Read efik IKWƆ SOLOMON 2 Bible Online

IKWƆ SOLOMON 2 - efik bible

IKWƆ SOLOMON 2

¹AMI ndi rose a Sharon, ye lily mme itihere.

²Nte lily ke otu ŋkukim, kpa ntre ke ŋwan ima mi etie ke otu nditɔ-iban.

³Nte apple ke otu eto akai, kpa ntre ke ama mi etie ke otu mkparawa. Mmama nditie ke mfut esie, mfri esie onyuŋ eniŋe mi ke nsiŋ.

⁴Enye ada mi oduk ke ufɔk wine, ndien banner esie emi odude mi ke enyɔŋ, edi ima.

⁵Mbufo esɔŋɔ mi idem ke ebok grape, esuk mi idem ke apple, koro ndɔŋɔde ima.

⁶Ubɔk ufien esie odu mi ke idak ibuot, nnasia esie onyuŋ afat mi.

⁷Mmowuk mbufo, O nditɔ-iban Jerusalem, ma edop ye ebet ikɔt nte mbufo ekudemere, ekudedemere ama mi, tutu enye ama.

⁸Uyo ama mi! sese, edi enye ke edi, ke ɔfrɔ ke ikpɔ obot, ke ɔfrɔ akaŋa ŋkpri obot.

⁹Ama mi ebiet edop, ebiet eyen ebet. Sese, edi enye ke ada ke edem ibibene nnyin, ke ada ke window ese, ke ada ke lattice ɔnyuŋɔ.

¹⁰Ama mi ɔbɔrɔ, onyuŋ ɔdɔhɔ mi, ete, Daha ke enyɔŋ, ima mi, ediye ŋwan mi, di:

¹¹koro, sese, ukwɔ emebe, edim omokure, emebiere;

¹²Ekut mme flower ke isɔŋ; ini ikwɔ emedi, enyuŋ ekop uyo turtle ke edem nnyin;

¹³eto fig ke anam ŋkim-ŋkim mfri esie adat, mme vine etop mfri, esioŋo ufuɔŋ. Daha ke enyɔŋ, ima mi, ediye ŋwan mi, di.

¹⁴O ibiom mi, ke ndudu mme itiat, ke ndibe ebiet ŋkokoŋo itiat, wut mi iso fo, nam ŋkop uyo fo: koro uyo fo emenem, iso fo omonyuŋ eye.

¹⁵Mbufo emum mme jackal enɔ nnyin, ŋkpri jackal emi ebiatde iŋwaŋ-vine: koro mme vine nnyin emetop mfri.

¹⁶Ama mi edi okim, ami nnyuŋ ndi esie: enye ɔbɔk ufene esie ke otu mme lily.

¹⁷O ama mi, fiak edem, tutu eyo ɔsuhɔ, mme ukpɔŋ enyuŋ ewɔrɔ nnyan: ndien biet edop ye eyen ebet ke ikpɔ obot Bether.