Read efik ISAIAH 40 Bible Online

ISAIAH 40 - efik bible

ISAIAH 40

¹ABASI mbufo eyedɔhɔ ete, Mbufo edɔŋ ikɔt mi esit, edɔŋ ikɔt mi esit.

²Edɔhɔ ye Jerusalem ufan-ufan, enyuŋ ekwɔrɔ enɔ enye, ete, Ke ekɔŋ esie ɔmɔyɔhɔ, ke emefen idiɔk ido esie: ke enye ɔmɔbɔ Jehovah ke ubɔk utim ikaba abaŋa kpukpru mme idiɔk ido esie.

³Kop! uyo andifiori ke wilderness, ete, Mbufo ediɔŋ usuŋ Jehovah, emenere ɔkpɔ-usuŋ enɔ Abasi nnyin ke desert.

⁴Kpukpru itihere ebiet eyemenere ke enyɔŋ, kpukpru ikpɔ ye ŋkpri obot eyenyuŋ esuhɔre: se ikwaŋade eyenyuŋ akabare enen, ibombom eyenyuŋ akabare edi una-isɔŋ:

⁵ndien ubɔŋ Jehovah eyeyarare, kpukpru owo ɔtɔ kiet eyenyuŋ ekut enye: koro uyo Jehovah ɔdɔhɔde.

⁶Uyo ɔdɔhɔ, ete, Fiori, Ndien owo ɔdɔhɔ, ete Nso ke ndifiori? Ofuri obukidem edi mbiet, ofuri mfɔn esie onyuŋ ebiet ediye ikɔŋ ikɔt: mbiet amasat,

⁷ediye ikɔŋ onyuŋ akpa: koro ibifik Jehovah ofuride ke esit: ke akpanikɔ kpukpru owo edi mbiet.

⁸Mbiet amasat, ediye ikɔŋ onyuŋ akpa: edi ikɔ Abasi nnyin eyeda ke nsinsi.

⁹Afo Zion emi obukde eti mbuk, dɔk ke edikoŋ obot; O Jerusalem emi obukde eti mbuk, sɔŋɔ menere, uyo fo; menere, kudige; dɔhɔ mme obio Judah, ete, Se Abasi mbufo!

¹⁰Sese, Ɔbɔŋ Jehovah eyeda odudu edi, ubɔk esie eyenyuŋ akara ɔnɔ enye: sese, utip esie odu ye enye, ŋkpɔ-eyen-utom onyuŋ odu enye ke iso.

¹¹Enye eyebɔk ikɔt esiemɔ nte ɔbɔk ufene: eyetaŋ nditɔ erɔŋ ke ubɔk esie, akama ke ikpanesit esie, onyuŋ ada mme ɔnɔ-mmɔŋeba usuŋ.

¹²Anie odomo mmɔŋ ke eka-ubɔk esie, onyuŋ ada eka-ubɔk odomo enyɔŋ, onyuŋ akama ntan isɔŋ ke udomo-ŋkpɔ, onyuŋ odomo udop ikpɔ obot ke scales, ye ekpri obot ke balance?

¹³Anie owo odomo spirit Jehovah ese, onyuŋ edi andinɔ enye item nnyuŋ ŋkpep enye?

¹⁴Enye obup anie owo item, ndien enye eteme Enye? onyuŋ owut Enye usuŋ ikpe, onyuŋ ekpep Enye ifiɔk, onyuŋ owut Enye usuŋ asian?

¹⁵Sese, mme idut ebiet ntɔi mmɔŋ ke abaŋ, enyuŋ ebat mmɔ nte obu ke balance: sese, enye eyemen mme isuo nte ata ekpri ŋkeŋe.

¹⁶Lebanon inyuŋ ikemke ke eke edade efɔp, unam esie inyuŋ ikemke ke edifɔp uwa.

¹⁷Kpukpru mme idut edi ikpikpu ke iso esie; enyuŋ ebat mmɔ ete ke mmɔ ekpri ekan se miduhe, ke enyuŋ edi ikpikpu ye enye.

¹⁸Ndien mbufo edidomo Abasi ye anie? Enyuŋ eda nso idomo edomo enye?

¹⁹Owo-usɔ anam editara mbiet, odom-gold onyuŋ ada gold ofuk enye, onyuŋ atara silver anam ŋkpɔkɔbi.

²⁰Owo eke ananade ŋkpɔ uwa emek eto eke midibuhu: oyom enyene-ibuot owo-usɔ ke idem esie, eke edinamde edisɔi mbiet, eke midisehekede.

²¹Nte mbufo ifiɔkke? Nte mbufo ikopke? Nte akanam itiŋke inɔ mbufo toto ke eritɔŋɔ? Nte mbufo ifiɔkke nte ekewukde ererimbot ke itie?

²²Enye emi odorode ke ekara ererimbot, ndien mme andiduŋ enye ebiet ŋkukuŋkpɔyɔriyɔ; emi anyanarede ikpa-enyɔŋ nte ukara, onyuŋ eneŋerede enye nte tent eke eduŋde:

²³emi onimde mbɔŋ ke se miduhe du; anam mme ebier-ikpe ererimbot edi ikpikpu.

²⁴Itimke itɔ mmɔ ke isɔŋ ima: ndien enye ofuri mmɔ, ndien mmɔ ekpaŋa, idio eyenyuŋ ɔkpɔri mmɔ efep nte mbio.

²⁵Mbufo edida anie ndien edomo mi? Ami ndinyuŋ ndi ukem ye anie? Emi edi uyo Edisana Abasi.

²⁶Emenere enyin mbufo ke enyɔŋ, enyuŋ ese! Anie okobot mme mmɔ emi? Anie ada otu mmɔ ɔwɔrɔ ke ibat mmɔ? Enye osio kpukpru mmɔ enyiŋ: koro nsɔŋidem esie okponde, enye onyuŋ ɔsɔŋ odudu; baba owo mmɔ kiet isopke.

²⁷Nsinam afo Jacob ɔdɔhɔde, nsinam afo Israel etiŋde, ete, Usuŋ mi odibe Jehovah, ikpe mi onyuŋ ebe ɔkpɔŋ Abasi mi.

²⁸Nte afo ufiɔkke? nte afo akanam ukopke? Jehovah emi okobotde mme utit ererimbot edi nsinsi Abasi; enye ikpaha mba, inyuŋ ikpɔtke; idige nte eduŋɔrede asian esie.

²⁹Enye ɔnɔ mbon mba odudu; onyuŋ anam ukeme awak ɔnɔ mmɔ eke minyeneke nsɔŋ-idem.

³⁰Idem mkparawa eyekpa mba enyuŋ ekpɔt, nyara owo eyenyuŋ eduɔŋɔ:

³¹edi mmɔ eke eberede ye Jehovah eyekop obufa nsɔŋidem; eyedɔk ke mba nte ntrukpom; eyefeŋe, ndien idikpɔtke; eyesaŋa, edi idikpaha mba.