Read efik MME ŊKE 8 Bible Online

MME ŊKE 8 - efik bible

MME ŊKE 8

¹NTE eti ibuot ikotke? Nte mbufiɔk isioroke uyo esie?

²Enye ada ke mbuot edikoŋ ebiet, ke mben ɔkpɔ-usuŋ, ke ufɔt usuŋ.

³Ke edem enyin-usuŋ, ke inua-otop obio, ke ɔtɔ uduk enyin-usuŋ ke enye ɔkwɔrɔ.

⁴Ete, Ke edi mbufo owo ke ŋkot; mmonyuŋ mmenere uyo mi nnɔ nditɔ owo.

⁵Mbufo, mbon ɔkɔi, etim efiɔk ɔniɔŋ: mbufo mbon ndisime ŋko, enyene ata esit ifiɔk.

⁶Mbufo ekop: koro nyedɔhɔ ata eti ŋkpɔ: ndien ke ŋkubɔrede mkpɔk-inua mi nyetiŋ se inende.

⁷Koro nsiŋ mi eyetie ekere akpan-ikɔ; ndien mkpɔk-inua mi ese idiɔk ke mbubiam.

⁸Kpukpru ikɔ inua mi edi se inende; baba kiet eke akwaŋade, eke onyuŋ oyurɔde, iduhe ke otu mmɔ.

⁹Kpukpru mmɔ etara asian owo ke idem, enyuŋ enen enɔ mmɔ eke enyenede ifiɔk.

¹⁰Mbufo ebɔ item mi, ekubɔ silver; ebɔ ifiɔk ekan ata edimek gold.

¹¹Koro eti ifiɔk ɔfɔnde akan pearl; ndien kpukpru ŋkpɔ-uto ikemke ukem ye enye.

¹²Ami eti ibuot nduŋ ye ɔniɔŋ, nnyuŋ nyarare ifiɔk ye ikike.

¹³Uteŋe Jehovah edi ndisua idiɔk, ye iseri, ye iseŋ, ye idiɔk ido: ami nnyuŋ nsua abak inua.

¹⁴Item ye ata ɔniɔŋ edi okim: ndi asian; mmenyene odudu.

¹⁵Oto mi ndidem eda ubɔŋ, mbɔŋ enyuŋ ewuk se inende.

¹⁶Oto mi ikpɔ owo ekara, ye mme akwa owo, kpukpru mme ebierikpe ererimbot.

¹⁷Ami mmama mmɔ eke emade mi; ndien mmɔ eke ebakde eyom mi eyekut mi.

¹⁸Inyene ye ukpono edu ye ami, inyene eke ebigide ye ido eke enende.

¹⁹Mfri mi ɔfɔn akan gold, idem ata eti gold; mbuŋwum mi onyuŋ ɔfɔn akan edimek silver.

²⁰Nsasaŋa ke usuŋ eke enende, ke ufɔt ɔkpɔ-usuŋ ikpe;

²¹Man nnam mmɔ eke emade mi eda ŋkpɔ enyene; nyenyuŋ nyɔhɔ ubet unim-ŋkpɔ mmɔ.

²²Jehovah ekenyene mi ke akpa eritɔŋɔ usuŋ esie, ke enye mikainamke ŋkpɔ esie, ke ata eset.

²³Ke eyo oko ke ekeyet mi aran enim, ke eritɔŋɔ, ke ererimbot mika-iduhe.

²⁴Ŋkamana ke ini mme udem mika-iduhe kaŋa; ke ini mme idim eke mmɔŋ awakde mika-iduhe kaŋa.

²⁵Ŋkamana ke ini ikpɔ obot mika-iwuhɔke, ke ini ŋkpri obot mika-iduhe:

²⁶Ke adaŋemi enye mika-inamke kaŋa isɔŋ ye mme desert, ye idem akpa ŋkukuk ntan.

²⁷Ami ŋkodu do ke adaŋemi enye owukde enyɔŋ: ke ini enye ewetde ekara ke iso inyaŋ.

²⁸Ke ini enye emende afia enyɔŋ owuk ikpa-enyɔŋ: ke ini enye anamde enyin idim inyaŋ esɔŋɔ:

²⁹Ke ini enye owukde akamba mmɔŋ ewuhɔ esie, ete mmɔŋ okube mben esie: ke ini enye ewetde itie isɔŋ:

³⁰Ndien ndu enye ke ŋkaŋ, eyen emi enye ɔkɔde: ŋkonyuŋ ndi se idatde enye esit ofuri usen; ndara ke iso esie kpukpru ini.

³¹Ndara mbaŋa edem isɔŋ esie emi owo oduŋde: ndien idaresit mi odu ke otu nditɔ owo.

³²Mbufo nditɔwɔŋ, ekop ndien uyo mi: ndien ɔfɔfɔn ye mmɔ eke ekpemede usuŋ mi.

³³Ekop item, enyuŋ enyene ibuot, ndien ekusin enye.

³⁴Ɔfɔfɔn ye owo eke okopde uyo mi, onyuŋ etiede ke enyin-usuŋ mi kpukpru usen ebet, onyuŋ etiede ke inua-otop mi ekpeme.

³⁵Koro owo eke okutde mi okut uwem, eyenyuŋ ɔbɔ Jehovah mfɔn.

³⁶Edi owo eke eduede mi abiat ukpɔŋ esiemɔ: kpukpru mmɔ eke esuade mi, ema mkpa.