Read efik ISAIAH 66 Bible Online

ISAIAH 66 - efik bible

ISAIAH 66

¹NTEM ke Jehovah ɔdɔhɔ, ete, Enyɔŋ edi ebekpo mi, isɔŋ onyuŋ edi udorukot mi: nso ufɔk ke mbufo edibɔp enɔ mi? Nso ebiet ke mbufo edinim ke nduɔk-odudu mi ŋko?

²Ndien Jehovah ɔdɔhɔ, ete, Ubɔk mi akanam kpukpru ŋkpɔ, ndien kpukpru mmɔ emi edu: ndien nyewuk enyin nse owo emi, kpa eyen ukut, emi esit onyuŋ ɔtuhɔde, emi onyuŋ enyekde abaŋa ikɔ mi.

³Eke ɔyɔkde enaŋ owot owo; eke awade eyen erɔŋ atuak ebua itɔŋ; eke odoride inuak-udia osime iyip edi; eke ɔfɔpde incense ɔkɔm ibɔk. Mmɔ ememek usuŋ mmɔ ŋko, ŋkpɔ mbubiam mmɔ enyuŋ enem mmɔ esit.

⁴Ami ŋko nyemek ndutuhɔ mmɔ, nnyuŋ nda se mmɔ edikhede ntiene mmɔ: koro ami ŋkokotde, ndien baba owo kiet eke eyerede iduhe; ŋkɔdɔhɔ, edi mmɔ ikopke: mmɔ enyuŋ enam idiɔk ke enyin mi, enyuŋ emek se mmemmaŋa.

⁵Mbufo emi enyekde idem ke ikɔ esie, ekop ikɔ Jehovah: nditɔ-ete mbufo emi esuade mbufo, enyuŋ ebinde mbufo efep, ebaŋa enyiŋ mi, edɔhɔ ete, “Jehovah eyeda ukpono: nnyin iyenyuŋ ise idaresit mbufo;” ndien but eyenam mmɔ.

⁶Uyom ndutime oto ke obio! uyo oto ke temple! uyo Jehovah emi osiode usiene ye mme asua esie.

⁷Ke uman mika-itukke enye, enye aman; ke ubiak mika-isimke enye, enye aman eyen-eren.

⁸Anie okokop oruk ŋkpɔ ntem? Anie okokut oruk ŋkpɔ nte mmɔ emi? Nte ofuri obio edimana usen kiet? Mme idut edimana ini kiet? Koro uman omotuk Zion, enye omonyuŋ aman nditɔ esie.

⁹Jehovah ɔdɔhɔ, ete, nte ndiyak uman otuk, ndien nnamke aman? Abasi fo ɔdɔhɔ, ete, Nte edi ami nnam owo aman eyen, ndien ndisiri?

¹⁰Mbufo ebre ye Jehovah, enyuŋ edara ebaŋa enye, kpukpru mbufo emi emade enye: kpukpru mbufo emi etuade enye, edara idara ye enye:

¹¹man mbufo ewap eba ndɔŋesit esie eyuhɔ: man mbufo enyimi uyuhɔ ubɔŋ esie enyuŋ edat esit.

¹²Koro ntem ke Jehovah ɔdɔhɔ, ete, Sese, ami mmɔŋ nnyanare emem nnɔ enye nte akpa mmɔŋ, ye ubɔŋ mme idut nte idim mmɔŋ eke eyɔhɔde ada mben: ndien mbufo eyewap eba, eyekɔhɔ ke ŋkaŋ, owo eyenyuŋ etem mbufo ke edɔŋ.

¹³Kpa nte owo emi eka esie ɔdɔŋde enye esit, kpa ntre ke ami ndidɔŋ mbufo esit: ndien eyedɔŋ mbufo esit ke Jerusalem.

¹⁴Ndien mbufo eyekut, ndien esit mbufo eyedara, mme ɔkpɔ mbufo eyenyuŋ efiari nte mbiet: ndien ikɔt Jehovah eyediɔŋɔ ubɔk esie, ndien enye eyefut esit ye mme asua esie.

¹⁵Koro, sese, Jehovah eyedi ke ikaŋ, mme chariot esie eyenyuŋ edi nte oyobio ndikabare iyaresit edi ifiopesit, nnyuŋ ŋkabare nduari esie edi edemikaŋ.

¹⁶Koro Jehovah adade ikaŋ ye ofut esie ɔtɔhɔ ye ofuri obukidem: ndien mmɔ eke Jehovah owotde ewak.

¹⁷Mmɔ eke edianarede idem mmɔ enyuŋ enamde idem mmɔ esana enɔ mme iŋwaŋ-esa, etiene kiet ke edem ke ufɔt, eke etade unam edi ye ŋkpɔ mbubiam ye usine, eyetak, ɔtɔ kiet. Uyo Jehovah edi emi.

¹⁸Ndien ami (ŋkpɔ emi mmɔ enamde enyuŋ ekerede!) Ini emedi ndibon kpukpru mme idut ye usem; ndien mmɔ eyedi edise ubɔŋ mi.

¹⁹Ndien nyenim ŋkpɔ idiɔŋɔ ke otu mmɔ, nnyuŋ nda ndusuk mmɔ emi ebɔhɔde ndɔŋ utom ke otu mme idut, kpa Tarshish, ye Pul, ye Lud, ye mmɔ eke edudide utiga, Tubal ye Javan, kpa mme isuo emi eyomde usuŋ, eke mika-ikopke etop mi, mika-inyuŋ ikwe ubɔŋ mi; ndien mmɔ eyetaŋa ubɔŋ mi ke otu mme idut.

²⁰Ndien mmɔ eyeda kpukpru nditɔ-ete mbufo ke kpukpru mme idut, edisɔk Jehovah ke enɔ, edoro ke horse, ye chariot, ye hammock, ye mule, ye dromedary, ke enyɔŋ edisana obot mi Jerusalem, (emi edi uyo Jehovah), kpa nte nditɔ Israel esinde enɔ ke edisana ŋkpɔ eda edi ke ufɔk Jehovah.

²¹Jehovah onyuŋ ɔdɔhɔ ete, Nyeda ndusuk mmɔ nnim ke oku ye mme Levite.

²²Koro kpa nte mbufa enyɔŋ ye obufa isɔŋ, emi ndinamde, edade ke iso mi kpa ntre ke nditɔ mbufo ye enyiŋ mbufo edida: emi edi uyo Jehovah.

²³Ndien ama ekem, ke kpukpru ɔfiɔŋ, ye kpukpru sabbath, kpukpru obukidem eyedi edituak ibuot ke iso mi; uyo Jehovah edi emi.

²⁴Ndien mmɔ eyewɔŋɔ, ekese okpo mmɔ emi ekesɔŋde ibuot ye ami: koro ndɔŋ mmɔ midikpaha, ikaŋ mmɔ midinyuŋ inimeke; ndien mmɔ eyedoro kpukpru obukidem ndidien.