Read efik LEVITICUS 10 Bible Online

LEVITICUS 10 - efik bible

LEVITICUS 10

¹EKEM Nadab ye Abihu, nditɔ Aaron mbiba, eda ŋkpɔ ufɔp incense mmɔ, esin ikaŋ ke esit, enyuŋ edori incense ke esit, ndien eda esen ikaŋ edi ke iso Jehovah, eke enye okowukde mmɔ ete ekunam.

²Ndien ikaŋ oto ke iso Jehovah, ediwot mmɔ, ndien mmɔ ekpa ke iso Jehovah.

³Ndien Moses ɔdɔhɔ Aaron ete, Emi edi se Jehovah ɔdɔhɔde ete, Kpukpru mmɔ eke esaŋade ekpere mi, enyene ndise mi ke edisana, enyuŋ enyene ndikpono mi ke iso kpukpru owo. Ndien Aaron odop uyo.

⁴Ndien Moses okot Mishael ye Elzaphan, nditɔ Uzziel, eyen ete Aaron, edi, ndien ɔdɔhɔ mmɔ ete, Mbufo esaŋa ekpere ekemen nditɔ ete mbufo ke iso edisana ebiet efep, eda eka ke edem nna.

⁵Ndien mmɔ esaŋa ekpere, ekemen mmɔ ke frock mmɔ eka ke edem nna; kpa nte Moses okowukde.

⁶Ndien Moses ɔdɔhɔ Aaron, ye Eleazar, ye Ithamar, nditɔ esie, ete, Mbufo ekuyarare ŋkpɔ ke ibuot mbufo, ekunyuŋ ewai edisine-ŋkpɔ mbufo, mbak mbufo edikpaŋa, ifuresit edinyuŋ odoro kpukpru owo: edi yak ofuri ufɔk Israel, nditɔ ete mbufo, etuaŋa erifɔp emi Jehovah ɔkɔfɔpde.

⁷Ndien mbufo ekuwɔŋɔ ke enyin-usuŋ efe esop, mbak edikpaŋa: koro aran-nyere Jehovah eyerede mbufo ke idem. Ndien mmɔ enam ke uyo Moses.

⁸Ndien Jehovah ɔdɔhɔ Aaron, ete,

⁹Kuŋwɔŋ wine ye mmin, afo, ye nditɔ fo ŋko, ke ini mbufo edukde efe esop, mbak mbufo edikpaŋa: nsinsi ewuhɔ edi emi ke ofuri emana mbufo:

¹⁰man enyuŋ edianare eti ye idiɔk, ye se idehede ke se isanade;

¹¹man enyuŋ ekpep nditɔ Israel kpukpru mme ewuhɔ emi Jehovah ɔkɔdɔhɔde mmɔ ke ubɔk Moses.

¹²Ndien Moses ɔdɔhɔ Aaron, ye Eleazar, ye Ithamar, nditɔ esie emi esukde, ete, Mbufo eda uwa udia emi ɔsuhɔde ke uwa ikaŋ Jehovah, eta ke ŋkaŋ itie-uwa, ekusin leaven: koro enye edide ata edisana:

¹³mbufo enyuŋ eta enye ke edisana ebiet: koro enye edide udeme fo, ye udeme nditɔ fo, ke uwa ikaŋ Jehovah: koro ntem ke ekewuk mi.

¹⁴Ndien mbufo eta edifuŋ ikɔŋesit ye edimenere afara, ke ɔtɔ eke asanade; afo, ye nditɔ-iren fo, ye nditɔ-iban fo ŋko: koro esiode mmɔ ke mme uwa emem nditɔ Israel enɔ ke udeme fo, ye udeme nditɔ-iren fo.

¹⁵Yak mmɔ eda edimenere afara, ye edifuŋ ikɔŋesit ekɔrɔ ke ikpɔŋ eke efɔpde ke ikaŋ, edi, man efuŋ enye ke edifuŋ uwa ke iso Jehovah; ndien eyenyene fi, ye nditɔ fo ŋko, ke nsinsi udeme; nte emi Jehovah okowukde.

¹⁶Ndien Moses aka okoyom okpo ebot uwa idiɔk ido, ndien sese, ema ekefɔp enye: ndien enye ayat esit ye Eleazar ye Ithamar, nditɔ Aaron emi esukde, ete,

¹⁷Enam didie mbufo mitaha uwa idiɔk ido ke edisana ebiet: koro enye edide ata edisana? Enye (Abasi) ama onyuŋ ada enye ɔnɔ mbufo ete, Mbufo ebiom idiɔk ido ofuri esop, man esio isop enɔ mmɔ ke iso Jehovah.

¹⁸Sese, ikadaha iyip esie iduk ke esit edisana ebiet: mbufo ekpeta enye ke edisana ebiet, kpa nte emi ŋkowukde.

¹⁹Ndien Aaron ɔdɔhɔ Moses, ete, Sese, mmɔ ekeda uwa idiɔk ido mmɔ ye edifɔp uwa mmɔ edi ke iso Jehovah mfin emi; ndien oruk ŋkpɔ emi emenam mi: ndien, ŋkpata uwa idiɔk ido mfin emi, ekpenem Jehovah?

²⁰Ndien ke ini Moses okopde, ɔfɔn enye ke enyin.