Read efik ECCLESIASTES 5 Bible Online

ECCLESIASTES 5 - efik bible

ECCLESIASTES 5

¹KPEME ukot fo ke adaŋemi afo akade ke ufɔk Abasi, ndien ndisaŋa ŋkpere man okop, ɔfɔn akan uwa eke ndisime owo awade: koro mmɔ mikereke ite ke mmimɔ inam idiɔk.

²Kusɔsɔp inua, kunyuŋ uyak esit fo awara ndisioro uyo ke iso Abasi: koro Abasi odude ke heaven, ndien afo odu ke isɔŋ: yak ikɔ fo edi esisit, ndien:

³koro uwak utom esinde ndap edi: kpa ntre ke uwak ikɔ esin uyo ndisime owo edi.

⁴Adaŋa-emi afo akaŋade akaŋa ɔnɔ Abasi, kubebigi ndinɔ enye: koro mbon ndisine minemke enye esit: nɔ se afo akaŋade.

⁵Ɔfɔn nte etrede ndikaŋa, akan nte akaŋade, ndien etre ndinɔ.

⁶Kuyak inua fo esin obukidem fo anam idiɔk: kunyuŋ udɔhɔ ke iso isuŋtom, ete ke ekedi ndudue: ke didie ke Abasi ediyaresit ye uyo fo, ndien abiat se ubɔk fo anamde?

⁷Koro se idide ikpikpu onyuŋ odu ke uwak ndap ŋko: kpa ntre ŋko odu ke uwak ikɔ: edi bak Abasi.

⁸Afo ama okut nte efikde mme ubuene, enyuŋ eyutde ikpe ye se inende ke mme province, kuyik oruk ŋkpɔ ntem: koro kiet emi okoŋde akan edikoŋ ekpeme; ndien Ata Andikoŋ akan mmɔ.

⁹Edi udori iŋwaŋ ana ɔnɔ kpukpru: eda iŋwaŋ enam ŋkpɔ enɔ edidem.

¹⁰Owo eke amade silver iyuhɔke silver; ndien owo ekededi eke amade inyene idikwe utɔt; emi onyuŋ edi ikpikpu.

¹¹Ke ini ŋkpɔ ewakde, mmɔ eke ediade mmɔ enyuŋ ewak; ndien mme andinyene mmɔ ekut nso udori ke mibɔhɔke erise mmɔ ke enyin?

¹²Idap owo utom eniŋe, adiade esisit, onyuŋ adiade ediwak: edi uyuhɔ owo inyene iyakke enye ede idap.

¹³Enyene ata akamba idiɔk-ŋkpɔ eke ŋkokutde ke idak utin, kpa inyene eke enimde enɔ andinyene mmɔ tutu esobo enye.

¹⁴Ndien idiɔk nnama esin inyene emi etak; ndien enye obon eyen, edi baba ŋkpɔ kiet iduhe enye ke ubɔk.

¹⁵Kpa nte enye okotode eka esie ke idibi, kpa ntre ke enye edida iferi ɔnyɔŋ aka, kpasuk nte emi enye ekedide, ndien enye idibɔhɔ baba ŋkpɔ kiet ke ɔkpɔsɔŋ utom esie, eke enye akamade ke ubɔk aka.

¹⁶Emi ŋko onyuŋ edi ata akamba idiɔk-ŋkpɔ, emi enye edinyɔŋde kpasuk nte emi enye ekedide: ndien enye okut nso udori ke erinam ŋkpɔ mbɔ ofum?

¹⁷Ndien ŋko enye adia kpukpru usen esie ke ekim, onyuŋ okut ediwak iyaresit, ye udɔŋɔ, ye ifiopesit.

¹⁸Se ŋkpɔ emi ami nsede ke eti ŋkpɔ, ye ke ediye ŋkpɔ, kpa owo ndidia nnyuŋ ŋŋwɔŋ, nnyuŋ ŋkut se ifɔnde ke kpukpru utom esie, eke enye anamde ke idak utin, ke adaŋa ibat mme usen esie eke Abasi ɔnɔde enye: koro udeme esie edi oro.

¹⁹Ndien ŋko ama edi kpukpru owo emi Abasi ɔnɔde mmɔ ata ediwak inyene eti-eti, onyuŋ anamde mmɔ ekeme ndidia ke esit, nnyuŋ mbɔ udeme mmɔ, nnyuŋ ndat esit ke utom mmɔ: enɔ Abasi edi oro.

²⁰Koro enye mitihi usen uwem esie eti-eti: koro Abasi adade se idatde enye esit ɔbɔrɔ enye.