Read efik MME ŊKE 30 Bible Online

MME ŊKE 30 - efik bible

MME ŊKE 30

¹UYO Agur eyen Jakeh; kpa prophecy. Owo oro ɔdɔhɔ Ithiel, kpa Ithiel ye Ucal:

²Ŋkɔm mmanana ibuot ŋkan owo, nnyuŋ nnyeneke mbufiɔk owo.

³Ŋkonyuŋ ŋkpepke ifiɔk, nnyuŋ mfiɔkke ifiɔk ata Edisana Abasi.

⁴Anie ɔdɔk ke enyɔŋ, ndien ɔsuhɔre? Anie ataŋ ofum esin ke eka-ubɔk esie? Anie ɔbɔp mmɔŋ ke ɔfɔŋidem? Anie ɔsɔŋɔ onim ofuri mme utit ererimbot? Nsidi enyiŋ esie? Nsinyuŋ idi enyiŋ eyen esie, koro afo ɔmɔfiɔk?

⁵Kpukpru se Abasi ɔdɔhɔde edi edisana: enye edi otu-ekɔŋ mmɔ eke ebuɔtde idem ye enye.

⁶Kuda ikɔ efen ukɔrɔ ke ikɔ esie, mbak enye edisua ɔnɔ fi, edinyuŋ abat fi ke osu-nsu.

⁷Mmebeŋe fi ŋkpɔ iba kusin mi ke mmeŋka-ŋkpaha kaŋa:

⁸Men mi abiaŋa ye ikɔ nsu ke idem fep, nim anyan ebiet: kunɔ mi ubuene, kunyuŋ unɔ mi inyene; bɔk mi ke udia udeme mi:

⁹Mbak ndiyuhɔ, ndien ŋkaŋ fi, ndien ndɔhɔ nte, Anie edi Jeho-vah? Mbak ndinyuŋ mbuene, ndien nyip inɔ, nnyuŋ nsuene enyiŋ Abasi mi.

¹⁰Kuyak ofin obuk ete esie, mbak enye edisuŋi fi, ndien afo edue isop.

¹¹Emana odu eke esuŋide ete mmɔ, ndien mikɔmke eka mmɔ.

¹²Emana odu eke ebatde idem-mmɔ ke edisana, edi iyetke ndek mmɔ ifep.

¹³Emana odu: ekoŋ didie enyin mmɔ! Didie ke mmɔ etan enyin!

¹⁴Emana odu, emi edet mmɔ edide ofut, edet etak mbaŋ mmɔ enyuŋ edi ikwa, eke edade eta mbon-ukut ke isɔŋ efep, ye mme ubuene ke otu owo.

¹⁵Etuet enyene nditɔ-iban iba: “Nɔ, Nɔ.” Enyene ŋkpɔ ita eke misiyuhɔke: enyene inaŋ eke misidɔhɔde, ite,

¹⁶“Ekem”; Obio ekpo; ye edisiri ibidi; ye isɔŋ eke mmɔŋ miyuhɔke; ye ikaŋ emi misidɔhɔke, ite, “Ekem.”

¹⁷Ama edi enyin eke esuenede ete, onyuŋ esede eka ke ndek, minyuŋ ikopke uyo esie, mme raven ke itihere eyekɔŋ enye; nditɔ ntrukpom eyenyuŋ eta enye.

¹⁸Ŋkpɔ ita edu eke enyenede mi ndyɔ ekan: ye ŋkpɔ ŋkpɔ inaŋ eke mmemfiɔkke:

¹⁹Usuŋ ntrukpom ke ikpa-enyɔŋ; usuŋ urukikɔt ke enyɔŋ itiat; usuŋ ubom ke ufɔt akwa mmɔŋ; ye usuŋ erenowo ye eyen-aŋwan.

²⁰Usuŋ aŋwan efibe etie ntre; enye adia, ndien ɔkwɔhɔre inua esiemɔ, ndien ɔdɔhɔ ete, “Nnamke idiɔk ido.”

²¹Ŋkpɔ ita esin isɔŋ enyek; ŋkpɔ inaŋ inyuŋ iyakke enye emenere:

²²Ofin, ke ini enye adade ubɔŋ; ye ndisime owo, ke ini enye enyenede ediwak udia;

²³Ŋwan usua, ke ini enye ɔdɔde ndɔ; ye ofin aŋwan, ke ini enye ɔbɔde eka esie itie.

²⁴Enyene ŋkpɔ ita emi ekpride eti-eti ke isɔŋ; edi mmɔ enyene ibuot eti-eti.

²⁵Iyɔŋ idige mkpɔsɔŋ mbio, ndien mmɔ ebon udia mmɔ ke nda-eyo.

²⁶Mme cony edi mbio eke misɔŋke idem, ndien mmɔ enim ufɔk mmɔ ke otu itiat.

²⁷Ŋkukuŋkpɔyɔriyɔ inyeneke edidem, edi mmɔ ebahare idem mmɔ kpukpru udim-udim ewɔŋɔ;

²⁸Ukpɔŋ-eyen omum ŋkpɔ ke ubɔk mbiba; enye onyuŋ odu ke ufɔk mbɔŋ.

²⁹Enyene ŋkpɔ ita eke eyede ikpat: kpa inaŋ eye isaŋ:

³⁰Lion edi ɔkpɔsɔŋ ke otu mme unam, baba kiet inyuŋ isinke enye afiak edem;

³¹Ebua ubin-unam; ye okpo ebot; ye edidem eke owo baba kiet mibiɔŋɔke enye.

³²Edieke afo anamde ebiɔ ke eritaŋ idem fo: edieke afo onyuŋ ekerede idiɔk, fuk ubɔk ke inua.

³³Koro erifik mmɔŋ-eba anamde butter: erifik ibuo onyuŋ anam iyip ɔwɔrɔ: kpa ntre ŋko erifik iyaresit anam utɔk edi.