Read efik LEVITICUS 19 Bible Online

LEVITICUS 19 - efik bible

LEVITICUS 19

¹NDIEN Jehovah ɔdɔhɔ Moses, ete, Dɔhɔ ofuri esop nditɔ Israel, ete,

²Mbufo edi edisana: koro ami Jehovah Abasi mbufo ndide edisana.

³Kpukpru mbufo ebak eka mbufo ye ete mbufo, enyuŋ enim mme sabbath mi: ami ndi Jehovah Abasi mbufo.

⁴Mbufo ekukabare etiene ndem, ekunyuŋ etara ŋkpɔ enam abasi enɔ idem mbufo: ami ndi Jehovah Abasi mbufo.

⁵Ndien ŋko ke ini mbufo ewade uwa emem enɔ Jehovah, ewa enye ke ima esit mbufo.

⁶Mbufo eta se ewade ke suk usen oro ye edem usen: ndien eda se isuhɔde isim ɔyɔhɔ usen ita, efɔp ke ikaŋ.

⁷Ndien edieke etade ta ke ɔyɔhɔ usen ita, enye oro edi ŋkpɔ ndek; idinemke (Abasi).

⁸Ndien owo eke atade eyebiom ukwaŋ-ŋkpɔ esie: koro enye abiatde edisana ŋkpɔ Jehovah: ndien yak esibe ukpɔŋ oro efep ke otu mbio-obio mmɔ.

⁹Ndien ŋko ke ini mbufo ekpeŋede udia iŋwaŋ mbufo, kukpeŋe inuk iŋwaŋ fo uma, kunyuŋ utaŋ se ibɔhɔde iduɔŋɔ ke ukpeŋe fo.

¹⁰Kunyuŋ utet kpukpru mfri ke iŋwaŋ vine fo uma, kunyuŋ utaŋ kpukpru se iduɔŋɔde ke iŋwaŋ vine fo; yak mmɔ kpɔŋ nɔ mme ubuene ye isen owo: ami ndi Jehovah Abasi mbufo.

¹¹Mbufo ekuyip inɔ, ekunyuŋ ebiaŋa abiaŋa, kiet okunyuŋ osu nsu ɔnɔ kiet.

¹²Mbufo ekunyuŋ etomo enyiŋ mi esin ke nsu; kunyuŋ ubiat enyiŋ Abasi fo: ami ndi Jehovah.

¹³Kutuk mbɔhɔiduŋ fo: kunyuŋ nbume enye: kunyuŋ unam ŋkpɔ-eyen-utom owo eke afo ekpede, adaŋ ye afo tutu eyo esiere.

¹⁴Kusuŋi inan, kunyuŋ ubiɔŋ nnan ŋkpɔ iduɔ ke iso, edi bak Abasi fo: ami ndi Jehovah.

¹⁵Mbufo ekunam se minenke ke ikpe: kuteŋe ubuene enyin, kunyuŋ ukpono iso akamba owo: edi kpe ikpe mbɔhiduŋ fo nte enende.

¹⁶Kusaŋa ubia mbia ke otu mbio-obio mbufo: kunyuŋ uyom iyip mbɔhiduŋ fo: ami ndi Jehovah.

¹⁷Kusua eyen usɔ ke esit fo; edi kutre ndisua nɔ mbɔhiduŋ fo, mbak afo edidue isop abaŋa enye.

¹⁸Kusio usiene, kunyuŋ ukɔk nditɔ obio mbufo ekikɔhɔ edi ma mbɔhiduŋ fo nte idem fo: ami ndi Jehovah.

¹⁹Mbufo enim mme ewuhɔ mi. Kuyak oruk ufene fo efen edoro oruk eken: kubuak uduot usuan ke iŋwaŋ fo: kunyuŋ usine mbuaha ɔfɔŋidem eke enamde ke linen ye idet erɔŋ.

²⁰Ndien ŋko ke ini owo ɔdɔde ŋwan eke edide ofin, eke ekebemde iso enim enɔ owo, edi mifakke fak, minyuŋ inɔŋɔ enye itie eyen isɔŋ; yak emiŋa mmɔ: ekuwot mmɔ: koro ŋwan midige eyen isɔŋ.

²¹Ndien yak eren owo ada uwa isop esie edisɔk Jehovah ke usuŋ efe esop, okukim erɔŋ uwa isop.

²²Ndien oku ada okukim uwa isop oro osio isop ɔnɔ enye ke iso Jehovah, abaŋa idiɔk ido esie emi enye akanamde; ndien eyefen idiɔk-ŋkpɔ emi enye akanamde, enɔ enye.

²³Ndien ŋko ke mbufo edidukde ke isɔŋ oro, edinyuŋ etɔde kpukpru oruk eto mfri eke ediade, ndien mbufo enim mfri esie ke edut: mbufo ebat enye ke edut ke ofuri isua ita: ekudia ke esit.

²⁴Edi ama ekem ke ɔyɔhɔ isua inaŋ ofuri mfri esie akabare edi edisana, eda enye ekɔm Jehovah.

²⁵Ndien edia mfri esie ke ɔyɔhɔ isua ition, man mbuŋwum esie ɔtɔt ɔnɔ mbufo: ami ndi Jehovah Abasi mbufo.

²⁶Mbufo ekuta unam ye iyip esie: ekutiene idiɔŋ, ekunyuŋ enam ibɔk.

²⁷Ekunim ekpɔŋ; kunyuŋ ubiat mben ntaŋebek fo.

²⁸Ekunyuŋ ekpi obukidem mbufo ebaŋa akpa-mkpa, ekunyuŋ ewet ŋwed ke idem mbufo: ami ndi Jehovah.

²⁹Kubiat eyen fo aŋwan, unim enye akpara; mbak isɔŋ oro edisaŋa use, mbak mme oburobut ido edinyuŋ eyɔhɔ ke isɔŋ oro.

³⁰Mbufo enim mme sabbath mi, enyuŋ eteŋe edisana ufɔk mi: ami ndi Jehovah.

³¹Mbufo ekukabare etiene ekpo, ekunyuŋ ebup mbia-idiɔŋ, mbak mmɔ edisabare mbufo: ami ndi Jehovah Abasi mbufo.

³²Daha da ke iso owo iwat, nyuŋ kpono ebiowo iso, nyuŋ bak Abasi fo: ami ndi Jehovah.

³³Ndien ke adaŋemi esen owo oduŋde ye afo ke isɔŋ mbufo, mbufo ekutuk enye.

³⁴Ebat esen eke oduŋde ye mbufo nte amana ke otu mbufo, nyuŋ ma enye nte idem fo: koro mbufo ekedide isen ke isɔŋ Egypt: ami ndi Jehovah Abasi mbufo.

³⁵Mbufo ekunam se minenke ke ikpe, mme ke idomo afara, mme ke idomo udop, mme ke udomo.

³⁶Mbufo enyene balance eke enende ye mme itiat udop eke enende, ye ephah eke enende, ye hin eke enende; ami ndi Jehovah Abasi mbufo, emi ŋkadade mbufo ke isɔŋ Egypt ŋwɔrɔ.

³⁷Mbufo enim ndien kpukpru mme ewuhɔ mi, ye kpukpru item mi, enyuŋ enam mmɔ: ami ndi Jehovah.