Read efik LEVITICUS 21 Bible Online

LEVITICUS 21 - efik bible

LEVITICUS 21

¹EKEM Jehovah ɔdɔhɔ Moses, ete, Dɔhɔ mme oku, nditɔ Aaron, ete mmɔ, Owo ndomo kiet okusabare idem esie abaŋa akpa-mkpa ke otu mbio-obio mmɔ;

²ke mibɔhɔke oruk esiemɔ emi ekperede enye, ke abaŋa eka esie, ye ete esie, ye eyen esie eren, ye eyen esie aŋwan, ye eyen-eka esie eren,

³ye eyen-eka esie aŋwan, eyenɔwɔŋ eke ekperede enye, eke mika-inyeneke ebe; ke enye edisabare idem esie abaŋa enye.

⁴Enye okusabare idem esie: koro enye edi akamba owo ke otu mbio-obio mmɔ, mbak enye edibiat idem esie.

⁵Mmɔ ekutem ibɔ ke ibuot, ekunyuŋ ekporo mben ntaŋ-ebek mmɔ, ekunyuŋ ekpeŋe idem mmɔ.

⁶Yak mmɔ edi edisana ikɔt Abasi mmɔ, ekunyuŋ ebiat enyiŋ Abasi mmɔ: koro edi mmɔ edi mme awa uwa ikaŋ Jehovah, ye uyo Abasi mmɔ: yak mmɔ edi edisana ndien.

⁷Mmɔ ekudɔ akpara, mme ŋwan eke abiarade; ekunyuŋ edɔ ŋwan eke ebe okosiode: koro oku edide edisana owo Abasi esie.

⁸Nam enye edi edisana ndien: koro edide enye edi awa uyo Abasi fo: nim enye ke edisana: koro ami Jehovah, emi nnamde mbufo esana, ndi edisana.

⁹Ndien ŋko, eyen oku aŋwan ama asabare idem esie ke erisaŋa akpara, enye asabare ete esie: yak efɔp enye ke ikaŋ.

¹⁰Ndien ŋko akwa oku ke otu nditɔ-ete esie, emi eketɔhɔde enye aran-nyere ke ibuot, enyuŋ eyɔhɔde enye ubɔk man esine edisine-ŋkpɔ oro, okukporo idet esie, okunyuŋ awai edisine-ŋkpɔ esie;

¹¹okunyuŋ aka ke ɔtɔ eke okpo ekededi odude, okunyuŋ asabare idem esie abaŋa ete esie, ye eka esie:

¹²okunyuŋ ɔwɔrɔ ke edisana ebiet, okunyuŋ abiat edisana ebiet Abasi esie: koro enye ayarade anyanya aran-nyere Abasi esie: ami ndi Jehovah

¹³Yak enye onyuŋ ɔdɔ ŋwan eke edide eyenɔwɔŋ.

¹⁴Ama edi ŋwan eke ebe esie akpade, ye ŋwan eke esiode ndɔ, ye eke abiarade, ye akpara, enye okudɔ mme mmɔ emi; ke mibɔhɔke ŋwan eke edide eyen-ɔwɔŋ eke otode ke oruk esie ke enye edidɔ.

¹⁵Enye okunyuŋ abiat ubon esie ke otu oruk esie: koro edi ami Jehovah nnam enye asana.

¹⁶Ndien Jehovah ɔdɔhɔ Moses, ete, Dɔhɔ Aaron,

¹⁷ete, Owo ekededi ke otu ubon fo ke emana mmɔ, eke obiomode ndo okusaŋa ekpere ndiwa uwa uyo Abasi esie.

¹⁸Koro baba ofuri owo kiet eke obiomode ndo okusaŋa ekpere: mme nnam, mme mbuŋɔ, mme abara ibuo, mme utibe owo,

¹⁹mme owo eke ɔbuŋɔde ukot, mme owo eke onyuŋ ɔbuŋɔde ubɔk,

²⁰mme ekuŋ, mme isɔ-isɔ owo, mme odoro okpot, mme atak mfat, mme owo mkpɔk, mme anuaha nsen;

²¹baba ofuri owo kiet eke obiomode ndo ke otu ubon Aaron oku okusaŋa ekpere ndiwa uwa ikaŋ Jehovah; enye obiomo ndo: enye okusaŋa ekpere ndiwa uwa Abasi esie.

²²Yak enye ata uyo Abasi esie, eke ata edisana, ye eke edisana; edi okuduk osim ukara,

²³okunyuŋ asaŋa ekpere itie-uwa, koro enye obiomode ndo; okunyuŋ abiat edisana ebiet mi; koro edi ami Jehovah nnam mmɔ esana.

²⁴Ndien Moses ɔdɔhɔ ntem ye Aaron, ye nditɔ esie, ye kpukpru nditɔ Israel.