Read efik ISAIAH 42 Bible Online

ISAIAH 42 - efik bible

ISAIAH 42

¹SE owo mi; nyemum enye ŋkama: se edimek owo mi emi adatde mi esit; mmodori enye spirit mi ke idem: enye eyenam ikpe ɔwɔrɔ ɔnɔ mme idut.

²Enye idifiorike, idinyuŋ imenekede uyo esiemɔ, inyuŋ iyakke ekop uyo esie ke efak.

³Enye idibuŋke esaŋ eke anuahade, idinyuŋ inimeke ɔfɔŋ utuenikaŋ eke etiede nnime-nnime: enye eyeda ikpe ɔwɔrɔ ɔnɔ akpanikɔ.

⁴Esit ididuɔhɔ enye, idem idinyuŋ ikpaha enye, tutu enye onim ikpe ke ererimbot: mme isuo eyenyuŋ ebet mme ewuhɔ esie.

⁵Emi edi uyo Abasi Jehovah, emi okobotde enyɔŋ onyuŋ anyanarede mmɔ; emi ebride isɔŋ, ye se itibede ke esit; emi adade ibifik ɔnɔ kpukpru owo emi edude ke esit, ada spirit ɔnɔ kpukpru mmɔ emi esaŋade ke esit:

⁶Ami Jehovah mmokot fi ke edinen ido, nyenyuŋ mmum fi ubɔk ŋkama, nnyuŋ ŋkpeme fi, nnyuŋ nnim fi ke ediomi mbio-obio, ye ke uŋwana mme idut;

⁷man atat enyin eke ekimde, onyuŋ osio mbon ŋkpɔkɔbi ke ufɔk ukwak, osio mmɔ eke etiede ke ekim efep ke ufɔk ebuka.

⁸Ami ndi Jehovah; enyiŋ mi edi oro: ndinyuŋ nnɔŋɔ owo efen ubɔŋ mi, nnɔŋɔ ndisɔi mbiet itoro mi.

⁹Mbemiso ŋkpɔ, sese, mmɔ edi, ami nnyuŋ ntiŋ mbufa ŋkpɔ: ke mikaitibeke kaŋa, mbuk mmɔ nnɔ mbufo.

¹⁰Mbufo ekwɔ obufa ikwɔ enɔ Jehovah, ye itoro esie ke utit ererimbot, mbufo emi esuhɔde ke inyaŋ, ye se iyɔhɔde ke esit, mbufo mme isuo ye mme andiduŋ mmɔ.

¹¹Wilderness ye mme obio esie eyemenere uyo, mme nna emi Kedar oduŋde: mme andiduŋ akwa itiat eyefiori, mmɔ eyetie ke enyɔŋ ikpɔ obot esio mkpo.

¹²Eyenim ubɔŋ enɔ Jehovah, enyuŋ ebuk itoro esie ke otu mme isuo.

¹³Jehovah eyewɔrɔ nte owo uko, eyedemere ufup nte owo ekɔŋ: enye eyefiori, eyefiori akamba; eyesɔŋɔ idem akan mme asua esiemɔ.

¹⁴Mma ndop uyo tutuko; (nte) ndisioroke uyo, nyemum idem mi ŋkama: nyefiori nte ŋwan uman; esit eyekibe mi, nyenyuŋ ŋkot ibifik ini kiet.

¹⁵Nyesobo ikpɔ obot ye ŋkpri, nnyuŋ nnam kpukpru ikɔŋ mmɔ asat; nnyuŋ ŋkabare mme akpa mmɔŋ edi isuo, nnyuŋ nnam mkpɔdiɔhɔ-mmɔŋ esat.

¹⁶Ndien nyenam mme nnan esaŋa ke usuŋ eke mmɔ mifiɔkke; nnyuŋ nnam mmɔ edigi ke ɔkpɔ-usuŋ eke mmɔ mifiɔkke: nnyuŋ nnim ekim ke uŋwana, ye mme ŋkwaŋa ŋkpɔ ke se inende. Mmɔ emi edi ŋkpɔ eke ndinamde nnɔ mmɔ nnyuŋ ŋkpɔŋke mmɔ.

¹⁷Mmɔ eke ebuɔtde idem mmɔ ye ndisɔi mbiet, mmɔ eke edɔhɔde nditara mbiet, ete, “Mbufo edi abasi nnyin,” efiak edem enyuŋ ekut ata but.

¹⁸Mbufo mme inan ekop; mbufo mme nnan etiŋ enyin, man ekut.

¹⁹Anie edi nnan ke mibɔhɔke owo mi? Anie edi inan nte isuŋ mi emi ndɔŋde enye utom? Anie edi nnan nte enye emi ɔfɔnde ama, ye nnan nte owo Jehovah?

²⁰Afo omokut ediwak ŋkpɔ, edi udunimke; ke esirere utɔŋ, edi idikopke.

²¹Esit enem Jehovah abaŋa edinen ido esie; enye eyekpono mme ewuhɔ, onyuŋ ɔnɔ mmɔ ubɔŋ.

²²Edi enye emi edi idut eke owo ebumede enyuŋ enamde mmɔ nnama; eke kpukpru mmɔ esikede ke ndudu, enyuŋ edibede ke ufɔk ebuka: mmɔ emekebare edi ŋkpɔ mbume, ndien baba owo kiet eke osiode mmɔ iduhe; mmɔ emekabare edi ŋkpɔ nnama, ndien baba owo kiet idɔhɔke, ite, Yak nɔ.

²³Anie ke otu mbufo edikpaŋ utɔŋ ke emi? Anie edibiɔŋ utɔŋ onyuŋ okop ke ini iso?

²⁴Anie ɔnɔ Jacob ke ŋkpɔ nnama, anie onim Israel ke ŋkpɔ mbume? Nte idige Jehovah, emi nnyin iduede enye, ndien minyimeke ndisaŋa ke usuŋ esie, minyuŋ ikopke mme ewuhɔ esie?

²⁵Ndien enye ada ikaŋ iyaresit esie ye odudu ekɔŋ aŋwaŋa enye ke idem; ndien oro okim enye ikaŋ akanade okuk, edi enye ifiɔkke; onyuŋ ɔfɔp enye, edi enye inimke ibuot ke esit.