien afo eyetim ɔfiɔk eti ido, ye ikpe, ye se enende; ye kpukpru nti usuŋ.

¹⁰Koro eti ibuot eyeduk fi ke esit, ifiɔk eyenyuŋ enem ukpɔŋ fo;

¹¹Ekikere eyetie ekpeme fi, mbufiɔk eyenim fi,

¹²Man osio fi ke idiɔk usuŋ efep, ke ubɔk owo eke etiŋde ŋkwaŋa;

¹³Emi ekpɔŋde usuŋ emi enende, ekesaŋa ke usuŋ ekim;

¹⁴Emi enemde esit ndinam idiɔk; mmɔ edara ke ŋkwaŋa idiɔk;

¹⁵Emi mme usuŋ mmɔ eŋwinede, mmɔ enyuŋ ekwaŋa ke ido mmɔ:

¹⁶Man esio fi esen aŋwan ke ubɔk, ye ke ubɔk aŋwan idut eke enemde inua ikɔ;

¹⁷Eke ɔkpɔŋde nsaŋa uyen esie, onyuŋ efrede ediomi Abasi esie.

¹⁸Koro ufɔk esie ɔsuhɔrede aka mkpa, usuŋ esie

¹⁹onyuŋ aka ebiet mbukpo. Mme anditiene enye baba kiet isifiakke, isinyuŋ isimke ke usuŋ uwem.

²⁰Man afo asaŋa ke usuŋ nti owo, onyuŋ onim ido ndinen owo.

²¹Koro mbon edinen ido eyeduŋ ke obio, mmɔ eke efɔnde ema eyenyuŋ ebigi ke esit.

²²Edi eyesobo mme idiɔk owo ke isɔŋ efep, enyuŋ esɔhi mbon abiaŋa efep ke esit.