Read efik ISAIAH 7 Bible Online

ISAIAH 7 - efik bible

ISAIAH 7

¹EDIKEM ke eyo Ahaz eyen Jotham, eyen Uzziah, edidem Judah, Rezin edidem Syria, ye Pekah eyen Ramaliah, edidem Israel, edɔk ke Jerusalem eka ekɔŋ ye enye; edi mmɔ ikemke ubɔk ekɔŋ ye enye.

²Ndien etɔt ufɔk David, ete, Syria ke ɔsuhɔre etie ke otu Ephraim. Ndien esit enyek enye, onyuŋ enyek ikɔt esie, kpa nte ini ofum enyeŋede eto akai.

³Ndien Jehovah ɔdɔhɔ Isaiah, ete, Wɔrɔ, ndien, kosobo ye Ahaz, afo ye Shear-jashub eyen fo, ka ke utit udiɔŋ mmɔŋ enyɔŋ-enyɔŋ mkpɔdiɔhɔ-mmɔŋ ke ɔkpɔ-usuŋ iŋwaŋ ɔdiɔŋ-ɔfɔŋ;

⁴nyuŋ dɔhɔ enye, ete, Kpeme idem, nyuŋ tie suŋ; kudikhe, kunyuŋ uyak esit emem fi, ubaŋa etak ifia ikaŋ iba emi ewɔrɔde nsuŋikaŋ, ubaŋa ikaŋ iyaresit Rezin ye Syria, ye eke eyen Remaliah.

⁵Koro Syria, ye Ephraim, ye eyen Ramaliah, eduakde idiɔk ebaŋa fi, ete,

⁶Yak nnyin idɔk ke Judah ikotuk enye, inyuŋ ikan enye inɔ idem nnyin, inyuŋ inim edidem ke esit, kpa eyen Tabeel.

⁷Ntem ke Ɔbɔŋ Jehovah ɔdɔhɔ, ete,

⁸Ididaha, idinyuŋ isuhe. Koro Damascus edide ibuot Syria, Rezin onyuŋ edi ibuot Damascus; ndien osuk isua ata ye ition, Ephraim eyesuana, etre ndidi idut.

⁹Ndien Samaria edi ibuot Ephraim, eyen Remaliah onyuŋ edi ibuot Samaria. Ke mbufo mibuɔtke idem, ŋkɔm idiberike mbufo.

¹⁰Ndien Jehovah ɔtɔŋɔ ntak ɔdɔhɔ Ahaz, ete,

¹¹Beŋe Jehovah Abasi fo idiɔŋɔ ke idem fo, beŋe enye ke ntuŋɔ, mme ke ata enyɔŋ.

¹²Ndien Ahaz ɔdɔhɔ, ete, Ndibeŋeke, ndinyuŋ ndomoke Jehovah.

¹³Ndien enye ɔdɔhɔ ete, Mbufo, ufɔk David, ekop ndien; nte erifek owo ekekpri akan mbufo, mme oro esin mbufo efek Abasi mi ŋko?

¹⁴Mmɔdo Ɔbɔŋ ke idem esie ɔnɔde mbufo idiɔŋɔ: sese, eyenɔwɔŋ aŋwan oyomo, onyuŋ aman eyen eren, onyuŋ osio enye enyiŋ IMMANUEL.

¹⁵Enye eyedia edibari mmɔŋ-eba ye aran-ɔkwɔk, tutu enye ɔfiɔk ndisin idiɔk, nnyuŋ mmek eti.

¹⁶Koro ke eyenɔwɔŋ oro mika-ifiɔkke kaŋa ndisin idiɔk, nnyuŋ mmek eti, owo eyekpɔŋ isɔŋ emi ndik edidem esie iba anamde fi.

¹⁷Jehovah eyeda oruk usen emi akananam midige toto ke usen oro Ephraim akadahade ɔkpɔŋ Judah, etiene fi, ye ikɔt fo, ye ufɔk usɔ, kpa edidem Assyria.

¹⁸Ndien ama ekem ke usen oro, Jehovah eyesi okot nduyip emi edude ke utit mme akpa mmɔŋ Egypt, okot ɔkwɔk emi edude ke isɔŋ Assyria.

¹⁹Ndien kpukpru mmɔ eyedi edibono ke ikpikpu ebedeŋ, ye ke nsiaha ikpɔ itiat, ye ke kpukpru ɔkɔ ŋkukim, ye ke kpukpru ebiet-ubɔk-ufene.

²⁰Ke usen oro Ɔbɔŋ eyekpe akaraŋ kiet ke edem akpa oko, kpa Assyria, ada okporo ibuot, ye idet ukot: enye eyenyuŋ akwat ntaŋebek efep.

²¹Ndien ama ekem ke usen oro, owo eyebɔk abak uman enaŋ kiet ye erɔŋ iba:

²²ndien ama ekem, koro edinamde ediwak mmɔŋ eba, enye eyedia edibari mmɔŋ eba: koro kpukpru mmɔ eke esuhɔde ke isɔŋ eyedia edibari mmɔŋ eba ye aran-ɔkwɔk.

²³Ndien ama ekem ke usen oro, kpukpru ebiet eke tɔsin vine emi ekpade tɔsin silver, edude do, eyekabare edi akpap ye ikɔt ŋkukim.

²⁴Owo eyeda utiga ye idaŋ eka do; koro ofuri isɔŋ eyedi akpap ye ikɔt ŋkukim.

²⁵Ndien ama edi kpukpru ikpɔ obot emi efuŋde ke udɔk, udukaha do ubak akpap ye ikɔt ŋkukim: ndien enye eyedi ebiet eke edidɔŋde enaŋ eka do, ye eke ŋkpri ufene edidigide.