Read efik MME ŊKE 21 Bible Online

MME ŊKE 21 - efik bible

MME ŊKE 21

¹ESIT ɔbɔŋ edi idim mmɔŋ ke ubɔk Jehovah: enye akabare enye nte amade.

²Kpukpru usuŋ owo enen ke enyin owo: edi Jehovah odomo esit.

³Jehovah ama erinam eti ido ye edinen ikpe akan uwa.

⁴Ntan-enyin, ye mkponesit, ye utuen-ikaŋ mme idiɔk owo emediɔk.

⁵Ekikere mme ɔsɔp-ubɔk ekɔ uwak ikpɔŋ-ikpɔŋ: edi kpukpru owo ibumere ekɔ unana ikpɔŋ-ikpɔŋ.

⁶Inyene eke edeme nsu ɔkɔde ebiet edinime ibifik mmɔ eke eyomde mkpa.

⁷Nsɔŋido mme idiɔk owo eyekpɔri mmɔ efep: koro mmɔ minyimeke ndinam se inende.

⁸Owo ukwaŋ ido edi owo isop: ama edi edisana owo se enye anamde enen.

⁹Iduŋ ke enyɔŋ ɔkɔm ɔfɔn akan (ndiduŋ ye) ŋwan utɔk ke ufɔk ebuene-

¹⁰Idiɔk-ŋkpɔ ɔdɔŋ idiɔk owo ukpɔŋ: mbɔhiduŋ esie ikwe mbɔm ke enyin esie.

¹¹Ke ediade asak-nsahi isop, ɔkɔi eyenyene ibuot: ndien ke etemede enyene-ibuot owo, enye amana ɔfiɔk ŋkpɔ.

¹²Edinen owo etim ese ufɔk mme idiɔk owo: enye emen mme idiɔk owo otop esin ke idiɔk-ŋkpɔ.

¹³Owo eke esiride utɔŋ esie ke eseme ubuene, enye ke idem esie eyefiori, ndien owo eke eyerede ididuhe.

¹⁴Enɔ ke ndibe akabare iyaresit efep: inyene ke ikpanesit onyuŋ osuk ɔkpɔsɔŋ ifiopesit.

¹⁵Ndinam se inende enem eti owo esit: edi nsobo enyene mme anam ukwaŋ-ido.

¹⁶Owo eke ɔkpɔŋde usuŋ ɔniɔŋ ediyo; eyetak ke esop mme akpaŋa mkpa.

¹⁷Owo eke amade mbre eyedi owo unana: owo eke amade wine ye aran idiforoke.

¹⁸Idiɔk owo eyedi ufak eti owo: ndien eyekaŋa owo abiaŋa ke ibuot mbon edinen ido.

¹⁹Ndiduŋ ke esit ikɔt ɔfɔn akan ndiduŋ ye ŋwan utɔk ye iyaresit.

²⁰Ŋkpɔ-uto ye aran edu ke ufɔk enyene-ibuot owo, edi ndisime owo adia esie.

²¹Owo eke etienede eti ido ye ima eyekut uwem, ye eti ido, ye ubɔŋ.

²²Enyene-ibuot owo ɔdɔk ke obio mkpɔsɔŋ owo, onyuŋ ɔsuhɔre ɔkpɔsɔŋ ebiet mbuɔtidem mmɔ.

²³Owo eke ekpemede inua esie ye edeme esie, ekpeme ukpɔŋ esie ɔbɔhɔ ukut.

²⁴Ama edi owo iseri eke ataŋde idem, asak nsahi edi enyiŋ esie, enye anam ŋkpɔ ke iseri ye ŋkokidem.

²⁵Itɔŋ owo ifu eyewot enye: koro ubɔk esie minyimeke ndinam utom.

²⁶Itɔŋ ɔdɔŋ enye ofuri usen: edi eti owo ɔnɔ, inyuŋ isinke.

²⁷Uwa idiɔk ido edi mbubiam: ŋwaŋwa ediso ke adaŋemi enye adade enye edi ye idiɔk ekikere.

²⁸Eyesobo ntiense nsu: edi owo eke okopde eyedɔhɔ ke nsinsi.

²⁹Idiɔk owo ɔsɔŋ iso esie: edi edinen owo anam usuŋ esie ɔsɔŋɔ ada.

³⁰Baba eti ibuot, baba mbufiɔk, baba item eke ekemde ye Jehovah iduhe.

³¹Ediɔŋ horse ebeŋe usen ekɔŋ: edi erinyaŋa oto Jehovah.