Read efik ISAIAH 45 Bible Online

ISAIAH 45 - efik bible

ISAIAH 45

¹NTEM ke Jehovah ɔdɔhɔ Cyrus, emi enye eyetde aran, emi mmumde enye ubɔk nnasia, nte, Nyedigi mme idut ke iso esie; nnyuŋ ntat ndidem isin, man mberere itim ke iso esie; ndien mmɔ idiberike enyin-usuŋ;

²Ami nyebem fi iso nsaŋa, nnyuŋ nneŋere ibombom: nyenuak mme itim okpoho, nnyuŋ ŋkpok mme-usin-usuŋ-ukwak:

³ndien nyenɔ fi unim ŋkpɔ uto ekim, ye inyene eke odobide, man afo ɔfiɔk, ete ke edi ami Jehovah emi ŋkotde fi enyiŋ, kpa Abasi Israel.

⁴Ŋkot fi enyiŋ ŋko, mbaŋa owo mi Jacob ye Israel emi mmekde: ŋkot fi enyiŋ ukpono ŋko, edi afo ufiɔkke mi.

⁵Ami ndi Jehovah, ndien efen iduhe du, Abasi iduhe ke mibɔhɔke ami, mbɔbɔ fi mbɔbɔ, ndien afo ufiɔkke mi:

⁶man mmɔ efiɔk ke edem usiaha-utin, ye ke edem usop-utin, ete ke baba kiet iduhe ke mibɔhɔke ami, ami ndi Jehovah, ndien baba efen iduhe.

⁷Mbot uŋwana, nnyuŋ mbot ekim: nnam emem, nnyuŋ mbot idiɔk: ami Jehovah nnam kpukpru ŋkpɔ emi.

⁸Mbufo mme heaven ke enyɔŋ ekeŋe, yak mbubit enyɔŋ enyuŋ eŋwaŋa edinen ido: yak isɔŋ ɔkubɔre, yak erinyaŋa ye edinen ido esiaha, yak enye oŋwum mmɔ ini kiet: ami Jehovah mbot enye.

⁹Ɔdiɔk ɔnɔ owo eke aŋwanade ye andibot enye! Mfiɔk kiet ke otu mfiɔk mbat. Nte mbat ɔdɔhɔ andibot, ete, Afo anam nso? Nte utom fo ɔdɔhɔ, ete, Enye inyeneke ubɔk?

¹⁰Ɔdɔdiɔk ɔnɔ owo eke ɔdɔhɔde Ete esie, ete, Afo edibon nso? Ɔdɔhɔ ye ŋwan, ete, Afo ediman nso?

¹¹Emi edi uyo Jehovah Edisana Abasi Israel, ye andibot enye; mbufo ebup mi ŋkpɔ edidide: ama edi nditɔ mi, ye utom ubɔk mi, mbufo eyak mi ŋkere mmɔ.

¹²Edi ami ŋkanam isɔŋ, nnyuŋ mbot owo emi edude ke esit: ami, kpa ubɔk mi, nneŋere ikpa-enyɔŋ, mmonyuŋ ŋwuk ofuri udim mmɔ.

¹³Ami ndemere enye nsin ke edinen ido, nyenyuŋ nneŋere kpukpru usuŋ esie: enye eyebɔp obio mi, onyuŋ asana ikɔt mi emi eketaŋde efep, ayak, idige ke utip inyuŋ idige ke enɔ.

¹⁴Emi edi uyo Jehovah mme udim. Ntem ke Jehovah ɔdɔhɔ, ete, Utom Egypt ye udori Ethiopia, ye eke mme Sabean, nyan owo, eyebe etiene fi, enyuŋ enyene fi: eyetiene fi eka; ke ŋkpɔkɔbi ke mmɔ edibe, enyuŋ enuhɔ enɔ fi, enyuŋ ekpe fi ubɔk, ete, Abasi odu ke otu mbufo ikpɔŋ: efen inyuŋ iduhe, Abasi iduhe.

¹⁵Ke akpanikɔ afo edi Abasi eke odibede, O Abasi Israel, andinyaŋa.

¹⁶But ye esuene ŋko eyenam mmɔ kpukpru: mmɔ eke esɔide mbiet ŋkpɔ eduk ke esuene ini kiet.

¹⁷Jehovah anyaŋa Israel nsinsi erinyaŋa: but ye esuene idinamke mmɔ ke nsinsi-nsinsi.

¹⁸Koro emi edi uyo Jehovah andibot enyɔŋ; enye edi Abasi emi obotde isɔŋ, onyuŋ anamde enye; enye owuk enye, ibotke enye ke ikpikpu, obot enye man eduŋ ke esit: ami ndi Jehovah, ndien efen iduhe.

¹⁹Ŋkɔdɔhɔke ke ndibe ebiet, ke ŋkim-ŋkim ebiet isɔŋ: ndɔhɔke ubon Jacob, nte, Mbufo eyom mi ikpikpu: ami Jehovah ndɔhɔ akpanikɔ, ntiŋ se inende.

²⁰Mbufo mbio mme idut eke ebɔhɔde, esop idem edi; esaŋa ɔtɔ kiet ekpere; mmɔ eke ebiomde eto edisɔi mbiet mmɔ, enyuŋ enamde mkpe ubɔk enɔ Abasi eke mikemeke ndinyaŋa, ifiɔkke ŋkpɔ.

²¹Mbufo etiŋ, enyuŋ eda edi; yak mmɔ enyuŋ esobo ibuot ɔtɔ kiet: anie okobuk emi ke eset? anie eketiŋ enye tutu ko? Nte idige ami Jehovah? ndien Abasi efen iduhe ke mibɔhɔke ami: edinen Abasi emi onyuŋ edide andinyaŋa iduhe ikɔrɔ ye ami.

²²Mbufo kpukpru mme idut ererimbot, ekabare ese mi, ndien eyenyaŋa mbufo: koro ami ndide Abasi, ndien efen iduhe aba.

²³Mmotomo idem mi, ikɔ ɔmɔwɔrɔ mi ke inua edinen, idinyuŋ ifiakke, nte kpukpru edɔŋ eyetɔŋɔ enɔ mi, kpukpru edeme eyenyuŋ etomo.

²⁴Owo ɔdɔhɔ, ete, Ami nnyene edinen ido ye odudu ke Jehovah ikpɔŋ-ikpɔŋ: enye eyebine enye; ndien but eyenam kpukpru mmɔ eke eyatde esit ye enye.

²⁵Ikpe eyesana ofuri ubon Israel, mmɔ eyenyuŋ ebure ke Jehovah.