Read efik ISAIAH 59 Bible Online

ISAIAH 59 - efik bible

ISAIAH 59

¹SESE, ubɔk Jehovah ikabakede imuhɔ ikan nte enye anyaŋade; utɔŋ esie inyuŋ idobike ikan nte enye okopde;

²edi mme idiɔk ŋkpɔ mbufo emedianare mbufo ye Abasi mbufo, mme oburobut ido mbufo emenyuŋ edip mbufo iso esie, esin enye okukop.

³Koro iyip asabarede mbufo ubɔk, idiɔk ido onyuŋ asabare mbufo nnuenubɔk; mkpɔk-inua mbufo ededɔhɔ nsu, edeme mbufo etetiŋ ukwaŋ-ŋkpɔ.

⁴Baba owo kiet ikotke (owo) ke edinen ido, baba kiet inyuŋ ikpehe ikpe ke akpanikɔ: mmɔ ebuɔt idem mmɔ ke se idide ikpikpu, enyuŋ edɔhɔ nsu; eyomo ibak, enyuŋ eman ukwaŋ-ŋkpɔ.

⁵Mmɔ ekubɔ nsen uruk-ikɔt, enyuŋ edɔk mkpaŋ utue: owo eke adiade nsen mmɔ eyekpa; se inuahade eyenyuŋ ɔwɔrɔ ibɔm.

⁶Mkpaŋ mmɔ idikabakede idi ɔfɔŋ-idem, ndien mmɔ ididaha se mmɔ enamde ifuk idem: se mmɔ enamde mmɔ enam ke ibak, utom afai onyuŋ odu mmɔ ke ubɔk.

⁷Ukot mmɔ efeŋe enam se idiɔkde; enyuŋ ewara ndiduɔk iyip owo eke miduehe: ekikere mmɔ edi ekikere ibak; nsobo ye nwure edu ke ɔkpɔ-usuŋ mmɔ.

⁸Mmɔ ifiɔkke usuŋ emem; eti ido inyuŋ iduhe ke ɔkpɔ-usuŋ mmɔ: emekwaŋa usuŋ mmɔ ke idem mmɔ: baba owo kiet eke asaŋade ke esit ifiɔkke emem.

⁹Oro esin edinen ikpe oyom usuŋ ye nnyin, edinen ido idinyuŋ isimke nnyin: nnyin ibet uŋwana ndien sese ekim; ibet uyama, ndien sese, isaŋa ke mbubreyo.

¹⁰Nnyin ifefiɔŋɔ ibibene nte nnan, ifiɔŋɔ nte mme anana enyin: ituak ukot iduɔ ke ufɔt uwemeyo, kpa nte ke mfuŋ-mfuŋ mbubreyo; ke ata ekim kpa nte mme akpaŋa mkpa.

¹¹Kpukpru nnyin ikuni nte bear, inyuŋ imum mmum nte ibiom; ibet edinen ikpe, edi iduhe du; itie ibet erinyaŋa, edi oyom usuŋ ye nnyin.

¹²Koro mme idiɔk ido nnyin ewakde ke iso fo, mme ukwaŋ-ŋkpɔ nnyin enyuŋ ebɔrɔ ebaŋa nnyin: koro mme idiɔk ido nnyin edude ye nnyin; ndien ama edi mme ukwaŋ-ŋkpɔ nnyin imɔfiɔk mmɔ.

¹³Ke inam idiɔk, isu nsu, ibaŋa Jehovah, ikabare ikpɔŋ Abasi nnyin, idɔhɔ ufik ye nsɔŋ-ibuot, iyomo inyuŋ itiŋ ikɔ nsu ke esit.

¹⁴Enyuŋ ebin edinen ido afiak edem, eti ido onyuŋ ada nsan-nsan: koro akpanikɔ ɔmɔduɔ ke aŋwa, se inende inyuŋ ikemeke ndiduk.

¹⁵Ndien akpanikɔ anana; owo eke akabarede ɔkpɔŋ idiɔk onyuŋ onim idem esie ke ŋkpɔ mbume. Ndien Jehovah okut, ndien ɔdiɔk enye ke enyin, koro edinen ikpe miduhe.

¹⁶Ndien enye okut ete ke owo baba kiet iduhe, onyuŋ eyik koro baba esine-ufɔt miduhe: ndien ubɔk esie anyaŋa ɔnɔ enye: edinen ido esiemɔ onyuŋ omum enye akama.

¹⁷Ndien enye esine edinen ido ke idem nte edisine-ŋkpɔ, onyuŋ ayara ndun erinyaŋa ke ibuot: onyuŋ esine ɔfɔŋ-idem usiene ke edisine-ŋkpɔ, onyuŋ ada ufup ofuk idem nte ekura.

¹⁸Kpa nte ido mmɔ asaŋade, kpa ntre ke enye edinɔ, ɔnɔ mme usua esie iyat esit, ɔnɔ mmɔ eke etɔhɔde ye enye se mmɔ edotde; eyenɔ mme isuo se mmɔ edotde.

¹⁹Ndien owo eyeto ke edem usop-utin edibak enyiŋ Jehovah, eto ke edem usiaha edibak ubɔŋ esie. Ke ini usua odukde nte akpa mmɔŋ, spirit Jehovah eyemenere banner ke enyɔŋ abaŋa enye.

²⁰Ndien andifak eyedi ke Zion, onyuŋ etiene mmɔ eke ekabarede ekpɔŋ mme idiɔk ido ke Jacob: emi edi uyo Jehovah.

²¹Ndien Jehovah ɔdɔhɔ ete, Ama edi ami, emi edi ediomi mi ye mmɔ: spirit mi emi odorode fi ke idem, ye ikɔ mi emi nsinde fi ke inua, idikpɔŋke inua fo, ye inua nditɔ fo, ye inua nditɔ nditɔ fo, ke emi ye ke nsinsi: emi edi uyo Jehovah.