Read efik ISAIAH 62 Bible Online

ISAIAH 62 - efik bible

ISAIAH 62

¹NDIDOPKE uyo mbaŋa Zion, ndinyuŋ nnaŋa suŋ mbaŋa Jerusalem, tutu edinen ido esie ɔwɔrɔ nte uyama, ye erinyaŋa esie nte utuenikaŋ eke asakde.

²Ndien mme idut eyekut edinen ido fo, kpukpru ndidem eyenyuŋ ekut ubɔŋ fo: ndien eyesio fi obufa enyiŋ, eke inua Jehovah edisiakde.

³Ndien afo eyedi anya-nya ubɔŋ ke ubɔk Jehovah, ye ŋkpɔ uyara edidem ke eka-ubɔk Abasi fo.

⁴Udukereke aba Azuvah (ŋwan eke ekpɔŋde): isɔŋ fo idinyuŋ ikereke aba Shemamah (desert): edi eyesio fi enyiŋ Hephzibah (ŋwan oro enem mi esit): eyesio isɔŋ fo enyiŋ Beulah (ŋwan emi edɔde): koro afo eyenem Jehovah esit; eyenyuŋ eda isɔŋ fo edɔ.

⁵Koro kpa nte akparawa ɔdɔde eyen-aŋwan, kpa ntre ke nditɔ-iren fo edidɔ fi: ndien kpa nte ɔdɔ-ŋwan adatde esit abaŋa ŋwan ndɔ, kpa ntre ke Abasi fo edidat esit abaŋa fi.

⁶Mmonim mbon-ukpeme ke enyɔŋ ibibene fo, O Jerusalem, mmɔ ididopke uyo baba ke ofuri uwemeyo, ye ke ofuri okoneyo, mbufo emi etide Jehovah ŋkpɔ, ekutie suŋ,

⁷ekunyuŋ eyak enye etie suŋ, tutu enye owuk onyuŋ onim Jerusalem ke itoro ke ererimbot.

⁸Jehovah omotomo ubɔk nnasia esie, ye ubɔk odudu esie, ete, Ndidaha aba ibokpot fo nnɔ mme asua fo eta; nditɔ mme idut idinyuŋ iŋwɔŋke obufa wine fo, emi afo anamde utom ke esit

⁹koro mmɔ eke etaŋde enye eyeta enye, enyuŋ etoro Jehovah; mmɔ eke ebonde eyenyuŋ eŋwɔŋ enye ke edisana okure mi.

¹⁰Mbufo esaŋa ke mme inua-otop, esaŋa ebe; ediɔŋ usuŋ mbio-obio; ekubi ɔkpɔ-usuŋ; etaŋ mme itiat efep; emenere banner enɔ mbio-obio.

¹¹Sese, Jehovah ɔmɔkwɔrɔ osim utit ererimbot, ete, Mbufo edɔhɔ adiaha Zion, ete, Sese, erinyaŋa fo ke edi; sese, utip esie odu ye enye, ŋkpɔ-eyen-utom esie onyuŋ odu enye ke iso.

¹²Ndien mmɔ eyekere edisana mbio, mmɔ eke Jehovah afakde: eyenyuŋ ekot fi, ete Derushah (emi mmɔ eyomde), Ir-lo-neezabah (obio eke owo midikpɔŋke).