Read efik IKWƆ SOLOMON 6 Bible Online

IKWƆ SOLOMON 6 - efik bible

IKWƆ SOLOMON 6

¹AMA fo amaka mmɔŋ, afo emi eyede akan kpukpru iban? Ama fo amakabare aka mmɔŋ, man nnyin itiene fi iyom enye?

²Ama mi ɔmɔsuhɔre aka ke iŋwaŋ esie, ye ke iŋwaŋ balsam, ndibɔk ufene esie ke mme iŋwaŋ, nnyuŋ ŋkibi mme lily.

³Ami mmenyene ama mi, ama mi onyuŋ edi okimmɔ: enye ɔbɔk ufene esie ke otu mme lily.

⁴Ŋwan ima mi, afo emeye nte Tirzah, emenyene uyai nte Jerusalem, onyuŋ enyene owo ndik nte mbon-ekɔŋ ekama banner.

⁵Kabare enyin fo, kuse mi, koro ekande mi: idet fo ebiet udim ebot eke enade ke Gilead.

⁶Edet fo ebiet udim erɔŋ eke etode ke uyere mmɔŋ edɔk, eke kpukpru mmɔ edide amaniba, baba kiet eke ananade eyen inyuŋ iduhe ke otu mmɔ.

⁷Ɔkpɔ-iso fo ebiet ubak pomegranate ke esit ufuhɔ-iso fo.

⁸Mbɔŋ-iban ata edu mi, ye iban-esa anaŋ, ye nditɔ-iban eke mibatke.

⁹Edi ibiom mi, ata ediye ŋwan mi, edi kiet; enye edi ikpɔŋ eyen-eka esie, ye eyen ima andiman enye. Nditɔ-iban ekut enye, ndien ekɔm enye, mbɔŋ-iban ye iban-esa ekut enye, ndien etoro enye.

¹⁰Anie owo edi emi esierede nte eyo, ediye nte ɔfiɔŋ, edisem nte utin, onyuŋ enyene ndik nte mbon-ekɔŋ ekama banner?

¹¹Ŋkɔsuhɔre ŋka ke iŋwaŋ isip, ndise awawa ikɔŋ ke mben idim, ndise mme mme vine esehe, mme mme pomegranate efiari ikɔŋ.

¹²Mfiɔkke: esit mi esin mi ke mme chariot Ammi-nadib.

¹³Fiak edem, fiak edem, O Shulammite, fiak edem, fiak edem, man nnyin ise fi. Ke didie ke mbufo edise Shulammite, nte ŋkpɔ eke etiede nte unek udim iba?