Read efik ISAIAH 28 Bible Online

ISAIAH 28 - efik bible

ISAIAH 28

¹IFƆNKE fɔn inɔ edikoŋ anyanya mbon mmin Ephraim, ye ediyemere ikɔŋ ediye mbana esie emi odorode ke ibuot eti itihere isɔŋ mmɔ eke wine amiade.

²Sese, Ɔbɔŋ emenyene ŋkpɔ eke ɔsɔŋde sɔŋ, ebiet edim-itiat ye oyobio nsobo, ebiet ɔkpɔsɔŋ mmɔŋ edim eke ɔtɔde, enye ada ubɔk ɔduɔk enye ke isɔŋ.

³Eyeda ukot edigi edikoŋ anyanya mbon mmin Ephraim.

⁴Ndien ediyemere flower ediye mbana esie emi odorode ke ibuot eti itihere isɔŋ esie, eyebiet ŋwara-ndat fig ke ini utet mika-ikemke kaŋa: emi andise okutde, ndien ke osuk odude ke ubɔk esie, emen enye adia.

⁵Ke usen oro Jehovah mme udim eyekebare edi diadem uyai, ye anyanya ubɔŋ ikɔt esie eke esuhɔde;

⁶onyuŋ edi spirit ikpe mmɔ eke etiede ke itie ikpe, onyuŋ edi odudu mmɔ eke ebinde ekɔŋ efep ke inua-otop.

⁷Edi wine esin kpa mme mmɔ emi ŋko edue, mmin onyuŋ anam mmɔ etun usuŋ; mmin esin oku ye prophet edue, wine emen mmɔ esin ke idibi, mmin anam mmɔ etun usuŋ; mmɔ edue ke ŋkukut, eteŋ ke itie ikpe.

⁸Koro ikpɔhi ye ndek eyɔhɔde kpukpru mme okpokoro, baba ebiet iduhe.

⁹“Enye edikpep anie ifiɔk? Anie ŋko ke enye edisian se enye okopde? Mmɔ eke edahade ke mmɔŋ-eba? mmɔ eke mmɔ ekebɔde ke eba?

¹⁰Koro (ekɔtde) ibet ke ibet, ibet ke ibet; ewuhɔ ke ewuhɔ, ewuhɔ ke ewuhɔ; mi esisit, do esisit.”

¹¹Koro enye edidade mkpɔk-inua ekek ye edeme efen, ɔdɔhɔ ye mbio emi;

¹²emi enye ɔkɔdɔhɔde ye mmɔ, ete, Emi edi nduɔk-odudu, mbufo eyak mbon mba eduɔk odudu; emi onyuŋ edi nsukidem: edi mmɔ inyimeke ndikop.

¹³Ndien ikɔ Jehovah odu ke otu mmɔ, ibet ɔkɔrɔ ke ibet, ibet ke ibet, ewuhɔ ke ewuhɔ, ewuhɔ ke ewuhɔ; mi esisit, do esisit; kpaŋ mmɔ ekpeka, ekpenyuŋ eduɔ edem-edem, enyuŋ enuaha, enyuŋ esike, enyuŋ emum (ke afia).

¹⁴Ekop ndien uyo Jehovah, mbufo mbio nsahi, mbɔŋ mbio emi edude ke Jerusalem.

¹⁵Koro mbufo edɔhɔde, ete, Nnyin imediomi ediomi ye mkpa, inyuŋ isobo esop ye obio ekpo; ke ini ikpa ebede ofuk, idisimke nnyin: koro nnyin inimke nsu ke ebiet ubɔhɔ nnyin, inyuŋ idibede ke abiaŋa.

¹⁶Mmɔdo ntem ke Ɔbɔŋ Jehovah ɔdɔhɔ, ete, Sese, ami mmonim itiat ke Zion, itiat eke edomode, ɔsɔŋ-urua itiat inuk, emi etimde esin ke idak ibibene: owo eke ɔbuɔtde idem idinyeneke ndifehe.

¹⁷Ndien nyenim ikpe ke uruk udomo, nyenim se inende ke plummet: ndien edim itiat eyekpɔri ubɔhɔ nsu efep, mmɔŋ eyenyuŋ ɔtɔ ofuk ebiet udibe.

¹⁸Ndien eyesɔhi ediomi emi mbufo ediomide ye mkpa efep, ndien esop emi mbufo esopde ye udi ididaha; ke ini ikpa eke ɔtɔde ofuk, ebede, mbufo eyedi se enye edidigide.

¹⁹Adaŋa ini nte ebede, enye eyeda mbufo, koro enye eyebe kpupkru usenubɔk, ke uwemeyo ye ke okoneyo: ndien erifiɔk ŋkpɔ eke edikopde edidi ndik-ndik.

²⁰Koro bed ɔmuhɔde akan nte owo anyanarede ana: ufuhɔ-ŋkpɔ onyuŋ afaha akan nte owo adade enye ofuk idem.

²¹Koro Jehovah eyedaha ke enyɔŋ, kpa nte ke obot Perazim, eyenyuŋ akpahesit, kpa nte ke itihere Gibeon, man anam ŋkpɔ, utibe ŋkpɔ esie, onyuŋ anam utom, utibe utom esie.

²²Mbufo ekusak, ndien, nsahi, mbak ŋkpkɔbi mbufo edisɔŋɔ: koro ŋkopde ete ke Ɔbɔŋ Jehovah mme udim omowuk nditaha ke ofuri ererimbot.

²³Mbufo ekpaŋ utɔŋ, enyuŋ ekop uyo mi; etiŋ enyin, enyuŋ ekop ikɔ mi.

²⁴Nte ofuŋ-isɔŋ ofuŋ kpukpru usen man ɔtɔ ŋkpɔ? Nte enye asiak onyuŋ ɔdiɔŋ isɔŋ esie kpukpru usen?

²⁵Adaŋemi enye ama ɔdiɔŋ isɔŋ iso, nte enye iwarike dill, inyuŋ isuanke cummin, inyuŋ isin wheat ke udim, ye barley nte asiakde, ye spelt ke mben esie?

²⁶Ntem ke Abasi esie eteme enye nte otimde anam, onyuŋ ekpep enye.

²⁷Koro owo midaha ukpat-ŋkpɔ ibet dill, minyuŋ iyutke wheel ukpat-ŋkpɔ isin ke cummin; edi emia dill ke eto, emia cummin ke esaŋ.

²⁸Enyene ndinuak ibokpot uyo, koro minyimeke ndibek enye ke nsinsi; enye anam wheel ukpat-ŋkpɔ esie oyut ke esit, edi iyakke mme horse esie enuak enye.

²⁹Kpa emi ŋko oto Jehovah mme udim; enye aduak utibe ŋkpɔ, onyuŋ okpon ke ifiɔk.