Read efik ISAIAH 19 Bible Online

ISAIAH 19 - efik bible

ISAIAH 19

¹UYO Abasi emi abaŋa Egypt. Sese, Jehovah ke odoro ke obubit enyɔŋ, awara oduk ke Egypt: ndien mme ibɔk Egypt enyek idem ke iso esie, esit Egypt onyuŋ akpa enye ke idem.

²Ndien nyedemere Egypt aŋwana ye Egypt: ndien owo eyeŋwana ye eyen-ete esie, owo ye mbɔhɔ-iduŋ esie; obio ye obio, idut ye idut.

³Ndien eyeŋwaŋa Egypt spirit esie ke idem efep; nyeyuŋ mmen uduak esie nsin ke idibi: ndien mmɔ eyebine mme ibɔk, ye mbia-inuen, ye mme nsaŋa ekpo, ye mbia-idiɔŋ.

⁴Ndien nyeda Egypt nsin ke ubɔk ɔsɔŋ-ido ete; ɔsɔŋ-ubɔk edidem eyenyuŋ akan mmɔ; emi edi uyo Ɔbɔŋ Jehovah mme udim.

⁵Ndien mmɔŋ eyesat ke inyaŋ, akpa mmɔŋ eyenyuŋ asat okure.

⁶Mme akpa mmɔŋ eyenyuŋ etebe; mme akpa mmɔŋ Egypt eyekabare ukpɔk enyuŋ esat: nnyanyaŋa ye mkpɔŋ-isɔŋ ekpaŋa.

⁷Mme iŋwaŋ isɔŋ inyaŋ ye ke mben akpa, ye kpukpru se etɔde ke isɔŋ inyaŋ eyesat, eyesuana, ndien ididuhe aba.

⁸Ndien mme ɔkɔ-iyak eyetuaŋa, kpukpru mmɔ eke esinde uwam ke akpa mmɔŋ eyetuaŋa, mmɔ eke eduɔkde iyire ke enyɔŋ mmɔŋ eyenyuŋ etie mba-mba.

⁹Ndien but eyenam mme anam ata eti flax, ye mmɔ eke edɔkde afia ɔfɔŋ.

¹⁰Ndien mme adaha obio emenuaha; esit abiak kpukpru mmɔ eke enamde utom ke okuk.

¹¹Mbɔŋ Zoan ekabare edi ata ndisime, ama edi mme ɔfiɔkŋkpɔ owo ke otu mme ɔnɔ-item Pharaoh, mme item mmɔ etie ndisime ndisime: mbufo edinam didie edɔhɔ Pharaoh, ete, Ami ndi eyen mbon eti ibuot, eyen ndidem eyo oko? Mmɔ edu mmɔŋ?

¹²Enye mbon eti ibuot fo? Yak mmɔ esian fi ndien, enyuŋ efiɔk se Jehovah mme udim aduakde abaŋa Egypt.

¹³Mbɔŋ Zoan ke edama; ke ebiaŋa mbɔŋ Noph; ikpɔ owo mme esien Egypt enyuŋ enam enye oyo.

¹⁴Jehovah amada spirit ndutime abuak enye ke esit: ndien mmɔ enam Egypt oyo ke kpukpru se enye anamde, kpa nte owo mmin asaŋade oyo ke ikpɔhi esie.

¹⁵Ndien Egypt idikwe aba utom eke ibuot, ye isim, ye mkpabak, ye mkpɔŋ-isɔŋ edinamde.

¹⁶Ke usen oro Egypt eyebiet iban: eyenyuŋ enyek, onyuŋ edikhe abaŋa mfuŋ-ubɔk Jehovah mme udim emi Enye ofuŋde ese enye.

¹⁷Ndien isɔŋ Judah eyedi se Egypt edidikhede, ndik eyenam kpukpru owo eke edade mbuk esie etiŋ enɔ enye, oto ke uduak Jehovah mme udim, emi enye aduakde abaŋa enye.

¹⁸Ke ini oro obio ition eke edisemde usem Canaan, enyuŋ eŋwɔŋɔde enɔ Jehovah mme udim, eyedu ke isɔŋ Egypt; kiet eyenyuŋ ekere obio nsobo.

¹⁹Ke usen oro, itie-uwa eyeda ɔnɔ Jehovah ke ufɔt isɔŋ Egypt, adaha eyenyuŋ ada ɔnɔ Jehovah mme udim ke edem adaŋa esie.

²⁰Ndien enye eyeda nte ŋkpɔ idiɔŋɔ ye ntiense ɔnɔ Jehovah mme udim ke isɔŋ Egypt: koro mmɔ esemede enɔ Jehovah ebaŋa mmɔ eke etukde mmɔ, ndien enye eyedɔŋ andinyaŋa eke edide akamba, onyuŋ anyaŋade mmɔ.

²¹Ndien Jehovah eyenam Egypt efiɔk enye, nditɔ Egypt eyenyuŋ efiɔk Jehovah ke usen oro, ndien mmɔ eyewa uwa emem ye inuak-udia; enyuŋ ekaŋa akaŋa enɔ Jehovah, enyuŋ enam enye.

²²Jehovah eyenyuŋ amia Egypt; amia, onyuŋ ɔkɔk: ndien mmɔ eyekabare etiene Jehovah, ndien enye eyekop ɔnɔ mmɔ, onyuŋ ɔkɔk mmɔ.

²³Ke usen oro ɔkpɔ-usuŋ eyetɔŋɔ ke Egypt ana tutu osim ke Assyria, ndien Assyria eyeduk ke Egypt, Egypt eyenyuŋ oduk ke Assyria, ndien Egypt ye Assyria eyenam ŋkpɔ (Jehovah).

²⁴Ke usen oro Israel eyenam ita ye Egypt ye Assyria, edi ŋkpɔ eke ɔdiɔŋde owo ke ufɔt ererimbot:

²⁵emi Jehovah mme udim ɔdiɔŋɔde, ete, Ɔfɔn ɔnɔ ikɔt mi Egypt, ye Assyria emi ubɔk mi akanamde, ye Israel udeme mi.