Read efik ISAIAH 56 Bible Online

ISAIAH 56 - efik bible

ISAIAH 56

¹NTEM ke Jehovah ɔdɔhɔ ete, Mbufo enim ikpe, enyuŋ enam se inende: koro erinyaŋa mi emekpere ndidi, edinen ido mi omonyuŋ ekpere ndiyarare.

²Ɔfɔfɔn ɔnɔ owo eke edinamde ŋkpɔ emi, ɔnɔ eyen owo eke edimumde ŋkpɔ emi akama; eke ekpemede sabbath, ndien mibiatke enye, onyuŋ ekpemede ubɔk esiemɔ, mbak edinam idiɔkŋkpɔ ekededi.

³Ndien kuyak eyen idut eke adiande idem ye Jehovah ɔdɔhɔ ete, Jehovah amadianare mi ke ikɔt esie efep; eunuch okunyuŋ ɔdɔhɔ ete, Sese, ami ndi edisat eto.

⁴Koro ntem ke Jehovah ɔdɔhɔ mme eunuch eke edikpemede sabbath mi, edinyuŋ emekde se inemde mi esit, enyuŋ emumde ediomi mi ekama; ete,

⁵Nyeda ŋkpɔ eriti ye enyiŋ eke efɔnde ekan eke nditɔ-iren ye nditɔ-iban, nnɔ mmɔ ke ufɔk mi, ye ke esit ibibene mi: nyenɔ mmɔ nsinsi-enyiŋ eke midisibeke ifep.

⁶Ndien ama edi nditɔ isen owo ŋko emi ediande idem ye Jehovah, enyuŋ enamde ŋkpɔ esie, enyuŋ emade enyiŋ Jehovah, enyuŋ edide ikɔt esie: kpukpru mmɔ eke enimde sabbath, mbak edibiat enye, enyuŋ emumde ediomi mi ekama:

⁷nyeda mmɔ ndi ke edisana obot mi, nnyuŋ nnam mmɔ edat esit ke ufɔk akam mi: ndifɔp uwa mmɔ ye mme uwa emem mmɔ eyedi ŋkpɔ inem ke itie-uwa mi; koro ufɔk mi eyekere, ete, Ufɔk akam kpukpru mme idut.

⁸Ɔbɔŋ Jehovah, emi obonde nditɔ Israel eke ekebinde efep, ete, Nyesuk mbon (owo efen) nnɔ enye, ŋkɔrɔ ye nditɔ esie emi ema ekebono.

⁹Mbufo kpukpru mme unam ikɔt, ye mbufo kpukpru mme unam ke akai, edi edita.

¹⁰Mbon ukpeme esie kpukpru edi nnan; ifiɔkke, kpukpru mmɔ edi ebua imum, ikemeke ndikpɔi; ke edaba ndap, ke esuhɔre ena, ke ema ndide idap.

¹¹Mme ebua emi ŋko ekpum okpum, ifiɔkke uyuhɔ; ndien mme ekpemerɔŋ ŋko ke idem mmɔ ifiɔkke nditim nnam: kpukpru mmɔ emekabare ese usuŋ mmɔ, owo kiet kiet ese udori esiemɔ eke otode ke edem esie.

¹²“Mbufo edi! nyeda wine ndi, ndien nnyin iyeŋwɔŋ mmin ikpa; ndien mkpɔŋ eyetie kpa nte mfin, akamba, awak akaha.”