Read efik MME ŊKE 24 Bible Online

MME ŊKE 24 - efik bible

MME ŊKE 24

¹KUFIBE mme idiɔk owo ufup, kunyuŋ uyom ndidu ye mmɔ.

²Koro esit mmɔ aduakde afai: mkpɔk-inua mmɔ enyuŋ etiŋ ebaŋa nnama

³Eda eti ibuot ebɔp ufɔk; enyuŋ eda ɔniɔŋ enam enye ɔsɔŋ.

⁴Enyuŋ eda ifiɔk eyɔhɔ kpukpru uto inyene ye uyai ke mme ubet esie.

⁵Idem ɔsɔŋ enyene-ibuot owo; ɔfiɔk-ŋkpɔ owo onyuŋ anam odudu esie ɔsɔŋ.

⁶Koro afo enyenede ndida ikike ke idem fo ŋŋwana ekɔŋ: ifure onyuŋ odu ke uwak mbon item.

⁷Eti ibuot okoŋ akan ndisime owo: enye itatke inua esie ke inua-otop.

⁸Owo eke oyomde usuŋ nte abakde ibak, eyekere ete, Etubom idiɔk uduak.

⁹Ndisime ekikere ɔmɔdiɔk: ndien asak-nsahi etek owo esit.

¹⁰Esit ama ɔduɔ fi ke usen ukut, odudu fo akabare ekpri.

¹¹Nyaŋa mmɔ eke ekade mkpa: ndien ama edi mmɔ eke efumde eka ebiet mkpa, Oh, nam mmɔ ebɔhɔ;

¹²Afo ama ɔdɔhɔ ete, “Sese, mmimɔ ikɔfiɔkke;” nte andidomo esit itimke ikut? Nte andikpeme ukpɔŋ fo ifiɔkke? Nte enye idinyuŋ inɔŋɔ owo nte utom owo edide?

¹³Eyen mi, dia aran-ɔkwɔk, koro ɔfɔnde; ye obukpa ɔkwɔk emi eniŋede fi ke nsiŋ.

¹⁴Kpa ntre, kpep eti ibuot ke idem fo: afo ama okut, ini ama onyuŋ odu ke iso, idori-enyin fo iditakke ndien.

¹⁵O idiɔk owo, kudibe ubet ke iduŋ eti owo: kuwuri ebiet nna esie:

¹⁶Koro eti owo ɔduɔde utim ikatiaba, ndien adaha ke enyɔŋ: edi mme idiɔk owo eyetuaha ke idiɔk.

¹⁷Esit okunem fi ke usua fo ɔduɔde; kunyuŋ udara ke ini enye atuahade ukot:

¹⁸Mbak Jehovah edikut, ndien ese oro ke idiɔk; ndien odorore enye iyaresit ke idem efep.

¹⁹Kuyat esit ye oburobut owo: kunyuŋ ufibe mme idiɔk owo ufup:

²⁰Koro oburobut owo midinyeneke eti utit: utuenikaŋ mme idiɔk owo eyenyuŋ onime.

²¹Eyen mi, bak Jehovah ye edidem: kunyuŋ ubuana ye mbon nsɔŋ-ibuot:

²²Koro nsobo mmɔ eyebumere adaha ke enyɔŋ: anie owo onyuŋ ɔfiɔk ufen eke mbiba (edinɔde)?

²³Mme mmɔ emi enyuŋ enyene mbon eti ibuot.

²⁴Ifɔnke nditeŋe owo enyin ke ikpe. Owo ama ɔdɔhɔ idiɔk owo, ete, “Ikɔ etebe fi,” kpukpru owo eyesuŋi enye, mme idut eyesua enye.

²⁵Edi mmɔ eke esuade enɔ enye (idiɔk owo) eyekut inemesit: ata eti ŋkpɔ eyenyuŋ osim mmɔ.

²⁶Owo eke ɔbɔrɔde edinen ikɔ otim owo inua.

²⁷Tim nam utom fo ke ebresien, nyuŋ nam ɔkpɔ ma ke iŋwaŋ; ndien ke ini oro okurede, bɔp ufɔk fo.

²⁸Kudi ntiense ubaŋa mbɔhɔiduŋ fo ke ikpikpu: nte afo ɔmɔŋ ada mkpɔk-inua fo osu nsu?

²⁹Kudɔhɔ, ete, “Nyenam enye kpa nte enye anamde mi: nyenɔ owo oro kpa nte utom esie edide.”

³⁰Ŋkasaŋa mbe iŋwaŋ ifem, ye iŋwaŋ-vine anana-ibuot:

³¹Ndien, sese, mbarekpe ɔyɔhɔ kpukpru; mbara ŋkukwɔ-inɔ ofuk enye iso: ɔkɔ itiat esie onyuŋ owure.

³²Ndien nse, nnyuŋ nnim ibuot: ŋkere, nnyuŋ nda item.

³³Idap eŋwen esisit, eyet-idap eŋwen esisit, mkpaŋ-ubɔk eŋwen esisit ke idap:

³⁴Ndien ubuene fo eyedi nte asaŋa-isaŋ; unana fo eyenyuŋ edi nte owo ekɔŋ.