Read efik IKWƆ SOLOMON 1 Bible Online

IKWƆ SOLOMON 1 - efik bible

IKWƆ SOLOMON 1

¹ATA akpan ikwɔ emi enyene Solomon.

²Yak enye ada ntim-inua esie otim mi inua: koro ima fo ɔfɔnde akan wine.

³Eti aran fo enem utebe; enyiŋ fo edi aran eke eŋwaŋade; mmɔdo nditɔ-iban emade fi.

⁴Dudi mi, yak nnyin ibine fi. Edidem ama ada mi oduk ke ubet esie: nnyin iyenem esit, inyuŋ idara fi, iyetoro ima fo ikan wine: mmɔ ema fi nte enende.

⁵O nditɔ-iban Jerusalem, ami mmebire, edi mmeye, nte mme tent Kedar, nte ɔfɔŋ tent Solomon.

⁶Mbufo ekuse mi ke ndek, koro mbirede, koro eyo ama ɔfɔp mi: nditɔ-eka mi ekeyat esit ye ami: mmɔ ekenim mi ete ŋkpeme iŋwaŋ-vine (mmɔ): ŋkekpemeke iŋwaŋ-vine okimmɔ.

⁷Afo emi esit mi amade, wut mi ebiet eke afo edibɔkde ufene fo, eke afo edinamde mmɔ esuhɔre ena ke ufɔt uwemeyo: koro ndinam didie ntie nte owo eke asaŋade nyoŋ ke ɔtɔ ufene mme nsaŋa fo?

⁸Edieke afo mufiɔkke ke idem fo, afo emi eyede akan kpukpru iban, wɔrɔ ke idem fo saŋa ke mme ikpat ufene, nyuŋ bɔk nditɔ ebot fo, kpere ebiet iduŋ mme ɔbɔk-ufene.

⁹Mmodomo fi ye uman-horse mi ke chariot Pharaoh, O ŋwan ima mi;

¹⁰mfuk fo emeye ke uyɔ pearl, itɔŋ fo omonyuŋ eye ke ŋkpɔkɔbi gold.

¹¹Nnyin iyenam uyɔ gold ye ŋkɔp silver inɔ fi.

¹²Adaŋa ini nte edidem odude ke itie (udia) esie, nard mi ɔnɔ ufuɔŋ esie.

¹³Mmese ama mi ke ekpat myrrh; eyebigi mi ke ufɔt eba.

¹⁴Mmese ama mi ke etuek flower cypress ke iŋwaŋ-vine En-gedi.

¹⁵Sese, O ŋwan ima mi, afo emeye: sese, afo emeye; enyin fo edi ibiom.

¹⁶Sese, O ama mi, afo emeye; omonyuŋ enen ŋko: bed nnyin omonyuŋ edi awawa;

¹⁷obukpɔk ufɔk nnyin edi cedar, ɔkɔm nnyin onyuŋ edi cypress.