Read efik LEVITICUS 13 Bible Online

LEVITICUS 13 - efik bible

LEVITICUS 13

¹NDIEN Jehovah ɔdɔhɔ Moses ye Aaron, ete,

²Adaŋemi mkpuk, mme ŋkikan, mme afia ŋkem odude owo ke ikpɔhidem, ama onyuŋ ebiet udɔŋɔ akpa-mfia ke ikpɔhidem esie; yak eda enye esɔk Aaron oku, mme owo nditɔ esie, mme oku kiet;

³ndien yak oku ese udɔŋɔ oro ke ikpɔhidem esie: ndien edieke idet ke udɔŋɔ oro akabarede edi afia, enye ama onyuŋ okut nte udɔŋɔ oro ɔbuhɔde ke esit ikpɔhidem esie, enye edi udɔŋɔ akpa-mfia: ndien yak oku ese enye, onyuŋ onim enye ke edidehe.

⁴Edieke afia ŋkem esemde ke ikpɔhidem esie, onyuŋ ebiet ete ke enye ibuhɔke ke esit ikpɔhidem, idet esie minyuŋ ikabakede idi afia; yak oku okuk owo udɔŋɔ oro ke ofuri usen itiaba.

⁵Ndien ke ɔyɔhɔ usen itiaba, yak oku ese enye: ndien sese, edieke enye esede ete ke udɔŋɔ oro atuak ada, udɔŋɔ minyuŋ itarake ke ikpɔhidem; ndien yak oku ɔtɔŋɔ ntak okuk enye ke usen itiaba efen.

⁶Ndien yak ese enye ŋko ke ɔyɔhɔ usen itiaba; ndien, sese, edieke udɔŋɔ oro ebierede, udɔŋɔ minyuŋ itarake ke ikpɔhidem, yak oku onim enye ke edisana: ke edi ŋkikan: ndien enye eyet edisine-ŋkpɔ esiemɔ, ndien edidi edisana.

⁷Edi edieke ŋkikan oro atarade ke ikpɔhidem, adaŋemi oku ama okukut enye man onim enye ke edisana, yak oku ɔtɔŋɔ ntak ese enye.

⁸Ndien oku okut enye, ndien sese, edieke ŋkikan oro atarade ke ikpɔhidem, yak oku onim enye ke edidehe: akpa-mfia edi oro.

⁹Adaŋemi udɔŋɔ akpa-mfia odude owo ke idem, yak eda enye esɔk oku; yak oku onyuŋ ese enye:

¹⁰ndien, sese, edieke afia mkpuk odude ke ikpɔhidem, enye ama onyuŋ anam idet akabare edi afia, inia onyuŋ odu ke mkpuk oro;

¹¹akani akpa-mfia edi oro ke ikpɔhidem esie; ndien yak oku onim enye ke edidehe, okukuk enye: koro enye edehede.

¹²Ndien edieke akpa-mfia oro ɔtɔtde ke ikpɔhidem, akpa-mfia onyuŋ ofuk ofuri ikpɔhidem owo udɔŋɔ oro, ɔtɔŋɔde ke ibuot esie tutu osim ukot esie, adaŋa nte enye oku okutde;

¹³ndien yak oku ese enye ndien, sese, edieke akpa-mfia ofukde ofuri obukidem esie, yak enye onim owo udɔŋɔ oro ke edisana: kpukpru ama akabara afia: enye asana.

¹⁴Edi ke usen emi ekutde enye inia ke idem, enye edehe.

¹⁵Ndien yak oku ese inia oro, onyuŋ onim enye ke edidehe: inia edehe: akpa-mfia edi oro.

¹⁶Edi edieke inia oro ɔtɔŋɔde ntak akabare edi afia, yak enye etiene oku;

¹⁷ndien yak oku ese enye: ndien, sese, udɔŋɔ oro ama akabare edi afia, yak oku onim owo udɔŋɔ oro ke edisana: enye asana.

¹⁸Ndien ŋko adaŋemi ifire ofutde ke obukidem, ke ikpɔk esie, ndien okurede,

¹⁹ndien afia mkpasip ɔmuhɔre ke ɔtɔ ifire oro, mme edi ediyama ŋkem, afia ye iduot, yak eda enye ekewut oku;

²⁰yak oku ese, ndien sese, ama ebiet ŋkpɔ eke ɔbuhɔde ke esit ikpɔhidem, idet esie ama onyuŋ akabare afia; yak oku onim enye ndien ke edidehe; ke edi udɔŋɔ akpa-mfia eke asiahade ke itie ifire.

²¹Edi edieke oku esede enye, ndien, sese, afia idet miduhe ke esit, enye minyuŋ ibuhɔke ke esit ikpɔhidem, edi etie edibire-edibire; yak oku okuk enye ofuri usen itiaba:

²²ndien edieke enye atarade tara ke ikpɔhidem, yak oku onim enye ke edidehe: ke edi udɔŋɔ.

²³Edi edieke ediyama ŋkem atakde tak ke itie esie, minyuŋ itarake, nde ifire edi oro; ndien oku onim enye ke edisana.

²⁴Mme adaŋemi obukidem enyenede nde ikaŋ, nde ikaŋ oro edinyuŋ akabare adat ayama oyibe;

²⁵yak oku ese enye; ndien, sese, edieke idet ama akabare afia ke ediyama nde oro, onyuŋ ebiet nte ŋkpɔ ɔbuhɔde ke esit ikpɔhidem; enye edi akpa-mfia eke asiahade ke nde ikaŋ oro: mmɔdo yak oku onim enye ke edidehe: udɔŋɔ akpa-mfia edi oro.

²⁶Edi edieke oku esede enye, ndien, sese, afia idet miduhe ke ediyama ŋkem oro, ŋkpɔ minyuŋ ibuhɔke ke esit ikpɔhidem, ndien etie edibire; yak oku okuk enye ke usen itiaba.

²⁷Ndien ke ɔyɔhɔ usen itiaita, yak oku ese enye: edieke ŋkem atarade ke ikpɔhidem, yak oku onim enye ke edidehe: udɔŋɔ akpa-mfia edi oro.

²⁸Ndien edieke ediyama ŋkem oro atuakde ada ke itie esie, mitarake ke ikpɔhidem, ndien etie edibire-edibire; enye edi mkpuk ke nde ikaŋ, ndien yak oku onim enye ke edisana: koro enye edibe nde ikaŋ.

²⁹Ndien edieke eren mme ŋwan enyenede udɔŋɔ ke ibuot mme ke ebek;

³⁰ndien yak oku ese udɔŋɔ oro: ndien, sese, ama ebiet ŋkpɔ eke ɔbuhɔde ke esit ikpɔhidem; mfefere uto-uto idet onyuŋ odude ke esit; yak oku onim enye ke edidehe: oro edi ikpɔk, ke edi akpa-mfia ibuot mme eke ebek.

³¹Ndien adaŋemi oku okutde udɔŋɔ ikpɔk oro, ndien, sese, mibietke ŋkpɔ eke ɔbuhɔde ke esit ikpɔhidem, obubit idet minyuŋ iduhe ke esit; yak oku okuk owo udɔŋɔ ikpɔk oro ke usen itiaba.

³²Ndien yak oku ese udɔŋɔ oro ke ɔyɔhɔ usen itiaba; ndien, sese, ikpɔk oro mitarake, uto-uto idet minyuŋ iduhe ke esit, onyuŋ ebiet nte ikpɔk oro mibuhɔke ke esit ikpɔhidem;

³³yak enye okporo ndien idem esie, edi okukporo ikpɔk oro; ndien yak oku okuk owo ikpɔk oro ke usen itiaba efen.

³⁴Ndien oku ese ikpɔk ke ɔyɔhɔ usen itiaba; ndien, sese, ikpɔk mitarake ke ikpɔhidem, onyuŋ ebiet nte mibuhɔke ke esit ikpɔhidem; yak oku onim enye ke edisana: yak enye onyuŋ eyet edisine-ŋkpɔ esie, ndien asana.

³⁵Edi ikpɔk oro ama atara ke ikpɔhidem, ke ema ekenim enye ke edisana;

³⁶yak oku ndien ese enye: ndien, sese, ikpɔk oro ama atara ke ikpɔhidem, oku okukpa ndiyom uto-uto idet; owo oro edehe.

³⁷Edi edieke ebietde nte ikpɔk atuakde ada, ndien obubit idet otibe ke esit, ikpɔk oro omokure: enye asana: ndien yak oku onim enye ke edisana.

³⁸Ndien ŋko edide eren-owo, onyuŋ edide ŋwan, ke afia ŋkem, kpa afia ŋkem eke esemde, odude mmɔ ke ikpɔhidem; ndien yak oku ese:

³⁹ndien, sese, edieke ediyama ŋkem ke ikpɔhidem mmɔ edide ntɔŋ-ntɔŋ; oro edi ndiɔŋ eke atade ikpɔhidem; enye asana.

⁴⁰Ndien adaŋemi ibuot owo ɔdɔnɔde, ibɔ edi oro; enye asana.

⁴¹Ndien ama edi owo eke ɔdɔnɔde ke mben iso esie, enye edi ibɔ ke ɔkpɔ-iso; enye asana.

⁴²Edi adaŋemi afia udɔŋɔ eke oyibede odude ke ibɔ, edide eke ekɔt, onyuŋ edide ɔkpɔ-iso, oro edi akpa-mfia eke asiahade enye ke ibɔ ekɔt, mme ke eke ɔkpɔ-iso.

⁴³Ndien yak oku ese enye: ndien, sese, edieke mkpuk udɔŋɔ oro afiade, onyuŋ oyibede ke ibɔ ekɔt, mme ke ibɔ ɔkpɔ-iso esie, nte akpa-mfia ke ikpɔhidem etiede;

⁴⁴owo oro ɔdɔŋɔ akpa-mfia, enye edehe: yak oku onim enye ke edidehe; udɔŋɔ esie odu enye ke ibuot.

⁴⁵Ndien yak ewai edisine-ŋkpɔ owo akpa-mfia emi udɔŋɔ oro anamde enye, ibuot esie onyuŋ etie iferi, yak enye onyuŋ ofuk ŋkpɔ ke ebek esie, onyuŋ ofiori ete, Edidehe, edidehe.

⁴⁶Kpukpru usen eke udɔŋɔ oro anamde enye, enye ama asabare; enye emedehe; yak enye etie ikpɔŋ-ikpɔŋ; yak iduŋ esie odu ke edem nna.

⁴⁷Ndien ŋko, ama edi ɔfɔŋ idem, ke ini udɔŋɔ akpa-mfia odude enye ke esit, edide ɔfɔŋidem idet erɔŋ, onyuŋ edide ɔfɔŋidem linen;

⁴⁸edide ke nnyan-nnyan ndidi, onyuŋ edide ke mbiɔŋ-mbiɔŋ; ke linen ye ke idet erɔŋ; edide ke ikpa, onyuŋ edide ke ŋkpɔ ekededi eke enamde ke ikpa;

⁴⁹ndien edieke udɔŋɔ oro edide awa ntɔŋ, mme iduot ntɔŋ, ke ɔfɔŋ idem, mme ke ikpa, mme ke nnyan-nnyan, mme ke mbiɔŋ-mbiɔŋ, mme ke ŋkpɔ ikpa ekededi; udɔŋɔ akpa-mfia edi oro, yak enyuŋ eda enye ewut oku:

⁵⁰ndien yak oku ese udɔŋɔ oro, onyuŋ okuk ŋkpɔ udɔŋɔ oro ke usen itiaba.

⁵¹Ndien ke ɔyɔhɔ usen itiaba, yak enye ese ŋkpɔ udɔŋɔ oro: ke ini udɔŋɔ oro atarade ke ɔfɔŋidem, edide ke nnyan-nnyan, onyuŋ edide ke mbiɔŋ-mbiɔŋ, edide ke ikpa, mme ke ŋkpɔ ekededi eke enamde ke ikpa, udɔŋɔ oro edi idiɔk akpa-mfia; enye edi edidehe.

⁵²Ndien yak enye ɔfɔp ɔfɔŋidem oro, edide nnyan-nnyan, onyuŋ edide mbiɔŋ-mbiɔŋ, edide idet erɔŋ, onyuŋ edide linen, mme ŋkpɔ ikpa ekededi, eke udɔŋɔ oro odude ke esit: koro enye edide idiɔk akpa-mfia; yak efɔp enye ke ikaŋ.

⁵³Edi edieke oku esede, ndien, sese, udɔŋɔ oro mitarake ke ɔfɔŋidem edide ke nnyan-nnyan, onyuŋ edide ke mbiɔŋ-mbiɔŋ, mme ke ŋkpɔ ikpa ekededi;

⁵⁴ndien yak oku ɔdɔhɔ ete eyet se udɔŋɔ odude ke esit, onyuŋ ɔtɔŋɔ ntak okuk enye ke usen itiaba eŋwen;

⁵⁵ndien yak oku ese adaŋemi ema ekeyet udɔŋɔ oro ema: ndien, sese, udɔŋɔ oro mikabakede iso esie, udɔŋɔ minyuŋ itarake tara; enye edehe; fɔp ke ikaŋ; atata ke esit ye ke edem.

⁵⁶Edi edieke oku esede, ndien, sese, udɔŋɔ oro ama etie edibire-edibire, ke ema ekeyet enye ema; yak enye awai enye ndien efep ke ɔfɔŋidem oro, mme ke ikpa oro, edide ke nnyan-nnyan, onyuŋ edide ke mbiɔŋ-mbiɔŋ:

⁵⁷ndien edieke etɔŋɔde ntak ekut enye ke ɔfɔŋidem oro, edide ke nnyan-nnyan, onyuŋ edide ke mbiɔŋ-mbiɔŋ, onyuŋ edide ke ŋkpɔ ikpa ekededi; ke edi udɔŋɔ eke atarade; men se udɔŋɔ odude ke esit fɔp ke ikaŋ.

⁵⁸Ndien ama edi ɔfɔŋ idem oro, edide nnyan-nnyan, onyuŋ edide mbiɔŋ-mbiɔŋ, onyuŋ edide ŋkpɔ ikpa ekededi, eke afo ediyetde, ndien udɔŋɔ ama okure ke esit, yak etɔŋɔ ntak eyet enye, ndien enye edidi edisana.

⁵⁹Emi edi udɔŋɔ akpa-mfia ke ɔfɔŋidem idet erɔŋ, mme eke linen, edide ke nnyan-nnyan, onyuŋ edide ke mbiɔŋ-mbiɔŋ, mme ke ŋkpɔ ikpa ekededi, man enim enye ke edisana, mme ke edidehe.