Read efik MME ŊKE 5 Bible Online

MME ŊKE 5 - efik bible

MME ŊKE 5

¹EYEN mi, nim ibuot ke ɔniɔŋ mi, kpaŋ utɔŋ fo ke mbufiɔk mi.

²Man afo ekpeme nti ekikere, man mkpɔk-inua fo ŋko enim ifiɔk.

³Koro mkpɔk-inua esen aŋwan etɔide aran-ɔkwɔk, nsiŋ esie onyuŋ ɔfiɔnɔ akan aran:

⁴Edi utit esie odoro nte etidot ekpe, ɔsɔp nte ofut iso iba.

⁵Ukot esie ɔsuhɔre aka mkpa; ikpat esie osim obio ekpo.

⁶Man enye okudomo usuŋ uwem, enye oyoyo aka edem eke enye mifiɔkke.

⁷Mbufo nditɔwɔŋ, ekop ndien uyo mi, ekunyuŋ ekpɔŋ ikɔ inua mi.

⁸Da usuŋ fo kpɔŋ enye enyan ebiet, kunyuŋ usaŋa ukpere enyin-usuŋ ufɔk esie:

⁹Mbak afo edinɔ owo efen uyai fo, edinyuŋ ada isua fo ɔnɔ mfiomo:

¹⁰Mbak isen owo ediyuhɔ inyene fo: mbak ɔkpɔsɔŋ utom fo edinyuŋ odu ke ufɔk esen owo;

¹¹Ndien afo eyetua ke ukperedem fo, ke ini ikpɔhidem fo ye obukidem fo ebiarade,

¹²Ndien afo eyedɔhɔ ete, Nsinam ŋkasuade item, esit mi okonyuŋ esede ntunɔ ke ndek?

¹³Mmeŋkonyuŋ ŋkopke uyo mmɔ eke etemede mi, ŋkonyuŋ ŋkpaŋke utɔŋ nnɔ mmɔ eke ekpepde mi?

¹⁴Ayak esisit ŋkpodu ke kpukpru mme idiɔk-ŋkpɔ ke ufɔt esop eke esopde.

¹⁵Ŋwɔŋ mmɔŋ ke obube mmɔŋ fo, ye mbit-mbit mmɔŋ ke idim fo.

¹⁶Enyin idim fo eyesiaha ke esien, akpa mmɔŋ ke aŋwa;

¹⁷Eyedi okuo ikpɔŋ, ndien ididige eke esen owo ŋko.

¹⁸Yak ɔfɔn ɔnɔ obube mmɔŋ fo, nyuŋ dara ŋwan uyen fo.

¹⁹Edima okoyo, ediye edop; yak eba esie enem fi kpukpru ini; yak ima esie osuk oyuhɔ fi.

²⁰Ndien, eyen mi, esen aŋwan edinam didie ɔyuhɔ fi, afo edinyuŋ anam didie afat ikpanesit aŋwan idut?

²¹Koro mme usuŋ owo enade iŋwaŋ ke iso Jehovah, enye onyuŋ odomo kpukpru ido owo.

²²Oburobut ido idiɔk owo eyemum enye, uruk idiɔk-ŋkpɔ esiemɔ eyenyuŋ ɔsɔŋɔ esike enye.

²³Enye eyekpa ke unana item; eyenyuŋ ɔduɔ ke uwak ndisime esie.