Read efik ISAIAH 41 Bible Online

ISAIAH 41 - efik bible

ISAIAH 41

¹O ISUO, mbufo edop uyo enɔ mi; ndien mme idut eyekop obufa nsɔŋidem: mmɔ eyesaŋa ekpere, ndien eyedɔhɔ ikɔ: nnyin iyedi ikpe ɔtɔ kiet.

²Anie ekedemere owo ke edem usiaha-utin? Edinen ido eyekot enye edi ke ɔtɔ ukot esie? Eyeda mme idut onim enye ke iso, eyenam enye edigi ndidem; eyeda mmɔ ɔnɔ ofut esie, nte ntan, ɔnɔ utiga esie, nte mbio eke ekpɔride efep.

³Enye eyebine mmɔ, eyesaŋa ebe ke ifure; idisaŋake ke usuŋ ke ukot esie.

⁴Anie ekesin okonyuŋ anam, ke okot mme emana toto ke eritɔŋɔ? ami Jehovah, akpa, emi nnyuŋ ndude ke akpatre; ami ndi Enye.

⁵Mme isuo ekut, enyuŋ edige; mme utit ererimbot enyek idem, esaŋa ekpere enyuŋ edi.

⁶Kpukpru owo eyeŋwam mbɔhiduŋ mmɔ; kiet eyenyuŋ ɔdɔhɔ eyen-ete esie, ete, Sɔŋ esit.

⁷Ndien andisɔi ɔsɔŋ anditara esit, andidɔnɔ ke hammer ɔsɔŋ andidom ke itiat-utim, ɔdɔhɔ abaŋa isobo, ete, Enye ɔfɔn. Onyuŋ ɔsɔŋɔ enye ke okpukwak, enye idisehekede.

⁸Edi afo, Israel, owo mi, Jacob emi mmekde fi, ubon Abraham ufan mi:

⁹afo emi ŋkadade ke mme utit ererimbot, nnyuŋ ŋkotde fi ke ŋkaŋ esie edi, nnyuŋ ndɔhɔ fi, nte, Afo edi owo mi, mmemek fi, nnyuŋ nsuaha fi:

¹⁰Kudige, koro ami ndude ye afo: kunyek idem, koro ami ndide Abasi fo: nyesɔŋɔ fi idem; nditreke ndinyaŋa fi; nditreke ndimum fi ŋkama ke edinen ubɔk nnasia mi.

¹¹Sese, kpukpru mmɔ emi eyatde esit ye afo eyekut but ye esuene: mmɔ eyekabare edi ikpikpu; ndien eyesobo mbon utɔk fo.

¹²Afo eyeyom mmɔ, edi udukwe mmɔ, kpa mbon eŋwan fo: mmɔ eke eŋwanade ekɔŋ ye afo eyekabare edi ikpikpu, ye nte ŋkpɔ eke miduhe du.

¹³Koro ami Jehovah Abasi fo mmumde fi ubɔk nnasia, emi ndɔhɔde fi, nte, Kufehe; ami ŋŋwam fi.

¹⁴Kufehe, afo Jacob utuŋ, ye mbufo mbio Israel; Jehovah ɔdɔhɔ ete, Ami mmaŋwam fi; ndien andifak fi edi Edisana Abasi Israel.

¹⁵Sese, mmonim fi ke ukpat-ŋkpɔ ubek ibokpot eke ɔsɔpde, edi obufa, enyene ediwak iso: afo eyetim ikpɔ obot, onyuŋ anuak mmɔ emem; eyenyuŋ onim ŋkpri obot nte mbio ibokpot.

¹⁶Afo eyesak mmɔ, ndien ofum eyemen mmɔ efep, idio eyenyuŋ asuan mmɔ: ndien afo eyedara Jehovah, onyuŋ obure mbure ke Edisana Abasi Israel.

¹⁷Mbon ukut ye ubuene eyom mmɔŋ, edi iduhe, edeme mmɔ amasat ke nsat-itɔŋ. Ami Jehovah nyeyere mmɔ, ami Abasi Israel ndikpɔŋke mmɔ.

¹⁸Nyesiak akpa mmɔŋ ke enyɔŋ ikpɔ obot, nyesiak idim mmɔŋ ke ufɔt mme ebedeŋ: nyenim wilderness ke mkpɔdiɔhɔ-mmɔŋ, nyenim edisat isɔŋ ke mbuot idim.

¹⁹Nyenɔ cedar, ye acacia, ye myrtle, ye eto aran ke wilderness; nyenim eto fir, ye pine, ye eto box ɔtɔ kiet ke desert:

²⁰man mmɔ ekut enyuŋ efiɔk, enyuŋ enim ibuot ke esit, enyuŋ etim efiɔk, ke ini kiet, ete ke ubɔk Jehovah akanam emi, Edisana Abasi Israel okonyuŋ obot enye.

²¹Jehovah ɔdɔhɔ, ete, Mbufo eda ikpe mbufo edi; Edidem Jacob ete, Mbufo emen mkpɔsɔŋ ikɔ mbufo esaŋa ekpere.

²²Yak eda mmɔ edi, enyuŋ ewut nnyin se idiwɔrɔde: yak ewut nnyin mbemiso ŋkpɔ se edide, ndien nnyin iyenim ibuot ke esit, inyuŋ ifiɔk utit mmɔ; midige ntre, yak mmɔ enam nnyin ikop ŋkpɔ eke edidide.

²³Mbufo etiŋ se ididide ke ukperedem, ndien nnyin iyefiɔk ite ke mbufo edi Abasi: enam eti ŋko enyuŋ enam idiɔk, ndien nnyin iyese kiet eken, inyuŋ ikut ini kiet.

²⁴Sese, mbufo edi ikpikpu, utom mbufo onyuŋ ekpri akan ikpikpu: enye emi edimekde mbufo edi mbubiam.

²⁵Mma ndemere owo kiet ke edere, ndien enye emedi: enye eyetie ke edem usiaha-utin okot enyiŋ mi: ndien enye eyesaŋa mbɔŋ ke idem nte mbat, ye nte obot-eso edigide mbat eso.

²⁶Anie owo eketiŋ ke eritɔŋɔ, man nnyin ifiɔk? ye ke eset, man nnyin idɔhɔ ite, Enen? Ŋkɔm baba owo kiet eke etiŋde iduhe, ŋkɔm baba owo kiet eke obupde iduhe, ŋkɔm baba owo kiet eke okopde ikɔ mbufo iduhe.

²⁷Ami mbem iso ndɔhɔ Zion, nte, Sese, se mmɔ: nnyuŋ nnɔ Jerusalem owo eke obukde eti mbuk.

²⁸Ndien nyese, edi owo iduhe; ye ke otu mme mmɔ emi, ndien baba ɔnɔ-item kiet iduhe; ndien nyebup mmɔ, ndien mmɔ eyebɔrɔ ikɔ.

²⁹Sese, kpukpru mmɔ edi ikpikpu; utom mmɔ onyuŋ edi se miduhe du: nditara mbiet mmɔ edi ofum ye ikpikpu.