Read efik ISAIAH 54 Bible Online

ISAIAH 54 - efik bible

ISAIAH 54

¹KWƆ O ada emi mumanke eyen: bumere kwɔ, nyuŋ fiori, afo emi uman mitukke fi: koro nditɔ ikpɔŋ aŋwan ewakde ekan nditɔ aŋwan owo: Jehovah ɔdɔhɔ.

²Ŋwaŋade ebiet tent fo, yak mmɔ enyuŋ eneŋere ikpehe iduŋ fo ekɔŋ: kufat ubɔk, nam uruk fo ɔniɔŋ, nyuŋ nam ɔkpɔhɔ fo esɔŋɔ:

³koro afo eyesiaha ke nnasia ye ke ufien; ubon fo eyenyuŋ eda mme idut enyene, enyuŋ eda ndiwure obio eduŋ.

⁴Kufehe: koro but midinamke fi; kunyuŋ uyak nsia oyomo fi: koro afo mudukwe esuene: koro afo eyefre but uyen fo; udunyuŋ utihi aba itie-ebe-akpa fo.

⁵Koro andibot fi edide uberi; Jehovah mme udim edi enyiŋ esie; andifak fi onyuŋ edi Edisana Abasi Israel; enye eyekere Abasi ofuri ererimbot.

⁶Koro Jehovah okotde fi, kpa nte ŋwan eke owo ɔduɔkde, eke esit onyuŋ ɔduɔde enye, ye nte ŋwan eyen, ke esiode enye, Abasi fo ɔdɔhɔ.

⁷Ŋkɔduɔk fi ini esisit; ndien nyetaŋ fi ke akwa mbɔm.

⁸Ke ibumere iyaresit ke ŋkodip fi iso mi ini esisit; ndien nda nsinsi ima ntua fi mbɔm; Jehovah andifak fi ɔdɔhɔ.

⁹Koro emi etiede nte mmɔŋ Noah ye ami: kpa nte ŋkɔŋwɔŋɔde, nte ke mmɔŋ Noah idiyɔhɔke aba ifuk isɔŋ; kpa ntre ke ŋkɔŋwɔŋɔ nte ke nditɔhɔke aba ye afo, ndinyuŋ nduarike aba fi.

¹⁰Koro ikpɔ obot eyesehere, ŋkpri eyenyuŋ enyek: edi ima mi idisehekede ikpɔŋ fi, ediomi emem mi idinyuŋ inyekke; emi edi uyo Jehovah emi atuade fi mbɔm.

¹¹Eyen ukut, ɔbɔŋ oyobio, ukopke ndɔŋesit, sese, ami nyenim mme itiat fo ke antimony, nnyuŋ ntɔŋɔ ndibɔp fi ke mme sapphire.

¹²Nyenyuŋ nnam mme tower fo ke ruby, nyenam enyin-usuŋ fo ke edisem itiat, ye kpukpru mme adaŋa fo ke edifɔn itiat.

¹³Jehovah eyenyuŋ eteme kpukpru nditɔ fo; ndien emem nditɔ fo okpon.

¹⁴Eti ido eyenam fi ɔsɔŋɔ ada: nyomo-nsia eyeyom usuŋ ye afo: koro afo mududikheke; afo eyeyom usuŋ ke akpakop ndik: koro enye midisaŋake ikpere fi. Sese, mmɔ eyesop idem, edi itoho ye ami.

¹⁵Anie osop ntem abaŋa fi? enye eyekabare adian idem ye afo.

¹⁶Sese, edi ami mbot odom-utim eke ofukde utim ke ikaŋ ukaŋ, onyuŋ osiode ŋkpɔ unam utom esie; edi ami nnyuŋ mbot osobo-nsobo, nte enye abiat.

¹⁷Baba ŋkpɔ ekɔŋ kiet eke ebotde ebaŋa fi idikwe unen; afo eyenyuŋ anam ikɔ otip kpukpru edeme eke edahade eda enam ikɔ ye afo. Jehovah ɔdɔhɔ ete, Emi edi udeme ikɔt Jehovah, edinen ido mmɔ onyuŋ oto ye ami.