Read efik LEVITICUS 23 Bible Online

LEVITICUS 23 - efik bible

LEVITICUS 23

¹EKEM Jehovah ɔdɔhɔ Moses, ete, Dɔhɔ nditɔ Israel, ete mmɔ,

²Ini emi Jehovah onimde, emi mbufo edikwɔrɔde ekot edisana esop, edi mme mmɔ emi, kpa ini mi.

³Yak enam utom ke ofuri usen itiokiet: edi ɔyɔhɔ usen itiaba edi akakan sabbath, edisana esop; mbufo ekunam baba ubɔk-utom (ke esit): enye edi sabbath Jehovah ke kpukpru ebiet iduŋ mbufo.

⁴Mme mmɔ emi edi ini emi Jehovah onimde ke edisana esop, emi mbufo edikwɔrɔde ke ekem ini mmɔ.

⁵Ke akpa ɔfiɔŋ, ke ɔyɔhɔ usen duopenaŋ ke mbubreyo, (ekwɔrɔ) passover Jehovah.

⁶Ndien ke ɔyɔhɔ usen ɔfiɔŋ emi efut, (enim) ini uyo eke leaven miduhe enɔ Jehovah; mbufo eta uyo eke leaven miduhe, ke ofuri usen itiaba,

⁷mbufo esop edisana esop ke akpa usen; ekunam baba ubɔk-utom kiet ke esit.

⁸Mbufo enyuŋ ewa uwa ikaŋ enɔ Jehovah ke ofuri usen mbitiaba: ke ɔyɔhɔ usen itiaba mbufo enim edisana esop; ekunam baba ubɔk-utom kiet.

⁹Ndien Jehovah ɔdɔhɔ Moses, ete, Dɔhɔ nditɔ Israel,

¹⁰ete mmɔ, Ke ini mbufo edukde ke isɔŋ emi ami mmɔŋ nnɔ mbufo, enyuŋ ekpeŋede ukpeŋe udia esie, ndien mbufo emen ebek akpasa ukpeŋe mbufo edisɔk oku;

¹¹ndien enye ada ebek oro ofuŋ ke iso Jehovah, kpaŋ ekpebɔ mbufo ke ubɔk: yak oku ofuŋ ke edem usen sabbath.

¹²Ndien ke usen mbufo efuŋde ebek oro, mbufo enyuŋ eda eyen okukim isua kiet eke ɔfɔnde ama, ewa enɔ Jehovah ke edifɔp uwa;

¹³ye inuak-udia esie ŋkɔ, omer iba eti ndom-uyo eke ebuakde aran, ke uwa ikaŋ ye edinem utebe Jehovah; ye wine ŋko ke quart kiet, ke ediŋwɔŋ uwa esie.

¹⁴Ndien mbufo ekuta uyo, ekunyuŋ eta edifɔp ibokpot, ye ŋkim mbuot, tutu ekem ke idem usen eke mbufo edade uwa edisɔk Abasi mbufo: emi edidi nsinsi ewuhɔ ke kpukpru emana mbufo, ke kpukpru ebiet iduŋ mbufo.

¹⁵Ndien mbufo etɔŋɔ ke edem usen sabbath ebat, ke idem usen emi mbufo edade edifuŋ ebek edi, tutu ekem ye ɔyɔhɔ urua itiaba:

¹⁶tutu ekem ke edem usen ɔyɔhɔ sabbath itiaba, mbufo edibat usen aba ye duop; ndien ewa obufa inuak-udia enɔ Jehovah.

¹⁷Mbufo eda edifuŋ uyo eti ndom iba, eke omer iba, ke iduŋ mbufo edi; yak esin leaven esaŋ mmɔ, mmɔ edi akpa mfri Jehovah.

¹⁸Mbufo enyuŋ ewa nditɔ erɔŋ isua kiet itiaba eke efɔnde ema, ye ayara enaŋ kiet, ye okukim iba, ekɔrɔ ke uyo oro: mme mmɔ emi edi edifɔp uwa Jehovah, ye inuak udia mmɔ, ye ediŋwɔŋ uwa mmɔ, uwa ikaŋ Jehovah ke edinem utebe.

¹⁹Mbufo enyuŋ ewa okpo ebot kiet ke uwa idiɔk ido, ye nditɔ erɔŋ isua kiet iba ke uwa emem.

²⁰Ndien yak oku ofuŋ mmɔ, ye uyo akpa mfri, ke edifuŋ uwa ke iso Jehovah, ye nditɔ erɔŋ iba: mmɔ edidi edisana ŋkpɔ Jehovah ke eke oku.

²¹Ndien ke idem usen oro ke mbufo edikwɔrɔ ete edi edisana esop mbufo: ekunam baba ubɔk-utom kiet: enye edi nsinsi ewuhɔ ke kpukpru iduŋ mbufo, ke ofuri emana mbufo.

²²Ndien ŋko ke ini mbufo ekpeŋede ukpeŋe iŋwaŋ mbufo, kukpeŋe inuk iŋwaŋ fo uma, kunyuŋ utaŋ se ibɔhɔde iduɔŋɔ ke ukpeŋe fo: yak oro kpɔŋ nɔ ubuene, ye esen owo: ami ndi Jehovah Abasi mbufo.

²³Ndien Jehovah ɔdɔhɔ Moses, ete,

²⁴Dɔhɔ nditɔ Israel, ete, ke ɔyɔhɔ ɔfiɔŋ itiaba, ke akpa usen ɔfiɔŋ, ke mbufo edinim sabbath, eke efuride ukorowo enam owo eti, edisana esop.

²⁵Mbufo ekunam baba ubɔk-utom ke esit; edi ewa uwa ikaŋ enɔ Jehovah.

²⁶Ndien Jehovah ɔdɔhɔ Moses, ete,

²⁷Ke ɔyɔhɔ usen duop, ke ɔyɔhɔ ɔfiɔŋ itiaba emi, (mbufo enim) usen usio-isop ŋko: mbufo enim enye ke edisana esop; enyuŋ esuhɔre ukpɔŋ mbufo, enyuŋ ewa uwa ikaŋ enɔ Jehovah.

²⁸Mbufo ekunyuŋ enam baba ubɔk-utom kiet ke idem usen emi: koro enye edide usen usio-isop, eke esiode isop enɔ mbufo ke iso Jehovah Abasi mbufo.

²⁹Koro ama edi owo ekededi eke misukke idem esie ke usen emi, yak esibe enye ke otu mbio-obio mmɔ efep.

³⁰Ama onyuŋ edi owo ekededi eke edinamde utom ekededi ke suk usen emi, nyesobo kpa owo oro ke mbio-obio mmɔ mfep.

³¹Mbufo ekunam baba ubɔk-utom kiet: ke edi nsinsi ewuhɔ ke ofuri emana mbufo, ke kpukpru ebiet iduŋ mbufo.

³²Mbufo enim enye ke akakan sabbath, enyuŋ esuk ukpɔŋ mbufo: ke ɔyɔhɔ usen ɔfiɔŋ usukkiet ke mbubreyo, ɔtɔŋɔde ke mbubreyo tutu osim ke mbubreyo, ke mbufo edinim sabbath mbufo.

³³Ndien Jehovah ɔdɔhɔ Moses, ete, Dɔhɔ nditɔ Israel, ete,

³⁴Ke ɔyɔhɔ usen efut ke ɔyɔhɔ ɔfiɔŋ itiaba emi ke mbufo edinim ini ataya ke usen itiaba enɔ Jehovah.

³⁵Enim edisana esop ke akpa usen; ekunam baba ubɔk-utom ke esit.

³⁶Ke ofuri usen itiaba ke mbufo ediwa uwa ikaŋ enɔ Jehovah; ke ɔyɔhɔ usen itiaita mbufo enim edisana esop, enyuŋ ewa uwa ikaŋ enɔ Jehovah: enye edi usɔrɔ; ekunam baba ubɔk-utom kiet.

³⁷Mme mmɔ emi edi ini emi Jehovah odoride, emi mbufo edikwɔrɔde ekot edisana esop, man ewa uwa ikaŋ enɔ Jehovah, edifɔp uwa, ye inuak-udia, ye uwa emem, ye ediŋwɔŋ uwa, kpukpru ŋkpɔ ke usen mmɔ:

³⁸ekɔrɔ ke mme sabbath Jehovah, ye enɔ mbufo, ye kpu-kpru akaŋa mbufo, ye kpu-kpru uwa ima eke mbufo enɔde Jehovah.

³⁹Ndien ŋko ke ɔyɔhɔ usen efut ke ɔyɔhɔ ɔfiɔŋ itiaba, adaŋemi mbufo ebonde mbuŋwum iŋwaŋ, mbufo enim usɔrɔ enɔ Jehovah usen itiaba: akpa usen edidi sabbath, ɔyɔhɔ usen itiaita onyuŋ edi sabbath ŋko.

⁴⁰Ndien ke akpa usen ke mbufo edida ŋkɔk ndiye eto, mkpabak eyop, ye ŋkɔk mfuhɔ-mfuhɔ eto, ye willow idim mmɔŋ ke idem mbufo; enyuŋ edara ke iso Jehovah Abasi mbufo ke ofuri usen itiaba.

⁴¹Enyuŋ enim enye ke ini idara enɔ Jehovah, ke ofuri usen itiaba kpukpru isua; (emi edide) nsinsi ewuhɔ ke ofuri emana mbufo: ke ɔyɔhɔ ɔfiɔŋ itiaba ke mbufo edinim enye.

⁴²Mbufo eduŋ ke ataya ke usen itiaba; kpukpru emana ke Israel ediduŋ ke ataya,

⁴³kpaŋ mme emana mbufo ekpefiɔk ete ke ŋkanam nditɔ Israel eduŋ ke ataya, adaŋemi ŋkosiode mmɔ ke isɔŋ Egypt mfep: ami ndi Jehovah Abasi mbufo.

⁴⁴Ndien Moses emen mme ini emi Jehovah odoride, asiak ɔnɔ nditɔ Israel.