Read efik MME ŊKE 28 Bible Online

MME ŊKE 28 - efik bible

MME ŊKE 28

¹MME IDIƆK owo efeŋe itɔk ke owo eke ebinede miduhe: edi eti owo edaha uko nte lion.

²Mme idiɔk ido obio esin mbɔŋ esie ewak: edi owo asian eke ɔfiɔkde se inende eyenam enye ebigi.

³Owo unana eke efikde mme ubuene, ebiet edim eke ɔkpɔride kpukpru udia efep.

⁴Mmɔ eke ekpɔŋde ibet etoro mme idiɔk owo: edi mmɔ eke enimde ibet etɔhɔ ye mmɔ.

⁵Mme idiɔk owo itimke ifiɔk ikpe: edi mmɔ eke eyomde Jehovah etim efiɔk kpukpru.

⁶Eyen ubuene eke asaŋade ke eti ido esie, ɔfɔn akan owo eke akwaŋade usuŋ esie, ndien enyene ŋkpɔ.

⁷Owo eke onimde mbet edi eyen asian: edi nsaŋa mme ɔduɔŋɔ-ŋkpɔ eyesin ete esie but.

⁸Anam inyene esie ɔtɔt ke eridia udori ŋkaha, ɔkɔ inyene ɔnɔ owo eke edituade mme ubuene mbɔm.

⁹Owo eke ɔwɔŋɔrede utɔŋ esie man okukop mbet, idem akam esie edidi ŋkpɔ ndek.

¹⁰Owo eke anamde eti owo oyo ke usuŋ idiɔk, enye eyeduŋ ke obube esiemɔ: edi ata nti owo eyedia ufɔn.

¹¹Owo inyene ese idem esie ke ɔfiɔk ŋkpɔ: edi asian ubuene otim ayarare enye.

¹²Ke ini nti owo edarade, ubɔŋ okpon: edi adaŋemi mme idiɔk owo edahade ke enyɔŋ, owo odibe.

¹³Owo eke odipde idiɔk ido esie idikwe unen: edi owo eke ayararede, onyuŋ ɔkpɔŋde mmɔ, eyekut mbɔm.

¹⁴Ɔfɔn ɔnɔ owo eke osuk abakde (Abasi) kpukpru ini: edi owo eke anamde esit esie ɔsɔŋ eyeduɔ ke idiɔk.

¹⁵Lion eke okunide, ye bear eke oyoŋde, etie nte idiɔk ɔbɔŋ ke otu mbon ubuene.

¹⁶Anana-ibuot ɔbɔŋ onyuŋ awak ndifik owo: edi owo eke asuade idiɔk mbumek eyebigi uwem.

¹⁷Yak owo eke iyip obiomde efehe aka obube; owo okukpan enye.

¹⁸Owo eke eneŋerede asaŋa eyenyene ifure: edi owo eke akwaŋade ke usuŋ iba eyeduɔ ke kiet.

¹⁹Owo eke ofuŋde iŋwaŋ esie eyeyuhɔ udia: edi owo eke ebinede mme oburobut owo eyeyuhɔ ubuene.

²⁰Owo akpanikɔ okut ediwak ufɔn: edi owo eke ɔkɔde wowo inyene idibɔhɔke ufen.

²¹Uteŋe-enyin ifɔnke: koro owo eyedue abaŋa udia.

²²Owo idiɔk enyin ɔkɔ wowo inyene: inyuŋ ifiɔkke ite ke unana edisim imɔ.

²³Owo ama asua ɔnɔ owo, amanam, owo eyema enye akan owo nneminua.

²⁴Owo eke obumede ŋkpɔ ete esie, ye ŋkpɔ eka esie, ndien ɔdɔhɔ, ete, “Idiɔk ŋkpɔ iduhe ke esit”: enye edi nsaŋa ŋŋwo.

²⁵Okpon-esit edemere utɔk: edi owo eke ɔbuɔtde idem esie ye Jehovah eyesehe.

²⁶Owo eke ɔbuɔtde idem ye esit esiemɔ edi ndisime owo: edi owo eke asaŋade ke ifiɔk eyebɔhɔ.

²⁷Owo eke ɔnɔde ubuene ŋkpɔ idinanake ŋkpɔ: edi eyewak isuŋi owo eke ofukde enyin esie.

²⁸Ke ini mme idiɔk owo eforode, owo edibe: edi adaŋemi esobode mmɔ, nti owo etɔt.