Read efik MME ŊKE 3 Bible Online

MME ŊKE 3 - efik bible

MME ŊKE 3

¹EYEN mi, kufre mbet mi; edi yak esit fo ekpeme mme ewuhɔ mi:

²Koro eyekɔrɔ anyan usen, ye isua uwem, ye ifure enɔ fi.

³Kuyak mfɔnido ye akpanikɔ ekpɔŋ fi: kɔŋɔ mmɔ ke itɔŋ fo; wet mmɔ ke ɔwɔŋ esit fo:

⁴Ndien afo eyekut ima ye mfɔniso ke iso Abasi ye ke iso owo.

⁵Buɔt idem fo ye Jehovah ke ofuri esit fo; ndien kuberi edem ke asian fo.

⁶Diɔŋɔ enye ke kpukpru usuŋ fo, ndien enye eyeneŋere usuŋ fo onim.

⁷Kuse idem fo ke ɔfiɔk ŋkpɔ: teŋe Jehovah, nyuŋ kpɔŋ idiɔk.

⁸Eyenam idem ɔsɔŋ fi, onyuŋ ebit fi ɔkpɔ.

⁹Kpono Jehovah ke inyene fo, ye ke akpa ubak kpukpru mbuŋwum fo:

¹⁰Ndien ebiet-unim-ŋkpɔ fo eyeyɔhɔ kpak, obufa wine eyenyuŋ ɔyɔhɔ ke ebiet-udigi fo ɔduɔhɔ.

¹¹Eyen mi, kusin ufen Jehovah ke ndek; kunyuŋ uyak ntunɔ esie efek fi:

¹²Koro Jehovah ɔtunɔde owo eke enye amade; kpa nte emi ete ɔtunɔde eyen eke enemde enye esit.

¹³Ɔfɔfɔn ɔnɔ owo eke osimede eti ibuot, ye owo eke okutde asian.

¹⁴Koro udori esie ɔfɔnde akan udori silver, mbuŋwum esie onyuŋ ɔfɔn akan eti gold.

¹⁵Enye ɔsɔŋ urua akan pearl; kpukpru ŋkpɔ-uto fo inyuŋ ikemke ukem ye enye.

¹⁶Anyan usen odu enye ke ubɔk nnasia; inyene ye ubɔn edu enye ke ufien.

¹⁷Usuŋ esie edi usuŋ inemesit, kpukpru ɔkpɔ-usuŋ esie enyuŋ edi ifure.

¹⁸Enye edi eto uwem mmɔ eke emumde enye ekama: onyuŋ ɔfɔn ye mmɔ eke efatde enye.

¹⁹Jehovah ekeda eti ibuot onim ererimbot ke itie esie: ada mbufiɔk owuk ikpa-enyɔŋ.

²⁰Edi ifiɔk esie akasiak mme udem, onyuŋ esin ikpa-enyɔŋ ɔduɔk mbara

²¹Eyen mi, kuyak mmɔ esop fi ke enyin: kpeme ekikere ye ɔniɔŋ.

²²Ndien mmɔ eyekabare edi uwem ukpɔŋ fo, ye mbana itɔŋ fo.

²³Ndien afo eyesaŋa ke usuŋ fo ke ifure, ndien ukot fo idituahake.

²⁴Ke adaŋemi afo anade ke isɔŋ udufeheke ndik: ndien ke ini afo ɔsuhɔrede ana, idap eyeniŋe fi.

²⁵Kufehe baba ndik eke abuatde buat, kunyuŋ ufehe oyobio mme idiɔk owo, ke ini enye edidide.

²⁶Koro Jehovah eyedi iberedem fo, eyenyuŋ ekpeme ukot fo mbak edimum.

²⁷Kusin ndida eti ŋkpɔ nnɔ mmɔ eke ekpenyenede enye, ke ini ubɔk fo ekemede ndinam.

²⁸Kudɔhɔ mbɔhiduŋ fo, ete, Ka, ndien fiak di, mkpɔŋ nyenɔ fi, ke odude ye afo.

²⁹Kukere mbɔhiduŋ fo idiɔk, sia enye ke oduŋ ke ndueidem ye afo.

³⁰Kutɔhɔ ye owo ke ikpikpu, ke enye minamke fi idiɔk.

³¹Kufibe ufup ye owo afai, kunyuŋ umek usuŋ esie baba kiet.

³²Koro mme ɔsɔŋ-ibuot edide se Jehovah asuade: edi enye oduk odu ye mbon edinen ido.

³³Isuŋi Jehovah odu ke ufɔk mme idiɔk owo: edi enye eyediɔŋ iduŋ mmɔ eke enende.

³⁴Ke ini enye asakde mbon nsahi, enye ɔfɔn ido ndien ye mme osuk-esit.

³⁵Mbon eti-ibuot eyedia ubɔŋ: ndien ama edi mbon ndisime, but eyefori mmɔ.