Read efik ISAIAH 26 Bible Online

ISAIAH 26 - efik bible

ISAIAH 26

¹NDIEN ke usen oro mmɔ eyekwɔ ikwɔ emi ke isɔŋ Judah, ete, Nnyin imenyene ɔkpɔsɔŋ obio; Abasi onim erinyaŋa ke ibibene ye ɔkɔ ekɔŋ.

²Mbufo eberede mme itim, man edinen idut emi onimde akpanikɔ oduk.

³Ama edi esit eke eberede (Fi), afo eyekpeme enye ke emem emem: koro enye ɔbuɔtde idem esie ye afo.

⁴Mbufo ebuɔt idem ye Jehovah ke nsinsi; koro Jah Jehovah edide nsinsi itiat:

⁵koro enye ɔmɔsuhɔre mmɔ emi eduŋde ke edikoŋ ebiet, kpa edikoŋ obio: enye eyeduɔk enye; eyeduɔk enye ke isɔŋ; eyenam enye ana ke ntan.

⁶Ukot eyedigi enye, kpa ukot mbon ukut, ye ikpat mme ubuene.

⁷Usuŋ edinen owo enenen: Afo Edinen eyediɔŋ ɔkpɔ-usuŋ edinen owo.

⁸Nnyin ŋko imebet fi, O Jehovah, ke usuŋ mme ikpe fo; enyiŋ fo, ye se edade eti fi, edɔŋ nnyin ke ukpɔŋ.

⁹Afo ɔdɔŋ mi ke ukpɔŋ ke okoneyo; nyeda spirit mi ŋko emi odude mi ke esit mbak nyom fi: koro mme andiduŋ ererimbot ekpekpep se inende, ke ini mme ikpe fo enamde ekondo.

¹⁰Ɔkpɔfɔn ido ye idiɔk owo, enye idikpepke se inende; enye eyenam ukwaŋ-ŋkpɔ ke isɔŋ mmɔ eke enende, idinyuŋ ikwe ubom Jehovah.

¹¹Jehovah, afo ememenere ubɔk fo; mmɔ ikwe enye; mmɔ eyekut, enyuŋ etimere ke ufup emi afo ofibede ɔnɔ ikɔt fo; idem ikaŋ eyeta mme asua fo.

¹²O Jehovah, afo eyenɔ nnyin emem: koro afo amanam idem kpukpru utom nnyin ɔnɔ nnyin.

¹³O Jehovah Abasi nnyin, mbɔŋ efen ema etiene fi enyene nnyin: edi nnyin iyetoro fi, kpa enyiŋ fo ikpɔŋ-ikpɔŋ.

¹⁴Mmɔ eke ekpaŋade ididuhe uwem: mmɔ eke edide ekpo idisetke: mmɔdo afo ɔnɔde mmɔ ufen, onyuŋ asuande mmɔ, onyuŋ osobode kpukpru se edade eti mmɔ.

¹⁵Afo anam idut ɔtɔt, O Jehovah, anam idut ɔtɔt; ada ukpono; anam kpukpru adaŋa isɔŋ etara.

¹⁶O Jehovah, mmɔ ebine fi ke ini ukut, esioro uyo mkpe-ubɔk: ufen fo odoro mmɔ.

¹⁷Kpa nte ŋwan idibi eke oyomde ndiman, okopde ubiak onyuŋ ofioride ke ndutuhɔ esie; kpa ntre ke nnyin iketie ke ini nnyin mikoduhe ke iso fo, O Jehovah.

¹⁸Nnyin ikeyomo, uman okotuk nnyin, etie nte nnyin imande ofum; nnyin ikekwe nte inyaŋade isɔŋ; mme andiduŋ ererimbot inyuŋ imanake.

¹⁹Mme akpa-mkpa fo eyedu uwem, mme okpo mi eyebuhɔre. Mbufo emi eduŋde ke ntan edemere, ekwɔ: koro mbara ikɔŋ edide mbara fo, ndien isɔŋ eyeman mme ekpo.

²⁰Ikɔt mi, mbufo eka ekeduk ke mme ubet mbufo, enyuŋ eberi itim mbufo ebaha idem mbufo: edibe ini esisit ntem, tutu ikpahesit ebe.

²¹Koro, sese, Jehovah ɔmɔŋ oto ke ebiet esiemɔ ɔwɔrɔ, ete inɔ ererimbot ufen ibaŋa mme idiɔk ido mmɔ: ndien isɔŋ eyeyarare iyip esie, idinyuŋ ifukke aba nditɔ esie emi ekpaŋade afai.