Read efik ISAIAH 51 Bible Online

ISAIAH 51 - efik bible

ISAIAH 51

¹MBUFO eke ebinede eti ido eyom Jehovah, ekop uyo mi: ese akwa itiat eke ekesɔide mbufo, ye inua obube eke eketibide mbufo esio.

²Mbufo ese Abraham ete mbufo, ye Sarah emi akamande mbufo: koro enye edide kierakiet ke ini ŋkotde enye, nnyuŋ ndiɔŋ enye, nnyuŋ nnam enye awak.

³Koro Jehovah ɔmɔdɔŋ Zion esit: ɔmɔdɔŋ kpukpru mme ŋwure esie esit; omonyuŋ anam wilderness esie ebiet Eden, anam desert esie ebiet iŋwaŋ Jehovah; eyekut mbre ye idara ke esit, ekɔm, ye uyo ikwɔ.

⁴Ikɔt mi, mbufo ekpaŋ utɔŋ enɔ mi; mbio-obio mi, mbufo enyuŋ ekop uyo mi: koro ewuhɔ eyeto mi ɔwɔrɔ, nyenyuŋ ŋwuk ikpe mi nnim ke uŋwana mme idut.

⁵Edinen ido mi emekpere; erinyaŋa mi ɔmɔwɔrɔ, ubɔk mi eyenyuŋ ekpe ikpe mme idut; mme isuo eyebet mi, enyuŋ edori enyin ke ubɔk mi.

⁶Mbufo emenere enyin mbufo ke enyɔŋ, enyuŋ ese isɔŋ ke idak; koro enyɔŋ eyesuana nte nsuŋikaŋ, isɔŋ eyenyuŋ ataha nte ɔfɔŋidem, ndien mme andiduŋ enye eyekpaŋa ŋko kpasuk ntre: edi erinyaŋa mi eyebigi ke nsinsi, eti ido mi idinyuŋ inuahake.

⁷Ekop uyo mi, mbufo emi efiɔkde eti ido, mbio emi mbet mi odude mmɔ ke esit; mbufo ekufehe esuene owo, nsia okonyuŋ oyomo mbufo abaŋa isuŋi mmɔ.

⁸Koro ŋkpri unam eyeta mmɔ nte ɔfɔŋidem, ndɔŋ eyenyuŋ eta mmɔ nte idet erɔŋ: edi edinen ido mi eyedu ke nsinsi, erinyaŋa mi eyenyuŋ odu ke ofuri emana.

⁹Demere, demere, sine odudu, O ubɔk Jehovah; demere, kpa nte ke eyo oko, ke emana eset. Nte idige afo edi enye emi okokpokde Rahab mbio-mbio, okonyuŋ owotde dragon?

¹⁰Nte idige afo edi enye emi akanamde akamba mmɔŋ, kpa mmɔŋ akwa inyaŋ asat? emi ekesinde udem akwa mmɔŋ edi usuŋ, eke mmɔ eke ekefakde mmɔ ekpesaŋade ebe?

¹¹Ndien mmɔ eke Jehovah afakde eyefiak edi ke Zion ye mkpo; nsinsi idaresit eyedu mmɔ ke ibuot: mbre ye idaresit eyesim mmɔ; mfuhɔ ye eseme eyefeŋe.

¹²Ami, ami, ndi enye emi ndɔŋde mbufo esit: afo edi anie eke ekpefehede owo emi edikpade, efehe eyen owo emi edinimde enye nte mbiet;

¹³onyuŋ efre Jehovah emi akanamde fi, emi ekeneŋerede enyɔŋ, onyuŋ onimde isɔŋ ke itie esie; ndien osuk edikhe kpukpru ini ke ofuri usen abaŋa iyaresit owo utuk, ke ini enye otimde ŋkpɔ, ete ibiat?

¹⁴Ndien iyaresit owo utuk oro odu mmɔŋ? Owo eke ɔnuhɔde awara ndikpɔhɔre, enye idikpaha ke obube, idinyuŋ inanake udia esie.

¹⁵Ndien ami ndi Jehovah Abasi fo emi edemerede inyaŋ, ndien enye adaha okpot: Jehovah mme udim edi enyiŋ esie.

¹⁶Ŋkonyuŋ nsin fi ikɔ mi ke inua, nnyuŋ mfuk fi ke mfut ubɔk mi, man afo eneŋere ikpa-enyɔŋ, onyuŋ owuk isɔŋ ke itie esie, onyuŋ ɔdɔhɔ Zion, ete, Afo edi ikɔt mi.

¹⁷Demere, demere, daha ke enyɔŋ, Jerusalem, emi ɔkɔbɔde Jehovah cup iyaresit esie ke ubɔk ɔŋwɔŋ; afo ɔkɔŋwɔŋ bowl, kpa cup ufum, ɔkɔrɔde.

¹⁸Baba owo kiet ke otu kpukpru nditɔ emi enye akamande idaha enye usuŋ; baba owo kiet ke otu kpukpru nditɔ emi enye ɔkɔbɔkde imumke enye ubɔk ikama.

¹⁹Ŋkpɔ iba oro emesim fi: anie editua fi mbɔm? nditaha ye nsobo, ye akaŋ ye ofut: nnam didie ndɔŋ fi esit?

²⁰Idem akpa nditɔ fo: mmɔ ena ke ibuot kpukpru mme efak, ebiet enaŋ ikɔt ke iyire: eyuhɔ ifuresit Jehovah, nduari Abasi fo.

²¹Kop emi, ndien, afo owo ukut, emi ɔyuhɔde, edi idige wine: emi edi uyo Ɔbɔŋ Jehovah,

²²ye eke Abasi fo, enye eyekpe ikɔ ikɔt esie, ete, Sese, mmosio fi cup ufum ke ubɔk, nsio bowl kpa cup ifuresit mi; afo udumanake uŋwɔŋ aba enye:

²³edi nda enye nsin ke ubɔk mmɔ emi etuhɔde fi: emi ekedɔhɔde ukpɔŋ fo, ete, Nuhɔ, man nnyin isaŋa ibe: ndien afo ama onim edem fo nte isɔŋ, ye nte efak ɔnɔ mmɔ eke esaŋade ebe.