Read efik ISAIAH 48 Bible Online

ISAIAH 48 - efik bible

ISAIAH 48

¹EKOP ŋkpɔ emi, mbufo ufɔk Jacob, emi ekerede enyiŋ Israel, emi ekenyuŋ etode ke mmɔŋ Judah, emi etomode enyiŋ Jehovah, enyuŋ etiŋde enyiŋ Abasi Israel, edi idige ke akpanikɔ, inyuŋ idige ke eti ido.

²Koro edade edisana obio esio idem mmɔ enyiŋ, enyuŋ ebuɔtde idem mmɔ ye Abasi Israel; Jehovah mme udim edi enyiŋ esie.

³Ŋkasiak mbemiso ŋkpɔ ke ini oro; mmɔ ekenyuŋ ewɔrɔ mi ke inua, ŋkonyuŋ nnam ekop mmɔ: nnam mmɔ ke ibumere, ndien mmɔ edi.

⁴Oto koro ŋkɔfiɔkde nte ke afo ɔsɔsɔŋ ibuot, itɔŋ fo onyuŋ edi idut ukwak, ɔkpɔ-iso fo onyuŋ edi okpoho;

⁵oro esin ŋkasian fi tutu ko; ŋketiŋ nnɔ fi ke mika-iwɔrɔke kaŋa; mbak afo edidɔhɔ ete, Idem mi akanam mmɔ, edisɔi mbiet mi, ye editara mbiet mi enyuŋ ewuk mmɔ.

⁶Afo ama okop, se enye ofuri; nte mbufo iditiŋke ndien? Nsiak mbufa ŋkpɔ nnɔ fi ke idem ini emi, ye ŋkpɔ eke enimde, ndien afo ufiɔkke mmɔ.

⁷Ke emi ke emebot mmɔ, tutu osim mfin emi; mbak afo edidɔhɔ, ete, Sese, mma mfɔfiɔk mmɔ.

⁸Afo ukokopke ŋko; unyuŋ ufiɔkke ŋko; utɔŋ fo ikonyuŋ itarake tutu ko: koro ŋkɔfiɔkde nte ke afo eyebiaŋa eti-eti; afo onyuŋ ekere anam-idiɔk toto nte akamamana.

⁹Nyekpɔnɔre kaŋa iyaresit mi nnim mbaŋa enyiŋ mi, nyenyuŋ mmum enye ŋkama nnɔ fi mbaŋa itoro mi, mbak ndisibe fi mfep.

¹⁰Sese, mmatara fi, edi idige ke silver; ndomo fi ke akamba ikaŋ ukut.

¹¹Nyenam mbaŋa idem mi, kpa idem mi: koro edinam didie esabare enyiŋ mi? Ndinyuŋ ndaha ubɔŋ mi nnɔ owo efen.

¹²Kop uyo mi, O Jacob, ye Israel, emi ŋkotde; ami ndi enye; ami ndi mbemiso, ami ŋko ndi akpatre.

¹³Ubɔk mi ŋko okonim ererimbot ke itie esie, ubɔk nnasia mi onyuŋ eneŋere ikpa-enyɔŋ: ŋkot mmɔ edi, mmɔ edaha eda ini kiet.

¹⁴Mbufo kpukpru esop idem, enyuŋ ekop; anie ke otu mmɔ akasiak ŋkpɔ emi? Jehovah ama enye; enye eyenam se amade ke Babylon, ubɔk esie eyenyuŋ anam mme Chaldean.

¹⁵Ami, kpa ami, ŋkɔdɔhɔ; ŋkot enye edi ŋko: nda enye ndi, ndien enye okut unen ke usuŋ esie.

¹⁶Mbufo esaŋa ekpere mi, ekop ŋkpɔ emi: ŋkɔdɔhɔke ke ndibe ke eritɔŋɔ; toto nte enye okodu, ami ndu do; ndien ke emi Ɔbɔŋ Jehovah ɔmɔdɔŋ mi ye spirit esie.

¹⁷Ntem ke Jehovah, andifak fi, kpa Edisana Abasi Israel, ɔdɔhɔ, ete, Ami ndi Jehovah Abasi fo, emi ŋkpepde fi usuŋ udori, nda fi usuŋ eke afo edisaŋade.

¹⁸Afo akpakam akpaŋ utɔŋ ke mbet mi! ndien emem fo ekpebiet akpa mmɔŋ, edinen ido fo ekpebiet mbufut inyaŋ.

¹⁹Ndien nditɔ fo ekpebiet ntan, se iwɔrɔde fi ke idibi okponyuŋ ebiet se iwɔrɔde enye ke idibi; ikpesibeke ikponyuŋ isoboke enyiŋ esie ifep ke iso mi.

²⁰Mbufo eto ke Babylon ewɔŋɔ, ebɔhɔ ke otu mme Chaldean, esio mkpo idara, etiŋ emi, ebuk enye, ekwɔrɔ enye tutu osim ke utit ererimbot; mbufo edɔhɔ, ete, Jehovah amafak owo esie Jacob.

²¹Ndien itɔŋ ikasatke mmɔ ke wilderness, eke enye akadade mmɔ asaŋa ke esit: enye osio mmɔŋ ke akwa itiat ɔnɔ mmɔ: onyuŋ asiak akwa itiat, ndien mmɔŋ ɔwɔrɔ ke esit.

²²Jehovah ɔdɔhɔ, ete, Mme idiɔk owo inyeneke emem.