Read efik MME ŊKE 29 Bible Online

MME ŊKE 29 - efik bible

MME ŊKE 29

¹OWO eke ewakde ndidua-ri enye, ndien enye ɔsɔŋ obot itɔŋ, eyebiara usɔp-usɔp, ndien ididige nte ekɔkde enye.

²Adaŋemi nti owo ekponide, mbio-obio edat esit: ndien adaŋemi mme idiɔk owo ekarade, mbio-obio eseme.

³Owo eke amade ifiɔk adat ete esie esit: edi nsaŋa kpara asuan inyene.

⁴Edidem ada ikpe anam obio ɔsɔŋɔ ada; edi ɔbɔa-enɔ osobo obio.

⁵Owo eke enemde inua abaŋa mbɔhiduŋ esie ɔkɔbi iyire ɔnɔ ikpat ukot esie.

⁶Afia odu ke ndudue idiɔk owo: edi eti owo ɔkwɔ onyuŋ adat esit.

⁷Eti owo ɔfiɔk ikɔ mme ubuene: idiɔk owo inimke ibuot ndifiɔk.

⁸Mbon ndiɔk-inua ekim ikaŋ ke obio: edi mbon eti ibuot esuk iyaresit.

⁹Enyene-ibuot owo ekpe ikɔ ye ndisime owo, enye ayat esit, onyuŋ asak imam, ndien nduɔk-odudu iduhe.

¹⁰Mbon afai esua owo eke ɔfɔnde ama: edi mmɔ eke enende eyom uwem esie (ndinim).

¹¹Ndisime owo ayarare ofuri iyaresit esiemɔ: edi amanam, enyene-ibuot owo eyesuk enye.

¹²Ɔbɔŋ ama akpaŋ utɔŋ ke ikɔ nsu, kpukpru ikɔ esie eyekabare ediɔk.

¹³Ubuene ye owo nnama esop idem ɔtɔ kiet: edi Jehovah aŋwaŋa mmɔ mbiba enyin.

¹⁴Edieke ɔbɔŋ ekpede ikpe mme ubuene ke akpanikɔ, ebekpo esie eyebigi ke nsinsi.

¹⁵Eto ye item enɔ owo eti ibuot: edi eyen eke eyakde enɔ idem esie, esin eka esie but.

¹⁶Ke mme idiɔk owo etɔtde, idiɔk ido ɔtɔt: edi nti owo eyekut nsobo mmɔ.

¹⁷Tunɔ eyen fo, ndien enye eyenɔ fi nduɔk-odudu, onyuŋ adat fi esit.

¹⁸Ke ini ŋkukut miduhe, obio etie otime-otime: edi ɔfɔfɔn didie ye owo eke onimde mbet!

¹⁹Idige ke ikɔ ke editeme ofin: koro enye eyetim ɔfiɔk, edi idibɔrɔke bɔrɔ.

²⁰Afo ama okut owo eke ɔsɔpde inua ikɔ: ndisime owo enyene idorieyin akan enye.

²¹Owo ama akama ofin esie ke mmemido toto ke uyen: amanam, ofin eyekabare edi eyen.

²²Owo iyaresit edemere utɔk: owo ikpahesit awak ndidue.

²³Iseri owo eyesuhɔre enye: edi nsukesit eyeda ukpono.

²⁴Owo eke abuanade ŋkpɔ ye inɔ, asua uwem esiemɔ: enye eyekop nte ewukde, edi iyarakede.

²⁵Uteŋe owo ɔkɔk afia onim: edi eda owo eke ɔbuɔtde idem esie ye Jehovah emenere enye enim ke enyɔŋ.

²⁶Ediwak owo eyom iso enyene-obio: edi ikpe owo oto enyɔŋ.

²⁷Nti owo ese oburobut owo ke mbubiam: idiɔk owo onyuŋ ese owo edinen ido ke mbubiam.