Read efik ISAIAH 30 Bible Online

ISAIAH 30 - efik bible

ISAIAH 30

¹JEHOVAH ɔdɔhɔ ete, Ifɔnke fɔn inɔ nditɔ nsɔŋ-ibuot, emi enamde uduak, edi itoho mi: enyuŋ ediomide ediomo, edi itoho spirit mi, man ekɔt idiɔk ido ke idiɔk ido.

²Mmɔ esuhɔre eka Egypt, edi ibupke uyo mi; ebine odudu Pharaoh, enyuŋ ebuɔt idem ke mfut Egypt.

³Ndien odudu Pharaoh eyekabare edi ŋkpɔ but mbufo, mbuɔtidem ke mfut Egypt eyenyuŋ akabare edi esuene.

⁴Koro mbɔŋ esie edude ke Zoan, mme isuŋutom esie enyuŋ esim ke Hanes.

⁵But anam kpukpru mmɔ abaŋa idut emi mikemeke ndidoro mmɔ, mmɔ ikemeke ndiŋwam nnyuŋ ndoro mmɔ, koro edide ŋkpɔ but ye esuene ŋko.

⁶Mbiomo mme unam edem usuk: ke isɔŋ ndutuhɔ ye nnan-eyin, uman lion ye abak lion, ibɔm ye ɔkpɔtɔ itiat eto do, mmɔ ebiom inyene mmɔ ke afara nditɔ ass, ebiom ŋkpɔ-uto mmɔ ke ekuŋ camel, esɔk idut eke mikemeke ndidoro mmɔ.

⁷Ndien eriŋwam emi Egypt aŋwamde eyewɔrɔ ikpikpu ye ukpɔk: oro esin nsiode enye emi enyiŋ, Mbon mbure, mmɔ etie suŋ.

⁸Ka ndien kakap enye ke itiat ŋwed ke otu mmɔ, nyuŋ wet enye ke nwed, man enye etie ɔnɔ ini iso, ke nsinsi tutu amama.

⁹Koro mmɔ edide mbon nsɔŋibuot, nditɔ nsu, nditɔ eke minyimeke ndikop mbet Jehovah.

¹⁰Emi edɔhɔde mbon ŋkukut, ete, mbufo ekukut; edɔhɔ mmɔ eke esede, ete, Mbufo ekuse edinen ŋkukut enɔ nnyin; etiŋ inem ikɔ enɔ nnyin: ekut ŋkpɔ nsu:

¹¹mbufo ewɔŋɔre ekpɔŋ usuŋ, ewaha ekpɔŋ ɔkpɔ-usuŋ, enam Edisana Abasi Israel okudu aba ke iso nnyin.

¹²Mmɔdo ntem ke Edisana Abasi Israel ɔdɔhɔ, ete, Koro mbufo esuade ikɔ emi, enyuŋ ebuɔtde idem mbufo ke utuk ye ŋkwaŋa, enyuŋ eberede idem ke esit:

¹³oro esin idiɔk ido emi etiede ye mbufo nte ubak edikoŋ ibibene eke ɔbuŋɔde oyom ndiduɔ, ɔnyuhɔde, ndien okibe ini kiet, owure ɔduɔ.

¹⁴Ndien ewuri enye nte abaŋ mme obot-eso owurede, anuaha; mbɔm iduhe du; ndien ikwe baba usiɔŋ kiet ke otu mbai esie, eke edade emen ikaŋ ke otuŋ, mme eda ekoi mmɔŋ ke idim.

¹⁵Koro ntem ke Ɔbɔŋ Jehovah, Edisana Abasi Israel, ɔdɔhɔ, ete, Ke erikabare ye ke nduɔk-odudu ke mbufo edikeme ndibɔhɔ; ke eritie suŋ, ye ke mbuɔtidem, ke odudu mbufo edidu: edi mbufo ikonyimeke.

¹⁶Ndien mbufo ekedɔhɔ, ete, Ih ih, koro nnyin iyeda horse ifeŋe; mmɔdo mbufo eyefeŋe: nnyin iyenyuŋ idoro ke mme ɔsɔp-ukot; mmɔdo mmɔ eke ebinede mbufo eyesɔp ukot.

¹⁷Nduari owo kierakiet eyesin tɔsin owo efeŋe; nduari owo ition eyesin mbufo efeŋe: tutu mbufo esuhɔ nte ito ubom ke enyɔŋ ikpɔ obot, ye nte ɔfɔŋ-etak-ubom ke ibuot obot.

¹⁸Ndien oto oro Jehovah eyebet, man atua mbufo mbɔm, oto oro nko Enye eyedaha ke enyɔŋ, man ɔfɔn ido ye mbufo: koro Jehovah edide Abasi edinen ido: ɔfɔfɔn ɔnɔ kpukpru mmɔ eke ebetde enye.

¹⁹Koro mbio ke Zion eyeduŋ ke Jerusalem: afo udutuaha eyet: enye eyetua fi mbɔm ke uyo eseme fo; ke ini enye okopde, enye eyebɔrɔ fi.

²⁰Ndien Ɔbɔŋ eyenɔ mbufo uyo ukut, ye mmɔŋ ndutuhɔ, edi mmɔ eke etemede fi ididibeke aba: enyin fo eyenyuŋ ekut mmɔ eke etemede fi:

²¹ndien utɔŋ fo eyekop uyo ke edem fo, ete, “Emi edi ɔkpɔ-usuŋ, mbufo esaŋa ke esit,” ke mbufo ediŋwɔŋɔrede eka nnasia, mme enyuŋ eka ufien.

²²Ndien mbufo eyebat se edade efuk mbiet a silver fo, ye edisine-ŋkpɔ mbiet o-gold fo ke mbubiam: afo eyemen mmɔ ɔduɔk nte ŋkpɔ ndek; eyedɔhɔ enye, ete, Wɔrɔ.

²³Ndien enye eyeda edim ɔnɔ mkpasip fo emi afo adade ɔtɔ ke iŋwaŋ; ye udia eke iŋwaŋ oŋwumde, enye eyenyuŋ esehe onyuŋ awak. Ufene fo eyedia udia ke akwa ebiet mbiet ke usen oro:

²⁴ndien enaŋ mbufo ye abak ass eke efuŋde isɔŋ, eyedia inuŋ-inuŋ udia, eke owo asakde ke shovel ye ke usak-ŋkpɔ.

²⁵Ndien ke kpukpru ikpɔ obot, ye ke kpukpru edikoŋ obot, ke akpa ye idim mmɔŋ edidu ke usen akwa obom, ke mme tower eduɔŋɔde.

²⁶Ndien uŋwana ɔfiɔŋ eyebiet uŋwana utin, uŋwana utin eyenyuŋ aka iso utim ikatiaba, ebiet uwemeyo itiaba, ke usen eke Jehovah edibɔpde unan ikɔt esiemɔ, edinyuŋ ɔkɔkde ufen eke emiade mmɔ.

²⁷Sese, enyiŋ Jehovah ke oto ke anyan ebiet edi, iyaresit esie ke asak, edemikaŋ onyuŋ odobi: ifuresit ɔyɔhɔ enye ke mkpɔk-inua, edeme esie onyuŋ ebiet ikaŋ eke asakde.

²⁸Ndien ibifik esie ebiet akpa mmɔŋ eke ɔyɔhɔde, enye eyebahare osim kpa ke itɔŋ, man enye asak mme idut ke usak-ŋkpɔ nsu: uruk eke anamde mmɔ edue eyenyuŋ eyire mme idut ke mbaŋ:

²⁹mbufo eyekwɔ ikwɔ kpa nte ke okoneyo eke enimde ederi; esit eyenyuŋ adat mbufo, nte owo emi etienede ifium asaŋa aka obot Jehovah, etiene akwa itiat Israel.

³⁰Ndien Jehovah eyenam ekop ubom uyo esiemɔ, onyuŋ owut mmɔ iduɔ ubɔk esie, ke ifuresit ye ikpahesit ye edemikaŋ eke atade, ke oyobio, ye edim, ye edim itiat.

³¹Koro eyeda uyo Jehovah esuan Assyria; owo eyeda eto amia.

³²Ndien kpukpru ubɔk ikpa emi ɔwuhɔde, emi Jehovah adade anam enye (Assyria), eyesaŋa ye ekɔmɔ ye harp: ndien eyeŋwana otime-otime ekɔŋ ke esit.

³³Koro ema etim Topheth ebigi; ema enyuŋ ediɔŋ enye enɔ edidem; enye ama otuŋ enye, ama onyuŋ anam okpon: ebok ikaŋ ye ifia emekpon: ibifik Jehovah, nte akpa brimstone, ɔfɔp enye.