Read efik ISAIAH 32 Bible Online

ISAIAH 32 - efik bible

ISAIAH 32

¹SESE, edidem kiet eyekama obio nte enende; ama edi mbɔŋ, mmɔ ŋko eyeda ubɔŋ ke eti ido.

²Ndien owo kiet eyekabare ebiet ɔtɔ udibe ofum, ye etehe ubɔhɔ edim; ebiet akpa mmɔŋ ke edisat isɔŋ, ebiet mfut akwa itiat ke isɔŋ mkpa-mba.

³Ndien enyin idikimke mmɔ eke ekutde, utɔŋ mmɔ eke ekopde eyenyuŋ ebiɔŋɔ.

⁴Ndien esit anafai eyetim obure ifiɔk, edeme mme ekek ekek eyenyuŋ ewara ndidɔnɔ ikɔ.

⁵Idikotke aba oburobut owo, ite, Owo ntat-ubɔk, idinyuŋ idɔhɔke aba, ite afam atat ubɔk.

⁶Koro oburobut owo edidɔhɔde oburobut ŋkpɔ, esit esie edinyuŋ anam ŋkwaŋa, anam ata idiɔk ido, onyuŋ ɔdɔhɔ se minenke adian Jehovah, ayak owo biɔŋ etie biɔŋ, onyuŋ ayak mbon nsat-itɔŋ enana se eŋwɔŋde.

⁷Ndien ama edi afam, ŋkpɔ utom esie ediɔk: enye aduak uduak ŋkari, ete isobo mbon ukut ke ikɔ nsu, kpa ke adaŋemi eyen ubuene ɔdɔhɔde se inende.

⁸Edi owo ntarubɔk aduak ŋkpɔ ntarubɔk; onyuŋ anam ekikak ke ntarubɔk.

⁹Mbufo iban emi enanade ekikere, edaha ke enyɔŋ, ekop uyo mi; nditɔ-iban emi etiede ke ndue-idem, mbufo ekpaŋ utɔŋ ke se ndɔhɔde:

¹⁰osuk isua kiet ye udori, mbufo iban ndue-idem eyetimere: koro utet vine eyekpa, eritaŋ ididige.

¹¹Mbufo iban unana ekikere enyek idem: iban ndue-idem, mbufo etimere; esioŋo ŋkpɔ ke idem, etie iferi, ebɔbɔ ŋkpɔ ke isin.

¹²Ke etuak eba ebaŋa nti iŋwaŋ, ebaŋa vine eke ewakde mfri.

¹³Akpap ye ŋkukim eyekɔri ke isɔŋ ikɔt mi; ye ke kpukpru ufɔk mbre ke obio idara.

¹⁴Koro emedaha ke ufɔk edidem; emekpɔŋ iwok obio; Ophel ye tower edi ebiet obube ke nsinsi, idaresit mme ass ikɔt, mbiet mme otu ufene:

¹⁵tutu etie ke enyɔŋ eŋwaŋa nnyin spirit ke idem, ndien wilderness eyekabare edi eti iŋwaŋ, eyenyuŋ ebat eti iŋwaŋ ke akai.

¹⁶Ndien eti ikpe eyeduŋ ke wilderness, edinen ido eyenyuŋ etie ke eti iŋwaŋ.

¹⁷Ndien se edinen ido anamde edi emem; utip eti ido onyuŋ edi nduɔk-odudu ye ifure ke nsinsi.

¹⁸Ndien ikɔt mi eyeduŋ ke ufɔk emem, ye ke iduŋ ifure, ye ke ebiet nduɔk-odudu eke edide suŋ-suŋ;

¹⁹edim itiat eyedep, ke ini akai ɔduɔde; obio eyenyu ŋ ɔsuhɔre ana ke itihere ebiet.

²⁰Ɔfɔfɔn ɔnɔ mbufo emi etɔde ŋkpɔ ke mben kpukpru mmɔŋ, emi esanade enaŋ ye ass ukot eyak.