Read efik ECCLESIASTES 10 Bible Online

ECCLESIASTES 10 - efik bible

ECCLESIASTES 10

¹OKPO nsuŋ enam aran usɔ-aran amak onyuŋ etebe: kpa ntre esisit ebiɔ abiat owo eke ekponode ebaŋa eti ibuot ye ubɔŋ.

²Esit owo eti ibuot odu enye ke ubɔk nnasia, edi esit ndisime owo odu enye ke ufien.

³Ndien ŋko ke usuŋ ekededi eke ndisime owo asaŋade, ibuot anana enye, enye onyuŋ ɔdɔhɔ kpukpru owo, ete ke imɔ idi ndisime owo.

⁴Edieke edidem ayatde esit ye afo, kudaha ke ebiet fo; koro mmem-ibuot osukde ikpɔ ndudue.

⁵Enyene idiɔk ido kiet emi ŋkokutde ke idak utin, nte ndudue eke otode edidem:

⁶emenere ndisime owo enim ke enyɔŋ ke ata edikoŋ ebiet, ndien mbon inyene etie ke obukpo ebiet.

⁷Mma ŋkut nte ifin edorode horse esaŋa, nte mbɔŋ enyuŋ esaŋade nte ifin ke isɔŋ.

⁸Owo eke otibide obube, ekeme ndiduɔ ke esit; ndien owo ama owuri ɔkɔ, urukikɔt eyedom enye.

⁹Owo ama otibi itiat, eyenam idem esie ŋkpɔ ke esit; ama asiak eto, eyeda unan ke esit.

¹⁰Owo ama otip ukwak, ndien mibanke iso efere, enye enyene ndidɔdiɔŋ nsɔŋ ubɔk: edi ifiɔk ɔfɔn ke ndinam ŋkpɔ ɔwɔrɔ usuŋ.

¹¹Urukikɔt ama odom owo, koro mikebreke idiɔŋ isuk enye, andibre idiɔŋ adia nso uku?

¹²Ikɔ-inua enyene-ibuot owo emeye; edi mkpɔk-inua ndisime owo emen enye:

¹³eritɔŋɔ ikɔ inua esie edi ndisime: ndien utit inua esie edi idiɔk idat.

¹⁴Ndien ndisime owo etiŋ ediwak ikɔ: owo ifiɔkke se ididide: ndien anie ekeme ndisian owo se iditienede enye ke edem?

¹⁵Utom ndisime owo ɔyuhɔ enye: koro enye mifiɔkke usuŋ nte akade obio.

¹⁶Ifɔnke inɔ fi, O obio, eke edidem fo edide eyenɔwɔŋ, mbɔŋ fo enyuŋ ediade ŋkpɔ ke usen-ubɔk!

¹⁷Ɔfɔn ɔnɔ fi, O obio, eke edidem fo edide eyen ata ɔbɔŋ, ikpɔ owo fo enyuŋ ediade ŋkpɔ ke ekem ini, eyom nsɔŋidem, iyomke usɔrɔ.

¹⁸Ata ifu ayak obum obu; nsukubɔk onyuŋ ayak ufɔk odut.

¹⁹Enam udia ke mbre, wine onyuŋ adat mme odu-uwem esit: inyene onyuŋ ɔbɔrɔ kpukpru ŋkpɔ.

²⁰Kusuŋi edidem ke idem ekikere fo: kunyuŋ usuŋi mbɔŋ ke ubet nna fo: koro inuen enyɔŋ eyeda uyo fo eketiŋ, enyene-mba eyenyuŋ asuan ikɔ.