Read efik ECCLESIASTES 7 Bible Online

ECCLESIASTES 7 - efik bible

ECCLESIASTES 7

¹ETI enyiŋ ɔfɔn akan eti aran; kpa ntre ke usen mkpa owo akan usen emana owo.

²Ɔfɔn ndika ufɔk ntuaŋa, akan ndika ufɔk udia: koro oro edide utit kpukpru owo: ndien owo uwem eyekere ke esit.

³Mfuhɔ ɔfɔn akan imam: koro mfuhɔ iso anamde esit akabare ɔfɔn.

⁴Esit mbon eti-ibuot odu ke ufɔk ntuaŋa; edi esit owo ndisime odu ke ufɔk mbre.

⁵Ɔfɔn owo ndikop nduari owo eti ibuot, akan owo ndikop ikwɔ mbon ndisime.

⁶Koro nte ndak akprakde ke idak eso, kpa ntre ke imam owo ndisime etie. Emi ŋko edi ikpikpu.

⁷Koro ufik anamde enyene-ibuot owo akabare edi ndisime; enɔ onyuŋ abiat owo esit.

⁸Utit ŋkpɔ ɔfɔn akan eritɔŋɔ ŋkpɔ: ndien ime esit ɔfɔn akan mkponesit.

⁹Kuyak spirit fo ɔsɔp iyaresit: koro iyaresit atakde ke ikpanesit mbon ndisime.

¹⁰Kudɔhɔ ete, Nsinam eyo oko ɔfɔnde akan emi? Koro afo mudaha eti ibuot ubup ubaŋa ŋkpɔ emi.

¹¹Eti ibuot ɔfɔn akan akpa (eke owo adiade); akpan-akpan (ɔfɔn) ye mmɔ ekutde utin.

¹²Koro eti ibuot edide se ikpemede, inyene onyuŋ edi se ikpemede, edi ata ifiɔk ye eti ibuot eyenam mme andinyene enye edu uwem.

¹³Se ŋkpɔ emi Abasi anamde: koro anie ekeme ndineŋere se enye akwaŋde?

¹⁴Dat esit ke usen unen, nyuŋ kere ekikere ke usen nnanenyin: Abasi ama onyuŋ anam emi adian ye oro, man owo okukut baba ŋkpɔ kiet eke editienede enye edem.

¹⁵Mma ŋkere kpukpru ŋkpɔ emi ke ikpikpu mme usen mi; enyene eti owo eke esobode enye ke eti ido esie, onyuŋ enyene idiɔk owo eke ebigide uwem ke idiɔk ido esie.

¹⁶Kunim idem fo ke eti owo ukan: kunyuŋ unim idem fo ke enyene-ibuot ukaha: afo edinam didie abiara?

¹⁷Kunam idiɔk ŋkpɔ ukan, kunyuŋ udi ndisime owo: afo edinam didie akpa ke mikemke kaŋa ke ini fo?

¹⁸Ɔfɔn nte afo ɔsɔŋɔde omum emi; kunyuŋ usio ubɔk ke ŋkpɔ emi ufep: koro owo eke abakde Abasi eyewɔrɔ ke mme mmɔ emi kpukpru ɔbɔhɔ.

¹⁹Eti ibuot anam enyene-ibuot owo ɔsɔŋ akan mbɔŋ duop eke edude ke obio.

²⁰Koro baba eti owo kiet eke anamde eti ndien midiɔkke, iduhe ke ererimbot.

²¹Kunyuŋ unim ibuot ke kpukpru ikɔ eke etiŋde; mbak afo edikop ofin fo nte osuŋide fi:

²²koro esit fo ŋko ɔfiɔkde, ete ke afo ŋko ama onyuŋ osuŋi owo efen ediwak ini.

²³Mmada eti ibuot ndomo kpukpru ŋkpɔ emi nse: ndɔhɔ nte, Yak nnyene ibuot; edi eti ibuot oyom usuŋ ye ami.

²⁴Anie ekeme nditim ŋkut ŋkpɔ eke anade oyom usuŋ, onyuŋ ɔtuŋɔde eti-eti?

²⁵Ndien ami nda esit mi ŋkabare ndifiɔk, nnyuŋ nduŋɔ, nnyuŋ nyom eti ibuot ye asian, nnyuŋ mfiɔk idiɔk ido nte ke edi ndisime, ye ndisime nte ke edi idat:

²⁶ndien mmokut nte ŋwan eke esit esie edide iyire ye afia, eke ubɔk esie onyuŋ edide ŋkpɔkɔbi, ododoro akan mkpa: owo eke enemde Abasi esit eyebɔhɔ enye; enye (ŋwan) eyemum anam-idiɔk.

²⁷Ɔkwɔrɔ-ikɔ ɔdɔhɔ ntem, ete, Sese, mma ŋkut ŋkpɔ emi, ndian kiet kiet man ŋkut ibat:

²⁸eke ukpɔŋ mi osuk oyomde kaŋa edi ŋkwe: mma ŋkut erenowo kiet ke otu tɔsin; edi ŋkekwe baba ŋwan kiet ke otu mmɔ emi kpukpru.

²⁹Sese, mma ŋkut ŋkpɔ emi ikpɔŋ-ikpɔŋ, nte ke Abasi ama anam owo edinen; ndien mmɔ ema eyom ediwak idiɔk usuŋ.