Read efik ISAIAH 52 Bible Online

ISAIAH 52 - efik bible

ISAIAH 52

¹DEMERE, demere, sine odudu fo ke idem, O Zion; sine edisine-ŋkpɔ uyai fo, O Jerusalem, edisana obio: koro owo edut ye ndek miditɔŋɔke aba ntak iduk fi ke esit.

²Keŋ ntan ke idem fo fep; daha ke enyɔŋ neŋere tie, O Jerusalem: kpɔhɔre ŋkpɔkɔbi itɔŋ fo, O adiaha Zion emi etaŋde efep.

³Koro ntem ke Jehovah ɔdɔhɔ ete, Ekenyam mbufo ke ikpikpu; ndien ididaha okuk ifak mbufo.

⁴Koro ntem ke Ɔbɔŋ Jehovah ɔdɔhɔ, ete, Ikɔt mi ekesuhɔre ke Egypt ke eritɔŋɔ man eduŋ do; ndien mme Assyrian ekefik mmɔ ke minyeneke ntak.

⁵Jehovah onyuŋ ɔdɔhɔ, ete, Nso ŋkpɔ ke nnyene mi, ndien, emi emende ikɔt mi efep ke ikpikpu? Jehovah ɔdɔhɔ, ete, Mmɔ emi ekarade mmɔ efiori, enyuŋ esuk esuene enyiŋ mi ke kpukpru ini ke ofuri usen.

⁶Mmɔdo ikɔt mi eyefiɔk enyiŋ mi: mmɔdo ke usen oro mmɔ eyefiɔk, ete ke ami ndi enye emi ɔdɔhɔde, ete, Se mi.

⁷Ukot owo eti mbuk eye didie ke enyɔŋ ikpɔ obot! ukot owo eke ɔkwɔrɔde emem, eke obukde eti ŋkpɔ, eke ɔkwɔrɔde erinyaŋa; ɔdɔhɔ Zion, ete, Abasi fo ada ubɔŋ! (Kop!)

⁸uyo mbon ukpeme fo! mmɔ emenere uyo, efiori uyo kiet: koro mmɔ eyekut enyin ke enyin, ke ini Jehovah afiakde ke Zion.

⁹Mbufo mme ŋwure Jerusalem, ebumere ekwɔ uyo kiet: koro Jehovah ɔdɔŋde ikɔt esie esit:

¹⁰enye afak Jerusalem. Jehovah ɔmɔfuhɔre edisana ubɔk esie ke enyin kpukpru mme idut; kpukpru mme utit ererimbot eyenyuŋ ekut erinyaŋa Abasi nnyin.

¹¹Mbufo edaŋa! edaŋa! ewɔŋɔ ke esit! ekutuk ŋkpɔ ndek: ewɔŋɔ enye ke ufɔt; mbufo emi ebiomde ŋkpɔ utom Jehovah, enam idem mbufo esana.

¹²Koro mbufo midiwɔŋɔke ke ibumere, midinyuŋ isaŋake itɔk-itɔk: koro Jehovah eyebem mbufo iso asaŋa, Abasi Israel eyenyuŋ asaŋa mbufo ke edem.

¹³Sese, owo mi eyenam ɔniɔŋ ɔniɔŋ, eyeforo, eyedoro ke enyɔŋ, onyuŋ okoŋ eti-eti.

¹⁴Kpa nte ediwak owo eyikde ebaŋa fi; iso esie abiara akan eke owo, uyai esie onyuŋ abiara akan eke nditɔ owo:

¹⁵kpa ntre ke enye edisime ediwak mme idut; ndidem eyekubi inua enɔ enye: koro emekut se miketiŋke inɔ mmɔ, emenyuŋ enim ibuot ke se mmɔ mikokopke.