Read efik MME ŊKE 23 Bible Online

MME ŊKE 23 - efik bible

MME ŊKE 23

¹KE adaŋemi afo etiede ke itie udia ye ɔbɔŋ, tim fiɔk se idude fi ke iso:

²Nyuŋ da ikwa dian ke itɔŋ fo, edieke afo edide owo udɔŋ.

³Kuyoyom edinem udia esie; koro enye edide udia nsu.

⁴Kukpa utom man enyene ŋkpɔ: tre asian fo emi.

⁵Nte afo ediyak enyin fo efe oduk ke esit? Amanam, enye iduhe: koro enye editibede mba ke idem esie: enye efe ɔnyɔŋ ke heaven nte ntrukpom.

⁶Kudia ŋkpɔ owo idiɔk enyin, kunyuŋ uma edinem udia esie:

⁷Koro enye etiede kpa nte ekerede ke esit esie: enye ɔdɔhɔ fi, ete, “Dia, ŋwɔŋ”; edi esit esie iduhe ye afo.

⁸Afo enyene ndikpɔhi ŋkeŋe fo eke afo adiade: ama onyuŋ ɔduɔk nnem-inua fo oro.

⁹Kuneme nneme usin ke utɔŋ ndisime owo: koro enye eyesin mbufiɔk ikɔ fo ke ndek.

¹⁰Kusehere adaŋa (iŋwaŋ) eset: kunyuŋ uduk ke iŋwaŋ nditɔ akpa:

¹¹Koro andifak mmɔ edide ɔkpɔsɔŋ; enye eyekpe ikɔ mmɔ ye afo.

¹²Sin esit fo ke item, nyuŋ kpaŋ utɔŋ fo ke ikɔ ifiɔk.

¹³Kutre nditunɔ eyenɔwɔŋ: ama amiŋa enye ke eto, enye idikpaha.

¹⁴Miŋa enye ke eto, nyuŋ sio ukpɔŋ esie ke ɔtɔ mme akpaŋa mkpa fep.

¹⁵Eyen mi, esit fo ama enyene ifiɔk, esit mi, kpa okimmɔ eyedara ŋko.

¹⁶Ekput mi eyenyuŋ edara, ke ini mkpɔk-inua fo etiŋde edinen ikɔ.

¹⁷Kuyak esit fo ofibe mme idiɔk owo ufup: edi du ke uteŋe Jehovah kpukpru ini.

¹⁸Koro ini ama odu ke iso, idisibeke ndien idori-enyin fo ifep.

¹⁹Afo, eyen mi kop, nyuŋ nyene ibuot, nyuŋ neŋere esit fo sin ke usuŋ.

²⁰Kuda ke otu mme ofobo wine, emi etade unam ke eŋweme:

²¹Koro mbon mmin ye mbon udia eyekabare edi ubuene: ifem eyenyuŋ esine owo ntaha ɔfɔŋ idem.

²²Kop uyo usɔ emi okobonde fi: kunyuŋ usin uka ke udek, koro enye ɔsɔŋde.

²³Dep akpanikɔ, kunyuŋ unyam, ye eti ibuot, ye item, ye asian.

²⁴Esit eyenem ete eti eyen eti-eti: enyene-ibuot eyen eyenyuŋ adat andibon enye esit.

²⁵Esit eyenem usɔ ye uka: andiman fi eyenyuŋ adat esit.

²⁶Eyen mi, nɔ mi esit fo: Yak enyin fo enyuŋ etim ese usuŋ mi.

²⁷Koro akpara edide edituŋɔ obube: aŋwan esien onyuŋ edi mkpafaha ukpe.

²⁸Ŋkɔm ŋwan owo eyedibe ebet nte ŋwo, onyuŋ anam mbon nsu ewak ke otu owo.

²⁹Anie okut ukut? Anie okut mfuhɔ? Anie enyene eŋwan? Ekikere anam anie? Anie ada unan ikpikpu? Enyin okim anie?

³⁰Mmɔ eke ebigi ke itie wine; mmɔ eke edukde ndiyom mbuaha wine,

³¹Kuse wine ke ini enye oyibede, ke enye esemde ke cup, ke enye odukde inem-inem.

³²Ke akpatre ke enye edidom nte urukikɔt, onyuŋ etiga nte ibɔm.

³³Enyin fo eyese iban esien: esit fo eyenyuŋ ɔdɔhɔ oburobut ikɔ.

³⁴Ndien afo eyetie nte owo eke anade ke ufɔt inyaŋ, ye nte owo eke anade ke enyɔŋ ito ubom.

³⁵Owo oro ɔdɔhɔ ete, “Eketɔ mi, ndien ndɔŋɔke; ekemia mi, ndien mfiɔkke: ini eke ndemerede, nyetɔŋɔ ntak nyom enye.”