Read efik ISAIAH 57 Bible Online

ISAIAH 57 - efik bible

ISAIAH 57

¹EDINEN owo atak, ndien baba owo kiet ikereke ke esit esie: enyuŋ etaŋ mbon ima efep, ke ini baba owo kiet mifiɔkke, ite, ke etaŋ edinen owo efep ebak idiɔk-ŋkpɔ.

²Enye eyeduk ke ifure: mmɔ eyeduɔk odudu ke mkpana mmɔ, kpa owo eke eneŋerede asaŋa.

³Ama edi mbufo, nditɔ ŋwan idiɔŋ, ubon ŋwan efibe, ye eke akpara, esaŋa ekpere ken.

⁴Mbufo esesak anie? eŋwaŋade inua enyuŋ esio edeme ebaŋa anie? Nte mbufo idige nditɔ nsɔŋ ibuot, ubon nsu?

⁵Ke efiop idem mbufo ke otu mme ofriyo, ke idak kpukpru awawa eto, ke ewot nditɔ-ɔwɔŋ ke mme ebedeŋ ke idak nsiaha ikpɔ itiat?

⁶Udeme fo odu ke ndɔnɔ (itiat) ebedeŋ; mmɔ mmɔ edi afia fo: afo ama aŋwaŋa ediŋwɔŋ uwa ɔnɔ mmɔ, awa inuak-udia. Nte ekeme ndisuk mi esit ke ŋkpɔ emi?

⁷Afo omonim mkpana fo ke enyɔŋ edikoŋ ye akamba obot: omonyuŋ ɔdɔk do aka ndiwa uwa.

⁸Onyuŋ onim ŋkpɔ eriti fo ke edem itim ye obubɔk enyin-usuŋ: koro afo ɔmɔkpɔŋ mi ɔfuhɔre idem: onyuŋ ɔdɔk, anam mkpana fo okpon, onyuŋ odiomi ediomi ye mmɔ, amama mkpana mmɔ, omokut ebiet.

⁹Afo omonyuŋ aka ɔtɔ edidem ye aran, onyuŋ ada ediwak ufuɔŋkpɔ fo: onyuŋ ɔdɔŋ mme isuŋ fo utom ke anyan ebiet, onyuŋ ɔduɔk idem tutu osim ke hell.

¹⁰Afo enyene utom ke uwak isaŋ fo; udɔhɔke, ete, ɔwɔrɔ ikpikpu. Omokut uwem ubɔk fo; oro iyakke idem efere fi.

¹¹Afo onyuŋ abak, onyuŋ efehe anie, eke okosude nsu, ndien mutihi mi, munyuŋ ukereke ke esit? Nte ami ndopke uyo toto ke idem eyo oko, ndien afo ubakke mi?

¹²Nyebuk eti ido fo, ye ŋkpɔ eke afo anamde: ndien mmɔ ididodoke fi baba.

¹³Ke ini afo esemede, yak kpukpru ntaŋ-mbon ŋkpɔ fo enyaŋa fi; ndien ofum eyekpɔri kpukpru mmɔ efep; ibifik eyeda mmɔ efep. Edi owo eke ɔbuɔtde idem esie ye ami eyedia isɔŋ, onyuŋ ada edisana obot mi enyene;

¹⁴ndien owo eyedɔhɔ ete, Mbufo eda ekubi, eda ekubi, ediɔŋ usuŋ, emen ŋkpɔ utuaha-nduɔ ke usuŋ ikɔt mi efep.

¹⁵Koro emi edi uyo Enye emi okoŋde, onyuŋ emenerede ke enyɔŋ, emi oduŋde ke nsinsi, enyiŋ esie onyuŋ edi edisana, ete, Ami nyeduŋ ke edikoŋ ye edisana ebiet, nyenyuŋ nduŋ ye enye emi otukde onyuŋ ɔsuhɔrede spirit esiemɔ, nte ndemere spirit mmɔ eke esuhɔrede idem mmɔ enim, nnyuŋ ndemere esit mmɔ eke etukde idem mmɔ.

¹⁶Koro mmeditɔhɔke utɔk ke nsinsi, ndinyuŋ nyatke esit tutu amama: koro spirit eyekpa ke iso mi, kpa mme ukpɔŋ emi ami ŋkanamde.

¹⁷Ŋkayat esit mbaŋa idiɔk mbumek esie, nnyuŋ mmiŋa enye: ŋkedibe nnyuŋ nyat esit: ndien enye asaŋa akabare akabare ke usuŋ esit esiemɔ.

¹⁸Mmokut ido esie, ndien nyekɔk enye: nnyuŋ nda enye usuŋ, nnyuŋ nda emem nnɔ enye ye nditɔ esie emi etuaŋade.

¹⁹Jehovah ɔdɔhɔ ete, Mbot mfri mkpɔk-inua; emem, emem, nnɔ owo eke oyomde usuŋ ye owo eke ekperede, ndien nyekɔk enye.

²⁰Ndien mme idiɔk owo ebiet nyoyoho inyaŋ; koro enye mikemeke ndina suŋ; mmɔŋ esie onyuŋ ɔburɔde ndek ye mbat.

²¹Abasi mi ɔdɔhɔ mme idiɔk owo, Emem iduhe.