Read efik ISAIAH 29 Bible Online

ISAIAH 29 - efik bible

ISAIAH 29

¹MBƆM Ariel, Ariel, obio emi David okoduŋde! Mbufo ekɔt isua ke isua; eyak mme ini ederi ekanare ekuk.

²Ndien ami nyetuhɔ Ariel, ndien eyet ye ntuaŋa eyedu: enye eyenyuŋ etie nte Ariel ye ami.

³Ndien nyenam nna-ekɔŋ ŋkan fi ŋkuk, nnyuŋ nda udim mfik fi, nnyuŋ mmenere ŋkpɔ uŋwana ekɔŋ ŋŋwana ye afo.

⁴Ndien afo eyesuhɔre, eyetie ke isɔŋ ɔdɔhɔ, ikɔ fo eyena ke ntan osuk uyo; uyo fo eyenyuŋ oto ke isɔŋ, kpa nte eke ekpo, ikɔ fo eyenyuŋ oto ke ntan onun.

⁵Ndien akwa otu isen owo fo eyebiet obu, akwa otu mbon afai eyenyuŋ ebiet mbio eke ekpɔride efep: ndien ŋkpɔ emi eyebuat ke ini kiet.

⁶Ndien obuma, ye unyek-isɔŋ, ye akwa uyom, ye idio, ye oyobio, ye edemikaŋ eke etade, eyeto Jehovah mme udim, edinam fi.

⁷Ndien ofuri akwa otu mme idut emi eŋwanade ekɔŋ ye Ariel, kpa kpukpru mmɔ emi ekade ekɔŋ ye enye ye ibibene esie, emi enyuŋ etukde enye, eyebiet ndap, kpa nte ŋkukut okoneyo.

⁸Ndien eyetie nte owo biɔŋ adabade ndap, ndien, sese, enye adia ŋkpɔ: edi ke ini enye edemerede, ukpɔŋ esie edi ukpɔk: ye nte owo emi itɔŋ asatde adabade ndap, ndien, sese, enye ɔŋwɔŋ mmɔŋ; edi ke ini enye edemerede, sese, enye etie mba mba, udɔŋ onyuŋ anam ukpɔŋ esie: kpa ntre ke ofuri otu mme idut emi eŋwanade ekɔŋ ye obot Zion, editie.

⁹Mbufo enam ubigi, enyuŋ eyik, ebre mbre, enyuŋ etie nnan; mmɔ eyuhɔ, edi idige wine anam; mmɔ eteŋ, edi idige mmin anam.

¹⁰Koro Jehovah amaŋwaŋa mbufo spirit idap ke idem, onyuŋ ɔbɔp mbufo enyin; enye ofuk mme prophet, ye mbuot mbufo, mbon ŋkukut.

¹¹Ndien ofuri ŋkukut amakabare ɔnɔ mbufo, etie nte ikɔ ŋwed eke esirede, eke edade enɔ ɔfiɔk-ŋwed, ete, Mbɔk, kot emi: edi enye ɔdɔhɔ, ete Ŋkemeke, koro enye esirede.

¹²Ndien eda ŋwed oro enɔ owo emi mifiɔkke ŋwed, ete, Mbɔk, kot emi: edi enye ɔdɔhɔ, ete, Mfiɔkke ŋwed.

¹³Ndien Ɔbɔŋ ɔdɔhɔ ete, koro mbio-obio emi etienede mi ke inua mmɔ, enyuŋ ekponode mi ke mkpɔk-inua mmɔ, edi esit mmɔ ada nsan-nsan ye ami, uteŋe eke mmɔ eteŋede mi onyuŋ akabare edi item owo, ŋkpɔ eke etemede mmɔ: mmɔdo, sese,

¹⁴ami nyemana nnam mbio-obio emi utibe ŋkpɔ, kpa utibe ŋkpɔ ye ido eke edide utibe: ndien ifiɔk mme ɔfiɔk ŋkpɔ owo mmɔ eyetak, ɔniɔŋ mbon ɔniɔŋ mmɔ eyenyuŋ onime.

¹⁵Ɔdɔdiɔk ɔnɔ mmɔ eke ekpɔŋde Jehovah eduk ke ntuŋɔ, ete idip uduak mmimɔ, eke enyuŋ enamde ŋkpɔ mmɔ ke ekim, ndien mmɔ edɔhɔ, ete, Anie owo okut nnyin? anie owo onyuŋ ɔfiɔk nnyin?

¹⁶Se ŋkwaŋa mbufo! Nte ekpebat obot-eso nte mbat eso? Emi utom ɔdɔhɔde andinam enye, ete, Idige enye anam mi? Emi ŋkpɔ eke ebotde ɔdɔhɔde andibot enye, ete, Enye inyeneke ibuot?

¹⁷Nte isukke ata esisit iwɔŋ, ndien Lebanon eyekabare edi eti iŋwaŋ, eyenyuŋ ebat eti iŋwaŋ ke akai?

¹⁸Ndien ke usen oro mbon-inan eyekop ikɔ ŋwed, enyin mme nnan eyenyuŋ ewɔrɔ ke mfuhɔ ye ekim ekut ŋkpɔ.

¹⁹Ndien mbon nsukesit eyemana edara Jehovah, mme ubuene ke otu owo eyenyuŋ edara Edisana Abasi Israel.

²⁰Koro mbon afai emekure, mbon nsahi emenyuŋ etak, enyuŋ esibe kpukpru mmɔ eke etiede eyom ukwaŋkpɔ efep:

²¹emi enamde ikpe otip owo ke ikɔ, enyuŋ ekɔkde afia enɔ ebiere-ikpe ke inua-otop, enyuŋ eda nsu enuk edinen owo efep.

²²Mmɔdo ntem ke Jehovah, emi akafakde Abraham, ɔdɔhɔ ye ufɔk Jacob, ete, But idinamke aba Jacob, iso esie idinyuŋ ikabakede aba idi afai.

²³Koro ke adaŋemi enye okutde nditɔ esiemɔ, emi ubɔk mi akanamde, ke ufɔt mmɔ, mmɔ eyenim enyiŋ mi ke edisana, eyenyuŋ enim Edisana Abasi Jacob ke edisana, enyuŋ ebak Abasi Israel.

²⁴Ndien mmɔ eke ekeduede ke spirit eyewɔrɔ ɔniɔŋ, mme osuk-uyo eyenyuŋ ekpep item.