Read efik ISAIAH 13 Bible Online

ISAIAH 13 - efik bible

ISAIAH 13

¹UYO Abasi emi ke Isaiah eyen Amoz okokut abaŋa Babylon.

²Mbufo emen banner ke enyɔŋ iferi obot, emenere uyo enɔ mmɔ, efuŋ ubɔk, man mmɔ eduk ke inua-otop mbɔŋ.

³Ami mmowuk mmɔ emi ndianarede nnim nnɔ idem mi, mmonyuŋ ŋkot mbon uko mi edi edinam iyaresit mi, kpa ikɔt mi emi enyenede iwok ye iseri.

⁴Uyom ediwak owo ke ikpɔ obot! ebiet akwa otu owo! uyom ndutime mme idut, ke ebono: Jehovah mme udim ke otim udim ekɔŋ.

⁵Ke eto ke anyan idut, ke utit enyɔŋ edi, Jehovah ye ŋkpɔ ikpahesit esiemɔ, ete isobo ofuri isɔŋ.

⁶Mbufo etuaŋa; koro usen Jehovah emekpere: ɔmɔŋ edi nte nsobo eke otode Ata Ɔkpɔsɔŋ.

⁷Mmɔdo kpukpru ubɔk ememde, esit kpukpru owo enyuŋ eyemere: nsia onyuŋ oyomo mmɔ;

⁸ubiak ye ndutuhɔ emum mmɔ; mmɔ emiaŋa nte ŋwan uman; kiet ese kiet eyik; iso mmɔ esak nte ikaŋ.

⁹Sese, usen Jehovah ɔmɔŋ edi, mbɔm iduhe, enye akpahesit, iyaresit asak nte ikaŋ, man onim isɔŋ ke ŋwure; ndien enye eyesobo mme idiɔk owo mmɔ efep ke esit.

¹⁰Koro mme ntantafiɔŋ enyɔŋ ye mme constellation midiyamake: utin eyekim ke ini enye ɔwɔrɔde, ɔfiɔŋ idinyuŋ iyakke uŋwana esie ayama.

¹¹Ndien nyeda ufen ntiene ererimbot mbaŋa idiɔk ido mmɔ, ntiene mme idiɔk owo mbaŋa mme ukwaŋ-ŋkpɔ mmɔ; ndien nyenam iseri mme ɔsɔŋ-enyin etre, nnyuŋ nsuhɔre mme ntaŋidem mbon afai.

¹²Nyesin owo ɔsɔŋ urua akan gold, nsin owo akan gold Ophir.

¹³Mmɔdo nyesin ikpa-enyɔŋ enyek, eyenyuŋ enyeŋe isɔŋ esio ke ebiet esie efep, ke iyaresit Jehovah mme udim, ye ke usen ikaŋ iyaresit esie.

¹⁴Ndien ama ekem, nte ebet eke ebinede, ye nte erɔŋ eke owo mibonke: kpukpru owo eyekabare eka obio mmɔ, kpukpru owo eyenyuŋ efeŋe eka isɔŋ mmɔ.

¹⁵Eyekim kpukpru owo eke mmɔ ekutde, ndien kpukpru owo eke mmɔ emumde eyeduɔŋɔ ke ofut.

¹⁶Eyeyibi nditɔ-ɔwɔŋ mmɔ ke iso mmɔ ŋko; eyebume ufɔk mmɔ, enyuŋ ebiat iban mmɔ.

¹⁷Sese, mmɔŋ ndemere mme Mede nnɔ mmɔ, ndien mmɔ idikereke silver; gold idinyuŋ inemke mmɔ esit.

¹⁸Ndien utiga eyenuak nditɔ-iren mbai-mbai; mmɔ idituaha mfri idibi mbɔm; enyin mmɔ idituaha nditɔwɔŋ mbɔm.

¹⁹Ndien Babylon, uyai mme idut, mbana ye ŋkpɔ iseri mme Chaldee, eyebiet nsobo oro Abasi okosobode Sodom ye Gomorrah.

²⁰Owo iditiehe ke esit tutu amama, idinyuŋ iduŋke ke esit ke ofuri emana: nditɔ Arabia idinyuŋ iwukke tent ke esit: mme ɔbɔk-ufene idinyuŋ iyakke ufene mmɔ ena do.

²¹Edi mme unam ikɔt eyesuhɔre ena do; ikurikut eyeyɔhɔ ke mme ufɔk mmɔ; nditɔ-iban mme ostrich eyenyuŋ eduŋ do, odusu ebot eyenyuŋ enek do.

²²Ndien mme wolf eyetuaŋa ke ikpɔ ufɔk esie; mme jackal eyetuaŋa ke mme temple inemesit: ndien ini esie emekpere ndidi, usen esie idinyuŋ ibigike.