Read efik ISAIAH 3 Bible Online

ISAIAH 3 - efik bible

ISAIAH 3

¹KORO, sese, Ɔbɔŋ Jehovah mme udim Ɔmɔŋ emen iberesit ye iberedem ke Jerusalem ye ke Judah efep, ofuri iberesit ke uyo, ye ofuri iberesit ke mmɔŋ,

²owo uko, ye owo ekɔŋ, ye ebierikpe ye prophet, ye abia-idiɔŋ, ye ebio-owo,

³ye etubom owo aba ye duop, ye akamba owo, ye ɔnɔ-item, ye ɔfiɔk-ubɔk-utom, ye ɔfiɔkŋkpɔ idiɔŋ.

⁴Ndien nyenim nditɔwɔŋ ke mbɔŋ mmɔ, mme abak-inua eyenyuŋ ekara mmɔ.

⁵Ndien kpukpru owo eyesɔŋ ido kiet ye kiet, owo ŋko ye mbɔhɔ-iduŋ esie: mmɔ eyenam iseri-iseri, eyenɔwɔŋ eyenam ye ebio-owo, obukpo owo eyenam ye ɔbɔŋ.

⁶Ke adaŋemi owo omumde eyen-eka esie ke ufɔk ete esie, ete, Afo emenyene ɔfɔŋ-idem, da ubɔŋ nnyin, yak nsobo emi onyuŋ esine fi ke ubɔk:

⁷ke usen oro enye eyeborɔ, ete, Nnyimeke ndidi abia-ibɔk; ndien baba uyo iduhe, baba ɔfɔŋidem inyuŋ iduhe ke ufɔk mi: mbufo ekunim mi ke ɔbɔŋ obio.

⁸Koro Jerusalem ke ofofum, Judah onyuŋ ɔduɔ: koro edeme mmɔ ye ido mmɔ eduede Jehovah, enyuŋ eyatde enyin ubɔŋ esie.

⁹Ŋwud-iso mmɔ ɔbɔrɔ abaŋa mmɔ; mmɔ enyuŋ eyarare idiɔk ido mmɔ nte eke Sodom, idipke. Ifɔnke fɔn inɔ ukpɔŋ mmɔ! koro mmɔ enamde idem mmɔ idiɔk.

¹⁰Mbufo edɔhɔ edinen owo, ete, Ke ɔfɔn: koro mmɔ eyedia mfri ido mmɔ.

¹¹Ifɔnke fɔn inɔ idiɔk owo! ke ɔdiɔk: koro eyenam enye se ubɔk esie anamde.

¹²Ama edi ikɔt mi, mme abak-inua efik mmɔ, iban enyuŋ ekara mmɔ. Ikɔt mi, mme andida mbufo usuŋ esin mbufo edue, enyuŋ ebiat usuŋ ikpat mbufo.

¹³Jehovah adaha ada ndibiere ikɔ, onyuŋ ada ndikpe mme idut.

¹⁴Jehovah eyeda mbiowo ikɔt esie, ye mbɔŋ mmɔ oduk ke ikpe: “Mbufo ŋko emeta iŋwaŋ-vine; mbume mme ubuene odu ke ufɔk mbufo.

¹⁵Nsinam mbufo enuakde ikɔt mi, enyuŋ etukde mme ubuene iso?” Ntem ke Ɔbɔŋ Jehovah mme udim ɔdɔhɔ.

¹⁶Ndien Jehovah ɔdɔhɔ, ete Koro nditɔ-iban Zion etaŋde idem, enyuŋ esaŋade etop itɔŋ, enyuŋ esuande enyin use, ewetde isaŋ esaŋa, ikpat mmɔ enyuŋ esiorode uyo:

¹⁷mmɔdo Ɔbɔŋ eyenam etiŋe ibuot nditɔ-iban edi ibɔ, Jehovah eyenyuŋ ɔfuhɔre mmɔ iferi.

¹⁸Ke usen oro Ɔbɔŋ eyesio ndaŋ uyai efep, ye ɔkɔrɔ-ekpaŋ,

¹⁹ye mme crescent, ye ŋkwa utɔŋ, ye okpoho ubɔk,

²⁰ye ŋkpɔ ufuk-idem, ye uyaribuot, ye ŋkpɔkɔbi ukot, ye mme ubɔp isin, ye mme ekpeme kɔmfi,

²¹ye edikɔŋɔ ibɔk, mkpanuen, ye mkpanuen ibuo,

²²ye edisine-ŋkpɔ ubɔŋ, ye mme ewura, ye cloak, ye ŋkpri ekpat,

²³ye mme ukut-iso, ye mme shirt, ye ɔfɔŋ ibuot, ye ɔfɔŋ ufukiso.

²⁴Ndien ama ekem, uwak eyewɔrɔ ke ibuot ufuɔŋ, uruk eyenyuŋ ɔwɔrɔ ke ibuot ubɔp-isin; ye ibɔ, ke ibuot edidɔk idet; ye ukune ɔfɔŋ ikpo ke ibuot akamba ɔfɔŋidem; ye nde ikaŋ ke ibuot uyai.

²⁵Iren-owo fo eyeduɔŋɔ ke ofut, ye mbon uko fo ke ekɔŋ.

²⁶Ndien mme inua-otop esie eyeseme enyuŋ etuaŋa; ndien enye eyetie ke isɔŋ ukpɔk.