Read efik ECCLESIASTES 12 Bible Online

ECCLESIASTES 12 - efik bible

ECCLESIASTES 12

¹NYUŊ ti Andibot fi ke ini afo edide akparawa, ke ini ukut mika-idige kaŋa, ke mme isua eke afo edidɔhɔde ete, “Ŋkwe inem ke esit,” mika-isimke (fi);

²ke utin, ye uŋwana ye ɔfiɔŋ, ye ntantafiɔŋ mika-ikimke kaŋa, idiɔk enyɔŋ minyuŋ itieneke edim

³idi: ke usen eke mme andikpeme ufɔk edinyekde, ye eke mkpɔsɔŋ owo edinuhɔde, eke mbon ɔkɔk enyuŋ edopde, koro mmɔ ekabarede edi esisit, ndien mmɔ eke etiede ke window

⁴enyuŋɔ, ekim, ndien ekɔbi usuŋ ke efak, ke adaŋemi uyom ŋkpɔ-ɔkɔk ɔsuhɔrede, ndien enye edemere ke uyo ntarusuŋ, kpukpru nditɔ-iban ikwɔ enyuŋ esuhɔre;

⁵mmɔ enyuŋ ebak se ikoŋde, ŋkpɔ ndik enyuŋ edu ke usuŋ, eto almond onyuŋ asiaha ikɔŋ, ŋkuku-ŋkpɔyɔriyɔ onyuŋ akabare odobi, udɔŋ onyuŋ odop: koro owo ɔmɔŋ aka ke nsinsi iduŋ esie; mbon ntuaŋa enyuŋ ekanare obio ekuk:

⁶ke mika-imenke uruk e-silver ifep, bowl o-gold mika-inyuŋ ibomoke, abaŋ mika-inyuŋ ikpaha ke idim, wheel mika-inyuŋ ibuŋɔke ke obube.

⁷Ndien ntan eyefiak ke ntan, kpa nte ekedide: spirit eyefiak etiene Abasi emi ɔkɔnɔde enye.

⁸Ɔkwɔrɔ-ikɔ ɔdɔhɔ, ete Ata akpatre ikpikpu ŋkpɔ; kpukpru ŋkpɔ edi ikpikpu.

⁹Ndien ŋko-ŋko, koro Ɔkwɔrɔ-ikɔ edide enyene-ibuot owo, enye osuk ekpep mbio-obio ifiɔk; onyuŋ odomo, onyuŋ ɔduŋɔ, onyuŋ otim ediwak ŋke.

¹⁰Ɔkwɔrɔikɔ esin ubɔk oyom edinem ikɔ: ndien se ewetde edi ikɔ akpanikɔ.

¹¹Uyo mbon eti ibuot ebiet ŋkpɔ ukim-enaŋ: mme etubom mbon esop enyuŋ ebiet okpukwak eke ekɔŋde esin: ekpemerɔŋ kiet ɔkɔnɔ mmɔ.

¹²Ndien ŋko-ŋko, eyen mi, kop item: erinam ediwak ŋwed inyeneke erikure; erikpep ŋkaha onyuŋ esin idem akpa mba.

¹³Yak nnyin ikop utit ofuri ŋkpɔ emi: bak Abasi, nyuŋ nim mbet esie: koro emi edi eke kpukpru owo.

¹⁴Koro Abasi eyekot kpukpru ŋkpɔ emi enamde edi ikpe, ɔkɔrɔ ke kpukpru ndibe-ndibe ŋkpɔ, edide eti, eyuŋ edide mme idiɔk.