Read efik LEVITICUS 24 Bible Online

LEVITICUS 24 - efik bible

LEVITICUS 24

¹NDIEN Jehovah ɔdɔhɔ Moses, ete, wuk nditɔ Israel ete eda edisana aran olive eke etimde tim,

²esɔk fi ke eke uŋwana, man edomo utuenikaŋ kpukpru ini.

³Ke iso ukara ŋkpɔ-ntiense, ke efe esop, ke Aaron editim enye ɔtɔŋɔde ke mbubreyo tutu osim usenubɔk ke iso Jehovah kpukpru ini: edide nsinsi ewuhɔ ke ofuri emana mbufo.

⁴Yak enye otim mme utuenikaŋ ke edisana uwuk utuenikaŋ ke iso Jehovah kpukpru ini.

⁵Ndien ŋko da eti ndom-uyo, saŋ uyo duopeba: omer iba esaŋa ke uyo kiet.

⁶Ndien da mmɔ nim ke enyɔŋ edisana okpokoro ke iso Jehovah, sin ke udim iba, itiokiet ke udim.

⁷Nyuŋ da edisana frankincense dori ke udim, man odoro ke uyo nte ŋkpɔ eriti, uwa ikaŋ Jehovah.

⁸Yak enye ɔbɔ nditɔ Israel kpukpru ini, eneŋere ke iso Jehovah kpukpru sabbath, ke nsinsi ediomi.

⁹Ndien enye edinyene Aaron ye nditɔ esie; mmɔ enyuŋ eta enye ke edisana ebiet: koro enye edide ata edisana ŋkpɔ esie ke otu mme uwa ikaŋ Jehovah ke nsinsi ewuhɔ.

¹⁰Ekem eyen eyen-aŋwan Israel kiet emi ete esie edide eyen Egypt, ɔwɔrɔ ke otu nditɔ Israel: ndien eyen eyen-aŋwan Israel emi ye eyen Israel kiet etɔhɔ utɔk ke nna.

¹¹Ndien eyen eyen-aŋwan Israel oro abiat Enyiŋ (Jehovah) onyuŋ osuŋi. Ndien emum enye esɔk Moses, (ndien enyiŋ eka esie ekere Shelomith, eyen Dibri aŋwan, owo esien Dan.)

¹²Ndien mmɔ ekɔbi enye enim, man esian mmɔ nte uyo Jehovah asaŋade.

¹³Ekem Jehovah ɔdɔhɔ Moses, ete,

¹⁴Da andisuŋi oro wɔrɔ ke edem nna, ndien yak kpukpru owo emi ekopde, eda ubɔk mmɔ edori enye ke ibuot, ndien yak ofuri esop etɔŋɔ enye ke itiat.

¹⁵Ndien dɔhɔ nditɔ Israel, ete, Kpukpru owo eke edisuŋide Abasi mmɔ, enyene ndibiom idiɔk ido mmɔ.

¹⁶Ndien ŋko owo eke abiatde enyiŋ Jehovah, enyene ndikpa, yak ofuri esop etɔŋɔ enye ke itiat: edide esen owo, onyuŋ edide eyen isɔŋ, ke ini enye abiatde enyiŋ Jehovah, enye enyene ndikpa.

¹⁷Ndien ŋko owo eke owotde owo ekededi, enyene ndikpa.

¹⁸Yak owo eke owotde unam osio usiene; unam ke-unam.

¹⁹Ndien edieke owo obiomode mbɔhiduŋ esie ndo; yak enam enye kpa nte enye akanamde;

²⁰mbuŋɔ ke mbuŋɔ, enyin ke enyin, edet ke edet: kpa nte enye obiomode owo ndo, yak enam enye kpa ntre.

²¹Owo eke owotde unam, onyuŋ enyene ndisio usiene; edi owo eke owotde owo, enyene ndikpa-kpa.

²²Mbufo enim ubɔk ido kiet ye esen owo, ye eyen isɔŋ: koro ami ndide Jehovah Abasi mbufo.

²³Ndien Moses ɔdɔhɔ nditɔ Israel ete eda owo oro okosuŋide ewɔrɔ ke edem nna, eketɔŋɔ enye ke itiat. Ndien nditɔ Israel enam kpa nte emi Jehovah eketemede Moses.