Read efik ISAIAH 1 Bible Online

ISAIAH 1 - efik bible

ISAIAH 1

¹ŊKUKUT Isaiah eyen Amoz emi enye okokutde abaŋa Judah ye Jerusalem, ke eyo Uzziah, ye Jotham, ye Ahaz, ye Hezekiah, ndidem Judah.

²Mbufo enyɔŋ ekop, isɔŋ nyuŋ kpaŋ utɔŋ: koro Jehovah ɔdɔhɔde: Mbɔk, nnyuŋ ŋkɔ nditɔ, ndien mmɔ emekabare esɔŋ ibuot ye ami.

³Enaŋ ɔfiɔk andinyene enye, ass onyuŋ ɔfiɔk ebiet eke ete esie onimde udia ɔnɔ enye: Israel ifiɔkke, ikɔt mi ikereke.

⁴Ɔdiɔk ɔnɔ idut emi anamde idiɔk, mbio emi ebiomde idiɔk ido, ubon mme oburobut owo, nditɔ emi ekabarede ediɔk! Mmɔ emekpɔŋ Jehovah, emesin Edisana Abasi Israel ke ndek, emekabare efiak edem.

⁵Edinam didie esuk emia mbufo? Mbufo edediɔŋ ekabare ekpɔŋ mi: ofuri ibuot ke ɔdɔŋɔ, ofuri esit ke onyuŋ akpa.

⁶Ɔtɔŋɔde ke ikpat ukot tutu osim ke ibuot, baba nsɔŋidem iduhe ke esit; ke edi unan ye ŋkukip, ye obufa ufen: ifikke mmɔ, inyuŋ ibɔpke, inyuŋ iyetke mmɔ aran inam emem.

⁷Esobo isɔŋ mbufo, mme obio mbufo eta ikaŋ; ama edi obot iŋwaŋ mbufo, isen owo ke edia enye ke iso mbufo, enyuŋ esobo enye nte ŋkpɔ eke isen owo ebiatde.

⁸Ndien adiaha Zion osuk nte efe ke iŋwaŋ-vine, nte ataya ke iŋwaŋ-ikpan, nte obio eke ekukde.

⁹Ke mikpedige Jehovah mme udim ɔsuhɔ ata ekpri nsuhɔ ɔnɔ nnyin, nnyin ikpekabare itie nte Sodom, ibiet Gomorrah.

¹⁰Mbufo mme ebierikpe Sodom, ekop uyo Jehovah; mbio Gomorrah, ekpaŋ utɔŋ ke ibet Abasi nnyin.

¹¹Jehovah ɔdɔhɔ, ete, Uwak uwa mbufo ɔfɔn mi nso? Mmɔyuhɔ edifɔp uwa okukim, ye ikpɔŋ edisehe unam; iyip enaŋ, ye eke nditɔ erɔŋ, ye eke okpo ebot inyuŋ inemke mi esit.

¹²Ke ini mbufo edide ndiwut mi idem mbufo, anie oyom emi ke ubɔk mbufo, ete edidigi okure mi?

¹³Mbufo ekuda aba uwa nsu edi; mmese incense ke ŋkpɔ mbubiam; kpa ntre ke nse ɔfiɔŋ, ye sabbath, ye erikot esop: ŋkwe nte nyɔde idiɔk ido ye ederi.

¹⁴Ukpɔŋ mi asasua mbufa ɔfiɔŋ mbufo, ye ini esop mbufo: mmɔ emekabare edobi mi; mmobiom mmɔ tutu ŋkpa mba.

¹⁵Ndien ke ini mbufo emenerede ubɔk mbufo, ndip mbufo enyin mi: ndien ŋko ke ini mbufo ewakde ndibɔŋ akam, ami ŋkopke: iyip ɔmɔyɔhɔ mbufo ke ubɔk.

¹⁶Mbufo eyet idem enam esana; emen mme idiɔk ido mbufo ke enyin mi efep; etre ndinam idiɔk; ekpep ndinam eti:

¹⁷eyom se inende, eneŋere se ikwaŋade, ekpe edinen ikpe enɔ eyen-akpa, eda ye ebe-akpa ke ikpe.

¹⁸Jehovah ɔdɔhɔ ete, Mbufo edi ndien, nnyin ikpe ikɔ: mme idiɔk ido mbufo ekpetie nte iduot, eyefia nte snow; ekpeyibe nte crimson, eyekabare nte idet erɔŋ.

¹⁹Mbufo ema enyime, enyuŋ ekop, eyedia ufɔn isɔŋ;

²⁰edi ema esin, enyuŋ esɔŋ ibuot, ofut eyedia mbufo: koro edi inua Jehovah ɔdɔhɔ.

²¹Anam didie obio akpanikɔ akabare edi akpara! se inende ɔkɔyɔhɔ ke esit; eti ido ɔkɔduŋ ke esit; edi ke emi mme owot-owo.

²²Silver fo amakabare edi ifuɔ, wine fo amakabare edi mmɔŋ.

²³Mbɔŋ fo edi mbon nsɔŋ-ibuot, ye nsaŋa inɔ: kpukpru mmɔ esuk emama enɔ, enyuŋ ebine utip: mmɔ ikpehe ikpe eyen akpa, ikɔ ebe-akpa inyuŋ isimke mmɔ.

²⁴Oro esin Ɔbɔn Jehovah mme udim, Ɔkpɔsɔŋ Abasi Israel ɔdɔhɔ, ete, Ah, nyebiomore mme asua mi ke idem mi mfep, nnyuŋ nsio usiene ye mbon utɔk mi:

²⁵ndien nyeda ubɔk mi mfiak ntiene fi, nnyuŋ nuk ifuɔ fo mfep nnam asana, nnyuŋ ndianare kpukpru ŋket fo mfep:

²⁶nnyuŋ nnam mme ebierikpe fo efiak kpa nte ke akpa, ye mbon item fo, kpa nte ke eritɔŋɔ: ndien ke ŋkpɔ emi ebede, eyekot fi, ete, Obio eti ido, obio akpanikɔ.

²⁷Eyeda ikpe efak Zion, enyuŋ eda eti ido efak nditɔ esie emi ekabarede.

²⁸Edi eyesobo mme oburobut owo ye mme anam idiɔk ini kiet, ndien mmɔ eke ekpɔŋde Jehovah eyetak.

²⁹Koro mmɔ eyeda but ebaŋa ofriyo emi enemde mbufo esit; mbufo eyenyuŋ ekop esuene ebaŋa iŋ-waŋ esa emi mbufo emekde.

³⁰Koro mbufo eyebiet ofriyo emi ikɔŋ esie ekeŋede, ebiet iŋwaŋ eke mmɔŋ miduhe ke esit.

³¹Ndien ŋkpɔsɔŋ owo eyekabare edi mfube, ŋkpɔ eke enye anamde eyenyuŋ edi ebua ikaŋ, ndien mmɔ mbiba eyeta ikaŋ, baba owo kiet eke onimede idinyuŋ iduhe.