Read efik ISAIAH 61 Bible Online

ISAIAH 61 - efik bible

ISAIAH 61

¹SPIRIT Ɔbɔŋ Jehovah odoro mi: koro, Jehovah emeyet mi aran onim, man mbuk eti mbuk nnɔ mbon nsuk-esit; ɔmɔdɔŋ mi, ete mbɔp mmɔ eke esit mmɔ ɔbuŋɔde, ŋkwɔrɔ uwɔrɔ-ufin nnɔ mbuot ekɔŋ, ŋkwɔrɔ nsana-nyak nnɔ mmɔ eke ekɔbide;

²ŋkwɔrɔ isua mfɔnido Jehovah, ye usen usiene Abasi nnyin; ndɔŋ kpukpru mme atua-eyet esit;

³ete, nnim nnɔ nditɔ Zion eke etuade, nnɔ mmɔ anyanya ke ibuot ntɔŋ, aran idaresit ke ibuot ntuaŋa, ɔfɔŋ-idem itoro ke ibuot mkpa-esit; ndien mmɔ eyekere ete, Ofriyo eti ido emi Jehovah ɔkɔtɔde, man ada ukpono ke esit.

⁴Ndien mmɔ eyebɔp ŋwure ebiet eset, eneŋere akani nsobo, eyenyuŋ ediɔŋ mme obio eke ebiarade, mme nsobo ediwak emana.

⁵Ndien isen owo eyeda ebɔk ŋkpri ufene mbufo, nditɔ idut eyenyuŋ ekabare edi mme ofuŋ-isɔŋ mbufo ye mme ɔdiɔŋ-vine mbufo.

⁶Ndien mbufo eyekere mme oku Jehovah; eyenyuŋ edɔhɔ ebaŋa mbufo, ete, Mme anam-ŋkpɔ Abasi nnyin: mbufo eyedia inyene mme idut, enyuŋ ebɔ mmɔ ubɔŋ eda ke idem mbufo.

⁷Ke ibuot but mbufo eyekut ikaba; ndien ke ibuot esuene mmɔ eyedara ke udeme mmɔ: mmɔdo ke isɔŋ mmɔ ke mmɔ edida ikaba enyene: nsinsi idaresit eyenyene mmɔ.

⁸Koro ami Jehovah mmama ikpe, nsasua se edade ke ŋwo; ndien ami nyenɔ mmɔ ŋkpɔ eyen-utom mmɔ ke akpanikɔ, nnyuŋ ndiomi nsinsi ediomi ye mmɔ.

⁹Ndien eyediɔŋɔ nditɔ mmɔ ke otu mme idut, eyediɔŋɔ ubon mmɔ ke otu mme obio; kpukpru mmɔ eke edikutde mmɔ eyediɔŋɔ mmɔ, ete ke mmɔ edi nditɔ eke Jehovah ɔdiɔŋde.

¹⁰Nyedat esit eti-eti ke Jehovah, ukpɔŋ mi eyebre abaŋa Abasi mi: koro enye emesine mi edisine-ŋkpɔ erinyaŋa ke idem, amada ekura edinen ido ofuk mi, kpa nte ɔdɔ-ŋwan ayarade anyanya esiemɔ, ye nte ŋwan ndɔ esinede ŋkpɔ mbana esie ke idem.

¹¹Koro kpa nte isɔŋ osioŋode ŋkpɔ emi ɔkɔride ke esit, ye nte iŋwaŋ ŋko onyuŋ otibede se etɔde ke esit: kpa ntre ke Ɔbɔŋ Jehovah edinam edinen ido ye itoro etibe ke iso kpukpru mme idut.