Read efik ECCLESIASTES 8 Bible Online

ECCLESIASTES 8 - efik bible

ECCLESIASTES 8

¹ANIE ebiet enyene-ibuot owo? Anie onyuŋ ɔfiɔk usuŋ nte asiakde ŋkpɔ? eti ibuot aŋwaŋa owo iso, ndien usɔŋ iso esie ɔkpuhɔre.

²Ami (ndɔhɔ nte): Nim uyo edidem, baŋa uŋwɔŋɔ Abasi!

³Kuwara ndidaha enye ke iso: kukɔbɔ ŋkpɔ eke ɔdiɔkde: koro enye eyemen kpukpru se enye amade.

⁴Ke ɔtɔ uyo edidem odude, odudu odu do: ndien anie ekeme ndidɔhɔ enye, ete, Afo anam nso?

⁵Owo eke onimde ewuhɔ idikwe baba idiɔk ŋkpɔ kiet: enyene-ibuot owo omonyuŋ ɔfiɔk ini ye edinen ido.

⁶Koro kpukpru uduak enyenede (ekem) ini, ye ido eke enende; koro ukut owo okponde owo ke idem.

⁷Koro baba owo kiet mifiɔkke se ididide: koro anie ekeme ndisian enye ini nte enye edidide?

⁸Baba owo kiet idige etubom spirit, eke edimumde spirit akama; baba owo kiet inyuŋ idige etubom ke usen mkpa: inyuŋ iyakke baba owo kiet ɔkpɔŋ ekɔŋ emi; idiɔk ido idinyuŋ inamke mme anditiene enye ebɔhɔ.

⁹Ŋkokut kpukpru ŋkpɔ emi, nnyuŋ nnim ibuot ke kpukpru ŋkpɔ emi enamde ke idak utin: ini odu eke owo edide etubom owo, onyuŋ abiatde idem esie.

¹⁰Ndien ke ini ŋkpɔ etiede ntre, nnyuŋ ŋkut nte mme idiɔk owo ebuhɔde, ndien edi, enyuŋ edaŋa ke edisana ebiet; ndien edifre mmɔ ke obio eke mmɔ ekenamde ntre. Emi onyuŋ edi ikpikpu.

¹¹Koro miwarake ndinɔ idiɔk owo ufen, oro esin nditɔ owo esɔŋ esit ke idem mmɔ enam idiɔk.

¹²Yak edi nte idiɔk owo anamde idiɔk ido utim ikikie, onyuŋ ebigi anyan uwem, edi ami mmotim mfiɔk nte ke edifɔn ye mmɔ eke ebakde Abasi, eke ebakde enye ke iso:

¹³edi idifɔnke fɔn inɔ idiɔk owo edi enye eyemuhɔ uwem nte ukpɔŋ: koro enye mibakke ke iso Abasi.

¹⁴Enyene ikpikpu ŋkpɔ kiet eke enamde ke ererimbot; emi enyenede nti owo eke ŋkpɔ otibede ɔnɔ mmɔ nte ekemde ke ido mme idiɔk owo; ndien enyene mme idiɔk owo eke ŋkpɔ otibede ɔnɔ mmɔ nte ekemde ke ido nti owo: ndɔhɔ nte, emi ŋko onyuŋ edi ikpikpu.

¹⁵Ndien ami ntoro idara, koro owo minyeneke eti ŋkpɔ ke idak utin, ke mibɔhɔke ndidia ŋkpɔ, nnyuŋ ŋŋwɔŋ, nnyuŋ ndara: ndien edi emi edidiana ye enye ke utom esie, ke ofuri uwem esie emi Abasi ɔnɔde enye ke idak utin.

¹⁶Ke adaŋemi nnimde ibuot mi ke ndifiɔk mbufiɔk, ndinyuŋ ŋkut utom eke enamde ke ererimbot: koro owo minyuŋ idehe idap ke enyin esie, ke uwemeyo ye ke okoneyo:

¹⁷ndien ŋkut kpukpru se Abasi anamde, nte ke owo ikemeke ndifiɔk se enamde ke idak utin: koro okposuk edi nte owo ediŋwanade nditim nnyuŋɔ, enye idikwe: ndien idem ɔfiɔkŋkpɔ owo ama ekere ete ke imɔ idifiɔk, enye idikemeke ndikut.